Loma 10:9-17

⁹Embame embanya kambu dokome, “Jisasa baa Kamongo dokona,” lao lao panawapi, embanya mona dokome baa Goteme malunya sakatasiana lao masoo minawapi pitino kandao doko, emba pyoo nyepae katate.

¹⁰Doko, embanya moname masoo minilinopa Goteme emba tolataena lenge. Dee embame embanya masoo miningi doko kambumi lao panelenopa Goteme emba pyoo nyingi.

¹¹Gotenya pii pepa pyapae dokonya, “Baa lao masoo minatamino endakali dupanya mendaipi mende elya nakayatana,” lapae silyamo.

¹²Pii doko endakali dupa pitaka kandao lapae silyamo. Doko Jutapi tata waka dupapi tata dolaponya mende mendepale daa. Gote mendai doko naima pitakanya Kamongo. Baame opale epe dupa longo lao baa lao tee lenge endakali dupa maingi.

¹³Doko, “Kamongo lao kee latamino endakali dupa pitaka pyoo nyepae katatamina,” lapae silyamo.

¹⁴Dopaka doko, dupame baa lao masoo minala nayatamino kandao doko, aipa petala baa lao kee latamipi? Dee dupame baanya lao pii doko nasetamino kandao doko, aipa petala baa lao masoo minatamipi? Dee endakali mendeme dupa pii lamaiya nayatamo kandao doko, aipa petala setamipi?

¹⁵Dee endakali mendapuame pii lamaiya pena nalatamino kandao doko, aipa petala dupame pii lamaitamipi? Gotenya pii pepa pyapae dokonya, “Endakali dupame wai epe mende langyanya minao epelyami dupa kandao taeme ipamini lamo lao tama pingina,” lapae silyamo.

¹⁶Dopaka doko, endakali dupa pitakame Wai Pii Epe doko watao minala nayami. Dokonya Aisayame lao pituu, “Kamongo, naimame pii lamaiyamanopa siamino doko apimi masoo minao kalyapena?” lea-pyaana lapae silyamo.

¹⁷Dopana, pii singi dokonya masoo miningi doko pyakalyingi. Dee pii singi doko Kataisanya lao pii lamaingi dokonya singi.