4Galili prowinsgö taon qetŋi Nazaret miaŋgöreŋ azi qetŋi Josef malök. Yaŋgö amböŋi mi kiŋ Deiwid. Kiŋ Deiwidkö taonŋi qetŋi Betlehem mi Judia prowinsnöŋ ahöyök. Miaŋgöra Josefnöŋ Nazaret mosöta öŋgöba geba Betlehem anök.
5Anmam jiiga nalö miaŋgöreŋ ambi buŋaŋi qetŋi Marianöŋ gölömŋambuk malök. Maliga i auaŋgita qetŋiri ohomegöra mohotŋe anohot.
6Anda Betlehem aŋgorohotka Mariagö morö meme nalöŋan kam kuŋguyök.
7Kam kuŋguiga qenjarök ahöahö mire aŋgota miaŋgö uruŋe tiŋi qahö miwikŋaiyohot. Miaŋgöra bau bulmakau miriŋe öŋgöba tarohot. Tata miaŋgöreŋ nahönŋi mutukŋi memba oponöŋ esuhuba bulmakau joutŋe ali geba ahöyök. Mewö.
8Betlehem taon gölme miaŋgöreŋ azi tosatŋan suŋgem dop gölme köröŋi miaŋgöreŋ anda lama kambuŋini galöm köl eŋgiba malget.
9Mewö malgetka suŋgem miaŋgöreŋ Kembugö garata kunŋan kösutŋine asuhum eŋgiyök. Asuhum eŋgiiga Kembugö asakmararaŋan liliköm eŋgiba asariiga qem sömbuŋini möta jönömŋini unduyök.
10Jönömŋini unduyökmö, Suep garatanöŋ jii mötket, “Mönö kezap alget. Nöŋön sösöŋgai Buŋa ketaŋi ambazip körek pakpak yeŋgöra memba kazal, mi indel eŋgimam. Miaŋgöra jönömŋini kude unduma.
11Buŋa mi kewö: Eŋgö Amötqeqe Toŋinan dölki ahuza. Yaŋön kiŋ Deiwidkö taonöŋ asuhuba Kembu qetŋi Kraist akza.
12Keu miaŋgö aiwesökŋi kewö: Iŋini anda morö sepsep oponöŋ esuhuba bulmakau joutŋe alget ahözawi, mi miwikŋaime.”
13Garatanöŋ mewö jiiga miaŋgöreŋök garata kambu ketaŋan Suepnöhök kaŋgota yambuk aitoŋgöba Anutugö möpömöpösei liŋet köla kewö jiget,
14“Anutugö qetbuŋaŋi möpöseininga Suepnöŋ euyaŋgöreŋ öŋgöza. Yaŋön ambazip nanŋaŋgöra meköm eŋgiyöhi, yeŋgöra körö ölöwak möta gölmenöŋ luai al eŋgiza.” Mewö.
15Garata yeŋön eŋgömosöta Suepnöŋ liliŋgöba öŋgögetka lama galöm yeŋön naninak kewö jiget, “Ayop, Betlehem miaŋgöreŋ yuai ahuiga Kembunöŋ miaŋgö keuŋi jii mötzini, nini mönö mia anda ekin.”
16Mewö jiba ösumŋinan anda Maria Josef aka morösepsep bulmakau joutŋe ahöyöhi, miwikŋaiba eket.
17Eka kinda garatanöŋ morögöra keu jii möta kageri, mi indela jim asariget.
18Jim asarigetka mötkeri, yeŋön körek pakpak auruba welipköget.
19Welipkögetmö, Marianöŋ keu pakpak mi uru könömŋe ala dumgöba jöhöba könaŋi mötmöriba malök.
20Welipkögetmö, yuai pakpak Suep garatanöŋ jiyöhaŋgö dop asuhuyöhi, mi lama galöm yeŋön eka möta miaŋgöra Anutugö sösöŋgai liŋet köla möpöseiget. Möpöseiba mosöta liliŋgöba anget. Mewö.
21Jisös ahui Sonda mohot miaŋgö dop teköiga Anutugö aiwesökŋi sileŋe yandibingö nalöŋi kaiga qetŋi Jisös qetket. Suep garatanöŋ qet mi mutuk qeta waŋgiigun nalö miaŋgöreŋök namŋaŋgö gölöm uruŋe ahuyök. Mewö.
22Mosesgö Köna keunöŋ keu kewö ahöza, “Ambinöŋ morö nahönŋi mutukŋi memba silim 40 koumŋe mali teköiga sörö guluŋi köl könjörat waŋgiba iŋini mönö jöwöwöl jikenöŋ öŋgöba morö mi Anutugö jeŋe algetka yaŋgö buŋaya akŋa.” Miaŋgöra nalö mi kam kuŋguiga Josef Maria yetkön keu mi tem köla Jisös waŋgita Kembugö buŋaya akŋapköra Jerusalem öŋgöyohot.
23Kembugö Köna keunöŋ keu kewö ohoget ahöza, “Morö nahön pakpak sep mutuk mokozei, mi mönö Kembugö buŋaya akŋapköra qem teköba mem sarahime.” Yetkön keu mi wuataŋgöyohot.
24Mewöyök Kembugö Köna keunöŋ jimkutukutu keu ahözawaŋgö dop kembö me kembö supsup nei yahöt mi jöwöwöl ohomahotköra Jerusalem sitinöŋ öŋgöba anohot.
25Nalö miaŋgöreŋ azi kun qetŋi Simeon Jerusalem malök. Yaŋön uruŋi jömuk Anutugöreŋ qekötahöba urumeleŋgö kölguliguli aiga Uŋa Töröŋan yambuk kiniga Amötqeqe Toŋan Israel uruŋe asuhumapköra mamböta malök.
26Mamböta maliga Uŋa Töröŋan keu kewö indeli mörök, “Gi Kembugö Amötqeqe Toŋi Kraist ahui mutuk ekagun kömupkö sihimbölöŋi mötman.”
27Iwinamŋan Mosesgö Köna keu wuataŋgöba Jisös waŋgita jöwöwöl jikenöŋ öŋgöyohot. Öŋgöyohotka Uŋa Töröŋan Simeon sölölöhöi nalö miaŋgöreŋök mewöyök jikenöŋ öŋgöyök.
28Öŋgöba morö mi eka memba dohongöba Anutu möpöseiba kewö jiyök,
29“O Kembu, merak welen azigan ölöp anda uruluainöŋ mala kömuma.
30Göhö keugahö dop Amötqeqe Toŋi melainöŋ asuhuiga i nani jenan eka simbawoŋ mötzal. Miaŋgöra ölöp anda kömumam.
31Göŋön amötqeqegö könaŋi mözözömgöba kantri pakpak yeŋgöra indel eŋginöŋga mi eka möt kutume.
32Göŋön Amötqeqe Toŋaŋgö asakŋi indelnöŋga kian kantri yeŋgö uruŋini kuŋguiga asarime aka qetbuŋagan nangi könagesögi Israel neŋgö sutnine mewöyök qarima.”
33Simeonöŋ morögöra keu mewö jiiga iwinamŋan möta köŋkuŋ aka welipköyohot.
34Welipköyohotka kötuetköm eŋgiba namŋi Maria kewö jii mörök, “Mötnöŋ, Anutunöŋ morö ki kuŋguba ali Israel ambazip sehisehiŋan i andö qeba eta eŋgugetka gwötpukŋan uruŋini meleŋda ölöwakŋe. Anutunöŋ nanŋak i ali aiwesök aiga gwötpukŋan i tuaköpek jim waŋgime.
35Tuaköpek jim waŋgigetka urumötmötŋini asa-asambötŋan mewö aukŋe asuhuma. Nangi urugan mewöyök wösöbirik aiga miaŋön sou zuluk alalŋi ewö urugi kuŋguba qesiŋma.” Mewö.
36Jerusalem miaŋgöreŋ kezapqetok ambi namŋi kun qetŋi Ana malök. Yaŋgö isikŋi qetŋi Aser, iwiŋi qetŋi Fanuel. Ambi miaŋön seramŋe azi memba mali yambu (yara) 7 mohotŋe malohot.
37Malohotka apŋi kömui malö aka mala kori nalö miaŋgöreŋ yambuŋi 84 ahök. Yaŋön nalö dop jöwöwöl jikenöŋ öŋgöba mi silim kun qahö mosörökmö, suŋgem asak Anutugöra nene siŋgi mala köuluköba waikŋi memba möpöseiba malök.
38Yaŋön nalö miaŋgöreŋök kaŋgota morö mi eka Anutu möpöseiyök. Anutunöŋ Jerusalem ambazip sohopŋini memapköra mamböta malgeri, körek yeŋgöra morö miaŋgö könaŋi jim asarii mötket. Mewö.
39Josef Maria yetkön Kembunöŋ areŋi jim kutuiga Köna keunöŋ ahözawi, mi körek ahot teköiga Galili prowinsnöŋ liliŋgöba taonŋiri Nazaret miaŋgöreŋ anohot.
40Morönöŋ qariba wahöta köhöiba mötkutukutuŋi ahuba kokolak qeiga Anutugö kalem möriamŋan qakŋe öŋgöi kinök.
41Jisös iwinamŋan yambu (yara) dop ak-kömukömu kendon nalöŋe Jerusalem siti öŋgöba anjahotma.
Luk 2
Luk 2:4-41