Levitikus 8:4-36

⁴Me fol Moses rok SOMOL, ma nap’an ni mokun piyu Israel,

⁵me ga’ar ngorad, “Tin nggu rin’ e chiney e tin keyog SOMOL ni ngan rin’.”

⁶Me fek Moses Aron nge pifak ni pumo’on nga mit fare Tent nge luk nagrad ko ran.

⁷Me yin’ fare kenggin e mad nga daken Aron nge fare wuru’ e mad nib n’uw me m’ag fare gi leed nga lukngun. Me yin fare efod nga daken me m’ag ko fare gi leed ni kan lifith nrib fel’ u lukngun.

⁸Me m’ag nga daken ngorngoren fare gi mad ni fen ngorngorey me tay fare Urim nge Thummim nga langgin.

⁹Me tay fare turban nga lolgen, ma gin migid nga peri’ fare turban e tay fare madelia nib gol ngay, ni pow riy ni kemang tirok Got, nri bod rogon ni yog SOMOL ngak ni nge rin’.

¹⁰Ma aram me fek Moses fare gapgep ni fen e mathiy, nge liyef nga daken fare Tent u p’eowchen SOMOL nge urngin e tin bay u langgin, ni aram e ke pi’ e pin’ey ni gubin ngak SOMOL.

¹¹Miki fek boch ko fare gapgep nge atngin ni medlip yay nga daken fare altar nge gubin tatalin nge nga daken fa raba’ i dabiy nge ay u but’, ya aram e be pi’ e pin’em ngak SOMOL.

¹²Me pu’og boch fare gapgep ni fen e mathiy nga daken lolgen Aron.

¹³Ma bin migid e fek Moses fapi pumo’on ni fak Aron nga m’on nge yin’ fapi kenggin e mad nga dakenrad, me m’ag fa yungi leed nga lukngurad me bachiy fa yungi mad nga daken lolgurad, nri bod rogon ni tay SOMOL chiylen.

¹⁴Ma aram me fek Moses fare fak e garbaw ni pumo’on nib maligach ni fan ko denen, me tay Aron nge fapi pumo’on ni fak pa’rad nga daken lolgen fare gamanman.

¹⁵Me li’ Moses fare gamanman nge yim’ me fek boch i racha’en nga bugili pa’ nge thiy ko fapi gagey u tabthungen fare altar, ni aram e be ognag ngak SOMOL. Me pu’og e tin ke aw ko fapi racha’ nga enggin fare altar, aram rogon ni machalbognag me pi’ ngak SOMOL.

¹⁶Me fek Moses gubin fapi mam ni immoy u gil’iggan fare gamanman nge gin nth’abi fel’ ko ad riy, nge fa gali bu’oy riy ni kabay e mam nib ing, me urfiy ni gubin u daken fare altar.

¹⁷Me fek e tin kabay ko fare garbaw ni pumo’on, nib mu’un keru’ ngay, nge ufin riy, nge gil’iggan, nge urfiy u wuru’ fagin ni be par yu Israel riy, nri bod rogon ni tay SOMOL chiylen.

¹⁸Me migid me fek Moses i yib ba fak e saf ni pumo’on ni nge mang maligach ni mo’oruf, me tay Aron nge fapi pumo’on ni fak pa’rad nga daken lolgen fare saf.

¹⁹Me li’ Moses fare gamanman nge yim’ me pag e racha’ riy nga downgin fa aningeg i tabthung ko fare altar.

²⁰Me theth’ab fare fak e saf ni pumo’on nge yuyang, me luknag ko ran gil’iggan nge ay ni l’agruw raba’, me urfiy lolgen, nge mam riy nge gubin yang ko fare gamanman u daken e altar, nri bod rogon ni yog SOMOL. Re maligach ni mo’oruf ney e ba maligach ni ggan, ma bon e rib magan’ SOMOL ngay.

²²Ma aram me fek Moses e bin l’agruw e fak e saf ni pumo’on i yib, ni ngan fanay ko fapi prist ni ngan yiblayrad, me Aron nge pifak ni pumo’on e ra ted pa’rad nga daken lolgen fare saf.

²³Me li’ Moses nge yim’ me fek boch e racha’ riy nge thiy nga ba’ ni mat’aw i yuwantel Aron, me thiy boch nga bugul ni ga’ i pa’ ko ba’ ni mat’aw, miki thiy boch nga bugul ni ga’ i ay ko ba’ ni mat’aw.

²⁴Ma aram me fek pifak Aron ni pumo’on nga m’on nge thiy boch e racha’ nga ba’ ni mat’aw i yuwan telrad, nge bugul ni ga’ u ba’ ni mat’aw i pa’rad, nge bugul ni ga’ u ayrad u ba’ ni mat’aw. Ngemu’ me pag Moses e tin ke aw ko fapi racha’ nga downgin fa aningeg i tabthung ko fare altar.

²⁵Me fek pachan fare gamanman ni go’ mam, nge urngin e mam nib ing gil’iggan, nge gin th’abi fel ko ad riy, nge fa gali bu’oy riy ni kabay e mam nib ing, nge ba’ ni mat’aw i ay.

²⁶Me fek reb e flowa ni lof u lan fare dug ni bay fapi flowa riy nlith ndariy e is riy ni kan mu’ i pi’ ngak SOMOL, ni reb e lof ni kan lith ni bay e gapgep riy, nge ba kek nib gilgith, me tay nga daken fapi mam nge fa ba’ ni mat’aw i ay.

²⁷Me tay urngin e pi ggan ney ngalan pa’ Aron nge fapi pumo’on ni fak, mar pi’ed ngak SOMOL nib tow’ath nib mal’eag.

²⁸Ma aram me fek Moses fapi ggan ni bay u pa’rad nge urfiy u daken fare altar, u daken fare maligach ni mo’oruf, ni aram fare maligach ni fen e pigpig ko fapi prist nma yiblayrad. Ran’ey e ba maligach ni ggan, ma bon e m’aguwan’ SOMOL.

²⁹Me migid me fek Moses fare gi ufin u daken ngorngoren fare gamanman nge pi’ ngak SOMOL nib tow’ath nib mal’eag. Ireram e f’oth rok Moses ko fare madnom ni ngan yiblay e pi prist. Me rin’ Moses urngin ban’en nri bod rogon ni yog SOMOL.

³⁰Me fek Moses boch ko fare gapgep ni fen e mathiy nge boch ko fapi racha’ ni immoy u daken e altar nge atngiy nga daken Aron nge fapi pumo’on ni fak nge nga daken e mad rorad. Ya ara’ rogon ni yima bangbengnag ma aram e kan og nagrad nge mad rorad ngak SOMOL.

³¹Me ga’ar Moses ngak Aron nge fapi pumo’on ni fak, “Mu feked fapi ufin nga langan e mab ko fare Tent u p’eowchen SOMOL, mu dulnguyed, mi gimed kay ngam th’aged ko flowa ni bay u lan fare dug ni fen e maligach ni yima pi’ nnap’an ni yibe yibley be’ ni nge mang prist, nri bod rogon ni yog SOMOL.

³²Mu urfiyed e ufin nge flowa nike magey.

³³Dab mu chuw u langan e mab ko fare Tent ni medlip e rran, nge taw ko ngiyal’ nike lebug mat’wum ni ngam mang prist.

³⁴Tin kug rin’ed e daba’ e SOMOL e keyog ngomad ni nggu rin’ed; ni bochan e nge chuw e denen romed.

³⁵Thingar mu pired u langan e mab ko fare Tent ni rran nge nep ni medlip e rran, ni gimed be rin’ e tin ni yog SOMOL. Ya fa’anra dangay, ma gimed ra yim’. Irera’ e n’en ni yog SOMOL ngog ni nggu rin’.”

³⁶Ere Aron nge pi pumo’on ni fak e rrin’ed urngin e tin keyog SOMOL u daken Moses ni ngan rin’.