Lucas 3:3-36

³Juan bela Jordán-diwar-dikarba-neggwebur-bukmaladse nadegusad. Dulemarga Bab-Dummad-diigi-ogleged-igargi sunmakdii gusad, degi, na e-isgumaladga bukib-binsamarye sogdii gusad. Adi, e-daed gwagmalagar, adi, isguedgi abonolemalagar.

⁴Epenne Bab-Dummad-gayaburba-barsoged-Isaías, Juanʼnik weyob narmaksagusad, deun sogsagusgu: “Dule-wargwen nega-dulesulidganba binnasur sunmaknonikoed, dulemarga sognonikoed: ‘Dule-Dummad-idu igar-mayemar, igar-swilidik mesmar.

⁵Bela nebagan swilidik guoed, yarmala, degi, neg-mullugana, omatolegoed. Igar-bire-bire-mamaid innikii imaklegoed, igar-muru-muru-mamaid oswirmaklebaloed.

⁶Bela dulemar Bab-Dummad-abonoged-wisgumaloed.’ ”

⁷Dulemar-bukidar Bab-Dummad-diigi-ogleged-igar-imakega Juanʼse duurmaknonidamalad. Juan amarga sogdedaed: “¡Ar bemar naibe-bulegan-mimmiganyob gumalad! ¿Ar doa Bab-Dummad nue-urwe-danikoed-idu-wakinned bemar-odurdaksa? Bab-Dummad-diigi-oglegedgi bemar nuguosurmalad.

⁸Degisoggu, be-daedgine na be oyomar, bemar nue-gwagsamalad, be-isguedga na be bukib binsasmalad. ”Mer unnila na be sogmalo: ‘Anmar Abraham-wagan gumarye. A-ulale, Bab-Dummad anmargi nabir binsaergebye.’ Suli, degisuli. Ar be Abraham-wagwasulile, akarsulid, ar Bab-Dummad sunna we-akwamar Abraham-waganga imaked.

⁹”Deginbali, ar bato akan guar sapi-maligi yoid. Ar degisoggu, sapi nue sanmaksulile, a-sapi siklegoed, ogumaklegega soogi melledoed. Deyob Bab-Dummad dulemar-imakmogoed.”

¹⁰Ar degi, dulemar Juanʼse egichiar dasunnad, ega sogdedamalad: —Degite, ¿ibu anmar imakmarsunnoe?

¹¹Juan, abin-imakdegu, sogded: —Dule suba-gobo nikale, dule-subasulidga gogwen ukmogo. Amba deyob masgunnedsik imakbaloed.

¹²Roma-dummadga-mani-gaedgi-arbamaladi, Bab-Dummad-diigi-ogleged-igar-imakega Juanʼse nonimarmogad. Amar ega sogdemarmogad: —Odurdaked-saila, ¿anmardi ibi imakmarmogoe?

¹³Juan amarga sogded: —Melle dulemargi wilub-obichaa be mani gamalo, ar unnila bemarga igar-uklesadba be mani gamaloed.

¹⁴Degine, suar-ibmala ese egichiarmarmogad: —Anmardi ¿ibi imakmarmogoe? Juan, abin-sogded: —Mer emar-annik gannadba mani suo, degine, mer binsa aimar-ogakansao. Ar bemar na be-bennuklegedgi, gusbin be itomalo.

¹⁵Dulemar Juan-sunmaked-itobukmaladi Cristo-edarbebukmarsoggu, na e-gwagegi binsabukmalad, we-Juan, Cristo-sogeye. Cristo sogleged, Bab-Dummad-dule-wargwen-barmidagoye-sogsad-duleye.

¹⁶Juan abin-imakdegu, bela dulemarga sogded: “Ar andi, Bab-Dummad-diigi-ogleged-igar-imakedid. Unnila diigi an emar-ogdiid, ar dule-baid-danikoeddi, ar bur anba dule-dummadid. Ar e-sapat-dubse-bakar, geg an ei esiked. Ar a-duledi, Bab-Dummad-Burba-Isligwaledgi, degi, soogi be-ognonimaloed.

¹⁷”Igi dulemar oros-gwag egwamala, deyob, a-dule, oros-gwag-egwaega bato guagwar e-argangi bigbi-gani gwichid. Degi, oros-gwag-nued e-urbed-neggi nue urboed, e-ukadi soogi ogumakoed. Ar we-soode, geg soo-ginnedid, degi-gasii-sadeguad-sood.” We sogledo, dule-dummad oros-gwagyob dulemar-imaknonikoye.

¹⁸Weyobi, Juan bukidar dulemar-unadii gusad, Bab-Dummad-Gayaburba-Nuedgi dulemarga sunmakdii gusad.

¹⁹Herodes dummadga-maigu, e-urba-Felipe-ome-Herodíasʼye-nugad-nikusad-ular, degi, bela-ibmar-isganamar-imaksad-ular, Juan sabsur Herodesʼga ibmar sogsad.

²⁰Ibmar-baid-isgana imaksadbali, Herodes esgaryagi Juan-meted.

²¹Degidgine, bela dulemar Bab-Dummad-diigi-ogleged-igar-imaknanaigua, Jesús Bab-Dummad-diigi-ogleged-igar imaksamogad. Jesús Bab-Dummadse gotegu, nibnega argade gusad.

²²Jesúsʼgi Bab-Dummad-Burba-Isligwaled sanale, nuuyobi aidenonikid, degi, nibneggi gayaburba gollar gusad, sogded: “Be An-Machi-sabed-sunnad gued. An beba weligwar itoged.”

²³Jesús na e-arbaed imakdegu, deun birga-durgwen-gakambe (30) nikad. Jesús, José-e-machiye bimalanad. Jesús-e-dad-dummagan, wemalad: José, Elí-machi.

²⁴Elíʼdi, Matat-machid. Matatʼdi, Leví-machid. Levíʼdi, Melqui-machid. Melquiʼdi, Jana-machid. Janaʼdi, José-machid.

²⁵Joséʼdi, Matatías-machid. Matatíasʼdi, Amós-machid. Amósʼdi, Nahúm-machid. Nahumʼdi, Esli-machid. Esliʼdi, Nagai-machid.

²⁶Nagaiʼdi, Maat-machid. Maatʼdi, Matatías-machid. Matatíasʼdi, Semei-machid. Semeiʼdi, José-machid. Joséʼdi, Judá-machid.

²⁷Judáʼdi, Joana-machid. Joanaʼdi, Resa-machid. Resaʼdi, Zorobabel-machid. Zorobabelʼdi, Salatiel-machid. Salatielʼdi, Neri-machid.

²⁸Neriʼdi, Melqui-machid. Melquiʼdi, Adi-machid. Adiʼdi, Cosam-machid. Cosamʼdi, Elmodam-machid. Elmodamʼdi, Er-machid.

²⁹Erʼdi, Josué-machid. Josuéʼdi, Eliezer-machid. Eliezerʼdi, Jorim-machid. Jorimʼdi, Matat-machid.

³⁰Matatʼdi, Leví-machid. Levíʼdi, Simeón-machid. Simeónʼdi, Judá-machid. Judáʼdi, José-machid. Joséʼdi, Jonán-machid. Jonánʼdi, Eliaquim-machid.

³¹Eliaquimʼdi, Melea-machid. Meleaʼdi, Mainán-machid. Mainánʼdi, Matata-machid. Matataʼdi, Natán-machid.

³²Natánʼdi, David-machid. Davidʼdi, Isaí-machid. Isaíʼdi, Obed-machid. Obedʼdi, Booz-machid. Boozʼdi, Salmón-machid. Salmónʼdi, Naasón-machid.

³³Naasónʼdi, Aminadab-machid. Aminadabʼdi, Aram-machid. Aramʼdi, Esrom-machid. Esromʼdi, Fares-machid. Faresʼdi, Judá-machid.

³⁴Judáʼdi, Jacob-machid. Jacobʼdi, Isaac-machid. Isaacʼdi, Abraham-machid. Abrahamʼdi, Taré-machid. Taréʼdi, Nacor-machid.

³⁵Nacorʼdi, Serug-machid. Serugʼdi, Ragau-machid. Ragauʼdi, Peleg-machid. Pelegʼdi, Heber-machid. Heberʼdi, Sala-machid.

³⁶Salaʼdi, Cainán-machid. Cainánʼdi, Arfaxad-machid. Arfaxadʼdi, Sem-machid. Semʼdi, Noé-machid. Noéʼdi, Lamec-machid.