LUKA 3:3-36

³Bena Ioane ese Ioridane sinavaina badina tanona idoinai e loa heniava, helalo bapatisona, dika igwau-taona, e harorolaiava.

⁴Isaia, peroveta tauna, ena buka ai e torea na heto; eto, Gado ta tano ḡaḡaena ai e boi lolomu, e tomu, Lohiabada ena dala ba lailaia,

⁵Koura iboudiai bae hahonu, Ororo badadia bona ororo maraḡidia iboudiai bae hataora Gabu gageva-gagevadia bae hamaoromaoro, Rigika-rigikadia danu bae hamanada;

⁶Bena taunimanima iboudiai ese Dirava ena Hahemauri bae itaia.

⁷Hutuma ia dekena ela, baine bapatisodia totona; bena ia ese e gwau henidia, eto, Gaigai natudia e, daika ese e hamaoromui do baine vara baduna ba heautania?

⁸Helalo anina ba hahedinaraia. Bona basioto “Ai tamamai na Abraham”; badina be na hamaoromuimu, Dirava na mai siahuna ini nadi amo natuna bema havaradia Abraham ena.

⁹Harihari ira na au badidiai e atoamu; taunabunai huahua namodia asie dobimu audia iboudiai na be utumu, lahi ai he taho kaumu.

¹⁰Aru taudia ese e nanadaia, eto, Ede baia kara toma?

¹¹Ia ese e haere henidia, eto, Mai ena hahedoki rua tauna na ta dabu tauna baine henia; mai ana tauna danu unu baine kara toma.

¹²Tax gogo taudia danu bapatiso iabina totona ela, eto, Hahediba taumu e, ai na ede baia kara toma?

¹³Ia e haere, eto, Taravatu e gwauraimu ḡauna mo bavabia, basio habadaia.

¹⁴Tuari taudia danu e nanadaia, eto, Ai danu ede baia kara toma? Ia eto, Taunimanima basio daḡedaḡe henidia bona basio habadelaidia koikoi, bona davamui korikori mo bavabi mai lalo-namomui ida.

¹⁵Taunimanima na e daradarava bona e haeroava, Ioane na Keriso eiava.

¹⁶Bena ia ese iboudiai e hereva henidia, eto, Lau na ranu amo na bapatisomuimu, a ta be maimu, iena siahu ese lauegu e hereaiamu, lau na dia namo ena tamaka varona baina ruhaia; ia ese Lauma Helaḡa bona lahi amo baine bapatisomui.

¹⁷Ena itapo na imana ai: ena uit ikwadina gabuna baine tapoa ḡoevaḡoeva, uit na ena roge ai baine haboua, a momona be basine bodo lahina ai baine doua vaitani.

¹⁸Iena hereva bunu: ma sisiba herevadia diaḡau ia ese taunimanima e harorolai henidia.

¹⁹Ia ese Herod Ḡaubada danu e sisiba henia, Herodia, ia kakana Filipo adavana, dainai, bona ena kara havara daidiai.

²⁰A Herod ese unu dika iboudiai latadiai ta ma e atoa kau: ia ese Ioane na dibura rumana ai e koua.

²¹Taunimanima iboudiai e bapatisodia negana ai, Iesu danu e bapatisoa. Bena e ḡuriḡuriva ai guba vada e parara,

²²bona Lauma Helaḡa e diho, pune na heto, ia tubuana ai e kau. Bona gado ta guba amo e boi dobi, eto, “Oi na lau Natugu, egu lalokau; lau oi na lalo namo henimumu”.

²³Una negana ai Iesu ena vara laḡanidia na toi-ahui sisivana. Taunimanima e tomava ia na Iosef natuna. Besedia bini: Heli,

²⁴Matat, Levi, Melki, Ianai, Iosef,

²⁵Matatia, Amos, Nahumu, Esli, Nagai,

²⁶Maat, Matatia, Semein, Iosek, Ioda,

²⁷Ioanan, Resa, Serubabele, Sealtiele, Neri,

²⁸Melki, Adi, Kosam, Elmadam, Ere,

²⁹Iosua, Eliesere, Iorim, Matat, Levi,

³⁰Simeon, Iuda, Iosef, Ionam, Eliakim,

³¹Melea, Mena, Matata, Natan, David,

³²Iese, Obed, Boa, Salmon, Nason,

³³Aminadab, Admin, Areni, Hesron, Perese, Iuda,

³⁴Iakob, Isaak, Abraham, Tera, Nahoro,

³⁵Serug, Reu, Peleg, Ebere, Sela,

³⁶Kenan, Afasad, Sem, Noa, Lamek,