LUKA 2:4-41

⁴Iosef danu Nasaret, Galilea kahana hanuana ta, amo ela, David ena hanua ladana Betelehem, Iudea kahana ai, e lasi, badina be ia na David ena iduhu tauna;

⁵unuseni ai ladana baine torea. Ia maohenina danu, Maria, ia ida ela; ia na vada e rogorogo.

⁶Bena raruosi unuseni ai e nohova ai na ena mara dinana e kau.

⁷Ia na e mara, mero roboana e abia, dabua amo e tarua, bena boromakau edia aniani patana ai e kurea, badina be henitao rumana lalonai asi gabuna.

⁸Mamoe ireḡudia taudia haida vahu ai e nohova, hanuaboi ai edia seri e gimadiava.

⁹Bena Lohiabada ena aneru ta ela, dekedekediai e gini, bona Lohiabada diaridiarina ese e hadiaridia heḡeḡe; bena gari bada ese e butudia tao.

¹⁰To aneru ese e hamaorodia, eto, Asio gari; hereva namona lau ese vada na mailaia, taunimanima iboudiai ihamoaledia.

¹¹Badina be ina harihari, David ena hanua ai, emui Hahemauri Tauna vada e vara, Keriso Lohiabada bunai.

¹²Toana binai: mero karukaruna ba ha davaria, boromakau edia ruma patana ai hekure, dabua ai e tarua.

¹³Bena guba anerudia hutuma bada hari aneru ida e hedinarai taku, Dirava e hanamoa, eto,

¹⁴Atai doriva-dorivana ai Dirava bae imodaia, Bona tanobada ai na maino, ena lalo-namo taudia ese bae abia.

¹⁵Aneru loḡora ese e rakatanidia, guba e lou henia, muridiai mamoe ireḡudia taudia e hereva heheni, eto, Ita na Betelehem aitala, Lohiabada ese vada e hadibada ḡauna baita itaia.

¹⁶Bena e raka haraḡa, ela, Maria bona Iosef e davaridia, bona mero karukaruna, boromakau edia aniani patana ai hekure.

¹⁷Mero e itaia, bena e kamonai herevana e gwauraia hedinarai.

¹⁸Bena e kamonai taudia iboudiai ese mamoe ireḡudia taudia edia hereva e hoalaia.

¹⁹A Maria na unu hereva iboudiai e haero bona e lalo tao.

²⁰Bena mamoe ireḡudia taudia e lou, Dirava e heatolaia, e imodaia, badina be e kamonai bona e ita ḡaudia na vada e hadibadia heḡereḡerena.

²¹Dina ihataurahanina ai, mero iperitomena negana ai, idia ese ladana e hatoa IESU, sinana do se rurua negana ai aneru ese e hatoa ladana.

²²Idia ihaḡoevadia dinadia, Mose ena taravatu heḡereḡerena, e ore, bena idia ese Ierusalem e laohaia, Lohiabada vairanai bae hahedinaraia totona;

²³Lohiabada ena taravatu ai e torea heḡereḡerena, eto, Roboa mamaruanedia iboudiai na hehelaḡa, Lohiabada ena.

²⁴Bona boubou ḡauna bae henia eto, Lohiabada ena taravatu heḡereḡerena, kerea rua eiava pune natuna rua.

²⁵Tau ta Ierusalem ai, ladana na Simeon; ia na kara maoromaoro tauna bona Dirava garina e gariva tauna; ia ese Israel edia tauhalo tauna e nariava, bona Lauma Helaḡa ese e rohea.

²⁶Lauma Helaḡa ese danu e hamaoroa, ia na basine mase ela bona Lohiabada ena Keriso do baine itaia.

²⁷Lauma ese Dubu Helaḡa lalonai e hakaua vareai, bena mero maraḡina Iesu na tamana sinana ese e rakalaia vareai, taravatu karana ibadinana totona.

²⁸Bena ia ese e abia, e rosia, Dirava e hanamoa, eto,

²⁹Lohiabada e, emu hesiai tauna harihari ome kahugu nege, Mai mainogu ida bainala, emu gwau-hamata heḡereḡerena;

³⁰Badina be matagu ese emu Hahemauri vada eme itaia,

³¹Oi ese vada o seua taunimanima iboudiai vairadiai.

³²Diari na binai, bese idauidau ihadiarilaidia. Bona oiemu bese Israel iheatolaidia.

³³Mero tamana sinana ese unu hereva e kamonai, e hoa.

³⁴Bena Simeon ese raruosi e hanamodia; bona sinana Maria e hamaoroa, eto, Ina mero na Israel taudia hutuma ihaketodia bona ihatore-isidia ai bainela; bona ia na toa ta taunimanima ese bae gwaua heiri.

³⁵Hutuma edia lalo-hadai hehunidia bae hedinarai; a oi lalomu dare ese baine daia uru.

³⁶Peroveta hahinena ta danu, ladana na Ana, Fanuel natuna, Asere ena iduhu hahinena: ia na hane badana, e headava, laḡani hitu adavana ida e noho bou,

³⁷murinai laḡani taurahaniahui hani vabuna ai e nohova. Ia ese Dubu Helaḡa se rakataniava, Dirava e toma henia dihova, e ḡuriḡuriva, e anivagava.

³⁸Una hora ai ia danu e kau, bena Dirava e hanamoa, bona Israel ihamaurina e nariava taudia Ierusalem ai mero herevana e hamaorolaidia.

³⁹Lohiabada ena taravatu karadia iboudiai raruosi ese e haḡuḡuru vaitani, bena Galilea e lou henia, edia hanua korikori Nasaret ela.

⁴⁰Bena mero na e bada, mai goadana bona mai aonegana ida, bona Dirava ena hariharibada na ia latanai.

⁴¹Laḡani iboudiai tamana bona sinana Ierusalem e laova, Lagau-hanai Ariana negadia.