Lukas 2:4-41

⁴Iosep ari pil kotila sang Nasaret nan Kaliläa, kotilang Iudäa nan kanim Petleem, me udan kanim en Dawid, pwe i kisan kadaudok en Dawid,

⁵Pwen wadawad iangaki Maria, me kisin nin ong i o me lisean.

⁶Kadekadeo ira lao kot wasa o, a ansau ap leler pwen naitik.

⁷I ari naitikeda na meseni men, ap kitimki pena likau en seri kai, o pwilikidi ong nan deun kamanga man, aki im en kairu a koitalar.

⁸Silepan sip kai mi nan sap o sinsila ar pwin sip ni pong.

⁹A kilang, tounlang en Kaun amen pwara dong ir, o lingan en Kaun dakar irail ada, ir ari masapwekadar kaualap.

¹⁰A tounlang o masani ong irail: Komail der masak, kilang, i wa dong komail rongamau, me pan kaperenda aramas karos.

¹¹Pwe Saunkamaur ipwidi ong komail ran wet nan kanim en Dawid iei Kaun Kristus.

¹²A iet kilel ong komail: Komail pan diar seri o a kidikidiki pena likau en seri o wonon nan deun kamanga man.

¹³A madang pwin en tounlang ngederenia mi ren tounlang o, me kapinga Kot masani:

¹⁴Kapinga ong Kot wasa ileile o sappa en popol; o aramas konekonelar!

¹⁵Kadekadeo tounlang kan lao kotila sang ir, kotidala nanlang, silepan sip akan ap inda nan pung arail: Kitail pan kola Petleem pwen kilang me wiauier wasa o, me Kaun o kotin kasale ong kitail er.

¹⁶Irail ari madangedo, ap diaradar Maria i Iosep o seri o, a wonon nan deun kamanga man.

¹⁷Irail lao kilanger, rap kalok sili me re kasokasoi ong ir duen kisin seri o.

¹⁸A karos, me rongadar, puriamuiki en silepan sip oko ar kasokasoi ong irail.

¹⁹A Maria nekinekid masan pukat karos o madamadauaki nan mongiong i.

²⁰O silepa ko puredo kalinganada o kapinga Kot duen karos, me irail rongadar o kilanger, duen a loloke dong irail er.

²¹Kadekadeo murin pong walu pong, ran en a sirkomsais, re ki ong mar a Iesus, duen me tounlang kotiki ong mon a kotin ipwidier.

²²Ran akan en a kamakelekel lao daulier duen kapung en Moses, ira ap wa dong i Ierusalem, pwen mueid ong Kaun o.

²³Duen a intingidier nan kapung en Kaun o: Meseni ol karos me saraui ong Kaun o.

²⁴O pwen kida mairong eu, duen me intingidier nan kapung en Kaun: Turtel muroi riamen de muroi pulepul riamen.

²⁵A kilang, aramas amen mi Ierusalem, mar a Simeon, iei aramas o me pung o masak Kot, o auiaui kapol pan Israel, o Ngen saraui kotikot re a.

²⁶A Ngen saraui kotin kasale ong i, me a sota pan mela, mon a pan kilang sapwilim en Kaun Kristus.

²⁷O Ngen saraui kotiki ong i, en kolang im en kaudok. A sam o in a lao walong ong nan im en kaudok seri o, pwen kapwaiada duen tiak en kapung o,

²⁸I ap koledi i kapinga Kot indada:

²⁹Maing, re kotin kasamo sapwilim omui ladu popol duen omui masan,

³⁰Pwe mas ai udialer omui kamaur,

³¹Me re kotin kauada sansal mon aramas karos.

³²Pwen marain eu, me kamaraineki men liki kan, o kalinganada sapwilim omui men Israel.

³³A sam a o in a puriamuiki meakan, me re indinda duen i.

³⁴Simeon ari kapai ir ada indang Maria in a: Kom kotin mangi, men et me sapwile dong kapupedi o kamaureda me toto ren men Israel, kilel eu, me re pan kaundenkoma.

³⁵Nan kodlas pan dokodi ngen omui, pwe mongiong en me toto en mulekiada.

³⁶O li saukop amen mia, mar a Ana, nain Panuel kisan kadaudok en Aser, me likailapalar, me papaud saunpar isu sang ni ansaun a makelekel.

³⁷I ari li odi men saunpar waleisok paieu tauer poa, ap sota kin pedoi sang nan im en kaudok, papa Kot kaisesol o kapakap ni ran o ni pong.

³⁸I me pil pwarado ni klok ota, kapinga Kaun o kasokasoi duen i ong toun Ierusalem karos, me auiaui saunkamaur.

³⁹Irail kanikiela karos duen kapung en Kaun o, re ap purelang Kaliläa nan kanim Nasaret.

⁴⁰A seri o kakairida, o ngenin, o dire kila erpit, o kalangan en Kot kotin ieiang i.

⁴¹Ni par karos sam a o in a kotilang Ierusalem iang kamadip en pasa.