Leviticus 24:8-15

⁸Kinahanglan he layun idsavuk heini is menge supas diyà te etuvangan te Nengazen kada Andew te Kedhimeley. Ketengdanan niw heini te menge Israilihanen taman te taman.

⁹Heini he menge supas, ne para ki Aaron wey te menge kevuwazan din. Egkeenen dan heini ziyà te segradu he lugar zutun te Tulda, tenged te utew heini segradu he vahin te menge pemuhat. Ne para heini kandan taman te taman.

¹⁰Duen sevaha he etew he is amey zin Ehiptohanen ne is iney zin Israilihanen. (Is ngazan te iney zin iyan si Shelomit, he anak ni Dibri te ebpuun diyà te tribu ni Dan.) Nekidtebek heini he etew te sevaha he Israilihanen diyà te kampu, ne midsumpalit din is ngazan te Nengazen. Umbe mid-uwit dan haazà diyà te ki Moises,

¹²ne mibpirisu zan haazà taman te egketuenan dan ke hengkey is egkesuatan te Nengazen mehitenged dutun he etew.

¹³Ne migkaǥi is Nengazen diyà te ki Moises te,

¹⁴“Uwita niw ziyà te ǥawas te kampu sikan is etew he midsumpalit kedì. Is langun he nekezineg te kedsumpalit din ne izampè dan is belad dan diyà te ulu zin he tuus te zuen din televaken, ne kegkepasad ne ebpenulengen sikandin te vatu te tivuuk he menge Israilihanen.

¹⁵Ne keǥiyi nu is menge Israilihanen he minsan hentei kandan wey is kenà menge Israilihanen he mid-ubpà duma kandan he edsumpalit kediey wey ebpendezeisey te ngazan ku, ne zuen din televaken. Kinahanglan he ebpenulengen sikandin te vatu te tivuuk he kezekelan taman te ebpatey.”