Leviticus 8:4-36

⁴Midtuman ni Moises is insuǥù kandin te Nengazen, ne midtiǥum is menge Israilihanen diyà te ǥemawan duen te Tulda he Edtelevukaayan.

⁵Ne migkeǥiyan sikandan ni Moises he heini is ebeelan din, insuǥù kandin te Nengazen.

⁶Miduma zin diyà te teliwazà si Aaron wey is menge anak din, ne impepemeziǥù din sikandan.

⁷Ne impesul-ub din ki Aaron is bisti te lavew he memumuhat: is pendizalem he visti, is bakes, is pendivavew he visti, wey is ipud he mibpikitan te vakes he mibpurpurungan is kedhevela zuen.

⁸Ne impeseluub daan ni Moises diyà te ki Aaron is teleǥuey ziyà te kumeng, ne intaǥù din dutun is Urim wey Thumim.

⁹Ne impesuup din diyà te ulu ni Aaron is tengkulu, ne impikit din diyà te sineruwan dutun te tengkulu is bulawan he simbulu he mibpilì si Aaron he para te Nengazen. Mibeelan ni Moises heini is langun sumalà te insuǥù kandin te Nengazen.

¹⁰Ne migkuwa ni Moises is lana, ne mibpirikan din sikan is Tulda he Ed-ezapan wey is langun he netaǥù kayi. Su idhalad haazà he menge vutang diyà te Nengazen.

¹¹Kepipitu zin piriki te lana sikan is pemuhatà wey is langun he ǥelemiten dutun te pemuhatà, ne iring din ded daan is bisin wey is selevukà kayi. Mibeelan din heini su inhalad din heini he menge azen diyà te Nengazen.

¹²Ne mibpetiǥisan din te lana is ulu ni Aaron he paaǥi te kebpehinunguza kandin diyà te Nengazen.

¹³Ne miduma zin diyà te teliwazà is menge anak ni Aaron he menge maama, ne mibistiyan din sikandan te visti he para te memumuhat wey mibekesan heini. Midsul-uvan daan sikandan te menge kalù. Mibeelan heini ni Moises sumalà te insuǥù kandin te Nengazen.

¹⁴Ne kegkepasad dutun, impekuwa ni Moises is tudu he vaka he pemuhat he para idlumpiyu. Ne indampà ni Aaron wey te menge anak din is menge velad dan diyà te ulu zuen te vaka.

¹⁵Midlapà ni Moises haazà is baka ne migkuwa sikandin te lengesa kayi. Intiyuk din is tezù din duen te lengesa, ne mibpelisan din sikan is menge sungeysungey te menge suyuk te pemuhatà he iyan kedlumpiyuwi kayi. Ne in-itis dutun is nesamà he lengesa diyà te zizalem duen te pemuhatà. Iyan heini paaǥi te kebpehinunguza zin duen te pemuhatà diyà te Nengazen, su para mehimu heini he ereg he ebpekelibri te mekesesalà.

¹⁶Migkuwa zaan ni Moises is langun he tavà diyà te seled te ǥetek duen te uyaǥen, is deisey he vahin te atey, is menge vuwà ragkes is menge tavà kayi, ne midtutung din heini is langun diyà te pemuhatà.

¹⁷Is nengesamà he vahin duen te vaka iring te sapù, lundis, wey menge vituka, midtutung din diyà te ǥawas te kampu. Mibeelan heini ni Moises sumalà is insuǥù kandin te Nengazen.

¹⁸Kegkepasad dutun, impekuwa ni Moises sikan is meemahan he kerehidu he pemuhat he edtutungen. Ne indampà ni Aaron wey te menge anak din is menge velad dan diyà te ulu zuen te kerehidu.

¹⁹Midlapà ni Moises haazà is kerehidu, ne impirik din is lengesa kayi ziyà te peliǥuy te pemuhatà.

²⁰Midsapù din haazà is uyaǥen, ne midtutung din is ulu, is tavà, wey is duma he menge parti kayi. Midlùluan din is menge vahin he ziyà te seled te ǥetek wey is menge paa. Ne midtutung din diyà te pemuhatà is langun he parti zutun te uyaǥen he pemuhat he edtutungen. Is kehemut kayi he pemuhat te pinaaǥi te hapuy ne ebpekepenunuat te Nengazen. Mibeelan heini ni Moises sumalà te insuǥù kandin te Nengazen.

²²Ne impekuwa zaan ni Moises sikan is ikezuwa he meemahan he kerehidu. Heini he kerehidu pemuhat he para te kedhimuwa te memumuhat he memumuhat. Indampà ni Aaron wey te menge anak din is menge velad dan diyà te ulu zuen te kerehidu.

²³Ne midlapà ni Moises haazà is kerehidu, ne migkuwa sikandin te lengesa kayi, ne impalis din diyà te zizalem he vahin te kewanan he telinga ni Aaron, diyà te kewanan he tindezekelà te velad din, wey ziyà te kewanan he tindezekelà te paa zin.

²⁴Ne miduma zaan ni Moises diyà te teliwazà is menge anak ni Aaron he maama, ne mibpelisan din daan te lengesa is dizalem he vahin te kewanan he telinga zan, is tindezekelà te kewanan he velad dan, wey is tindezekelà te kewanan he menge paa zan, ne impirik din sikan is lengesa ziyà te peliǥuy zuen te pemuhatà.

²⁵Migkuwa zin is menge tavà, is melambù he ikug, is langun he tavà diyà te seled te ǥetek, is deisey he vahin te atey, is menge vuwà ragkes is menge tavà kayi, wey is kewanan he vuvun.

²⁶Ne migkuwa si Moises te tigselimbaha ziyà te kada kelasi te menge supas he wazè din tapey he intaǥù diyà te revan, ne impemuhat din diyà te Nengazen. Is migkuwa zin supas he mekepal he wazè din tapey, supas he midsehuǥan te lana, wey supas he menipis. Impetepayè din heini ki Aaron wey te menge anak din ragkes is langun he menge tavà wey sikan is kewanan he vuvun te kerehidu, ne imbayew zin heini ziyà te Nengazen su pemuhat heini he ibayew.

²⁸Ne kegkepasad te kebeyawa kayi, migkuwa heini ni Moises diyà te kandan ne midtutung din diyà te pemuhatà duma zuen te pemuhat he edtutungen. Pemuhat heini he para te kedhimuwa te memumuhat he memumuhat. Is kehemut kayi he pemuhat te pinaaǥi te hapuy ne ebpekepenunuat te Nengazen.

²⁹Migkuwa zaan ni Moises is kumeng duen te kerehidu, ne imbayew zin diyà te Nengazen su pemuhat heini he ibayew. Iyan heini ki Moises he vahin duen te kerehidu he pemuhat he para te kedhimuwa te memumuhat he memumuhat. Ne mibeelan ni Moises heini is langun sumalà te insuǥù kandin te Nengazen.

³⁰Ne migkuwa si Moises te lana he para te idlana wey lengesa he zuen te pemuhatà ne mibpirikan din si Aaron wey kes menge anak ni Aaron wey is menge visti zan. Pinaaǥi kayi impehinungud din sikandan wey is menge visti zan diyà te Nengazen.

³¹Ne migkeǥiyan ni Moises si Aaron wey is menge anak ni Aaron te, “Lutua niw ziyà te ǥemawan te Tulda he Edtelevukaayan sikan is usa, ne sumalà te insuǥù keniyu ne keena niw heini zutun duma zuen te supas he intaǥù te revan he pemuhat para te kedhimuwa te memumuhat he memumuhat.

³²Ne tutunga niw is egkesamà he usa wey supas.

³³Kenè kew awà dutun seled te pitu he andew, taman te egkepasad is kedhimuwa keniyu he memumuhat.

³⁴Iyan is Nengazen midsuǥù kenitew te kebaal kayi te ebeelan tew ǥuntaan, su para mevelukasi kew puun te menge salè niw.

³⁵Kinahanglan he kenè kew med-awà kayi te maandew wey mezukilem seled te pitu he andew, ne veeli niw is ebpeveelan te Nengazen su wey kew kenà mebpatey, su iyan heini migkaǥi te Nengazen kayi te kedì he ibpeveelan keniyu.”

³⁶Umbe, midtuman ni Aaron wey te menge anak din is langun he insuǥù te Nengazen pinaaǥi ki Moises.