Luk 2:4-41

⁴O Josep kai i wan tagitiro una tamon Nasaret una papor Galili utong o Betliem una papor Judia. O Betliem, a tamon ra di usus o Dewid iai, ma o Josep i wan utong, uni i tagun a kabotaro anun o Dewid.

⁵I wan sur din tumus a risano, tomo nama risan o Maria ra di sa ubek bat tari sur anunu. Ra der wan o Maria i sa tianan.

⁶Ra der kis tong o Betliem, i sa sot a du bung sur o Maria in usus uni,

⁷ra i usus pas a mugano nutunu, a nat musano. Ma i pulusi nama kum malu anun a nat, ma i inep tari una boks na inangon ana kum wewegua, uni a rumu na usiro i sa bukus pas gusun detul.

⁸A ramano kum tene tamtamabat anun a kum sipsip det tamtamabat anundet a kum sipsip una mirum sa ubual milau una tamon ra.

⁹Ma a ensel anun a Labino i wanpat torom det, ma a minamar anun a Labino i sisio talilis det, ra det ngara doko.

¹⁰Ikut a ensel i watungi tandet lena, “Gong mot ngara. Mot tama i, a wanpat torom mot nama wakak na wasiso ra in ugasgas a taro rop.

¹¹Uniri, una tamon anun o Dewid, di sa usus pas anumot a Tene Ulaun, i a Karisito, a Labino.

¹²Ma mot in tama a ukinalong lenri: A nat di pulus tari nama kum malu na nat, ma di inep tari una boks na inangon ana kum wewegua.”

¹³Uniutra a labino kunur na ensel tagisapat una langit det wanpat torom a ensel ra, ma det watung ulabo pas o God lena,

¹⁴“Dat in watung ulabo pas o God sapat netes sakit, ma a malmal una rakrakon bual rop torom det ra o God i gas sur det.”

¹⁵Ra a kum ensel det sa wan gusun det usapat netes una langit, a kum tene tamtamabat anun a kum sipsip det watungi lena, “Uniutri dat in nan utong o Betliem, dat in tama a utna ri i sa wanpat, ra a Labino i sa inanos tar dat nami.”

¹⁶Ra det wan lakit, ra det sio pas o Maria ma o Josep ma a nat miso ra di inep tari una boks na inangon ana kum wewegua.

¹⁷Ra det sa tama tar a nat, det watung puaso a wasiso ra a ensel i sa inanos tar det nami una nat ra.

¹⁸Det rop ra det longoro a wasiso anun a kum tene tamtamabat anun a kum sipsip, det kisin doko uni.

¹⁹Ra o Maria i longoro a kum wasiso ri, i pam ukai i unin balano ma i nuknuk doko uni.

²⁰A kum tene tamtamabat anun a kum sipsip det milet melet, det ulabo pas o God ma det rakon lekeleke pasi una kum utna det longoro i ma det sa tama tari, elar ut nama wasiso anun a ensel.

²¹Ra i tiwal na bung anun a nat, ma i sa sot sur din tok talilis a pinino, di pasor tar a risano nam o Iesu, elar nama wasiso ra a ensel i sa watung tari ra o Maria ke tianan utmakai.

²²Numur tan a bung ra o Maria i usus o Iesu, o Maria ma o Josep der kis ru a kum bung na utalapor sur o Maria in talapor melet umatan o God. Ra a kum bung ra, i sa rop, der wan usapat o Jerusalem, sur der in pitar a etabor, elar nama Warkurai anun o Moses. Der in etabor nama “arin natabun o arin barman na balus,” elar nama Warkurai anun a Labino. Der los o Iesu utkai usapat o Jerusalem, sur der in pitar tari torom a Labino, elar nami ra di sa tumus tari una Warkurai anun a Labino lena, “A kum mugano nat musano rop ma a kum mugano loko na wewegua, din pitar tar det torom a Labino.”

²⁵Ara musano i kis sapat o Jerusalem a risano o Simion, a tene tokodos ma a tene urur kai torom o God. I ser kis langlang sur o God in ulaun a taro Israel, ma a Tokodos na Nion i kis uni.

²⁶A Tokodos na Nion i sa upuaso tari toromi lena ken mat lakit, tuk ut ra in tama tar a Karisito anun a Labino.

²⁷A Tokodos na Nion i mugu i sur in ruk unin noworo na rumu na etabor. Ra i tama pas der suano der wanpat nama nat, o Iesu, sur der in pitar tari torom a Labino, elar nami ra di sa tumus tari una Warkurai.

²⁸O Simion i los pas o Iesu nama ru lamano, ra i watung wakak torom o God lenri,

²⁹“Labino, uniri un ulangolango ru iau, anum a tultul, sur an nan nama malmal, elar ut nama num a liliman torom iau.

³⁰A sa tama tar a Tene Ulaun namin matang, a Tene Ulaun ra u tulu ru i.

³¹U sa waninar tari umatan a kum kabotaro rop.

³²I a talapor sur in utalapor anum a kisapi torom det ra awu sur a taro Israel, ma sur a minamar torom anum a taro Israel.”

³³O tamano ma o nano der kisin doko una kum wasiso ra o Simion i watungi un o Iesu.

³⁴O Simion i watung udan detul, ra i watungi tan o Maria, o nan o Iesu, lena, “Tama i, a nat ri, o God i pilok pasi sur a susut na te Israel det in iru uni, ma a susut kai det in laun uni, ma sur a ukinalong ra a susut na taro det in rosumur gusuni.

³⁵Ra det in rosumur gusuni, in upuaso a kum nuknuk tagun a balandet. Ma ui, a tupunuk ra un taramo i in elar namin totok na inaim ra in so anum a nilaun.”

³⁶Ara ino bulung, a poropet, a risano o Ana, a nutun o Panuel, tagun a kabotaro Aser. I sa takano laulau, i sa tiwal na noino ma wat na kilalo anunu ma i ula mukut. Der nolin pas kut a wonom mawit na kilalo, ra numur anun a musano i mat. A ino ri ke wan taru gusun a rumu na etabor, i ser lotu una kum mirum ma a waspi, i ser wewel ma i ser wararing.

³⁸Una du bung utra, i wanpat torom detul, i watung wakak pas torom o God, ra i wasiso puaso una nat torom det rop ra det ser kis langlang sur o God in ulangolango pas a taro Jerusalem.

³⁹O Josep ma o Maria der sa pam sot pas a kum utna rop elar nama Warkurai anun a Labino, ra numur detul milet melet utong o Galili, sur anundetul a tamon, o Nasaret.

⁴⁰Ra a nat i labo pat nanan, ma i dekdek nanan, ma i bukus nama mananos, ma a marmaris anun o God i kis uni.

⁴¹Una kum kilalo rop o taman o Iesu ma o nano der ser wan usapat o Jerusalem una labino bung na lotu na Wanlakai.