Leviticus 19:14-20

¹⁴Kenè niw keǥiyi te mezaat is bengel, wey kenè kew medsavuk te egkesipà diyà te ibayà te lakap. Tumana niw heini su ibpekilala niw is kedtehuza niw kedì. Iyan a kes Nengazen.

¹⁵Kinahanglan he meketezenganen wey hustu is kedhukum niw ziyà te hukmanan; kinahanglan he wazè niw ibpelavi, sepian etawa pubri.

¹⁶Kenè kew ituk te zuma niw he etew. Kenè kew vaal te minsan hengkey he ebpekezezaat te untung din. Iyan a kes Nengazen.

¹⁷Kenè niw dumuti is duma niw he etew. Dewaya niw sikandin emun nekesalà sikandin su para wazè niw televaken.

¹⁸Kenè kew penimales etawa dumut te zuma niw he etew, kekenà, mahala niw sikandin iring te kebmahala niw te keugelingen niw. Iyan a kes Nengazen.

¹⁹Tumana niw is menge sulunuzen he ibpesunud ku. Kenè niw pepeniwelayi is sevaha he uyaǥen te selakew en he kelasi te uyaǥen. Kenè kew pemula te zezuwa he kelasi te venì diyà te sevaha zà he pemuleey. Kenè kew sul-ub te sevaha he visti he zezuwa he kelasi te manggad.

²⁰Emun is sevaha he maama ebpekidhilavet te sevaha he uripen he vahi he ed-esewaan en te sengememaama, piru heini is bahi wazè pa mevelukasi te kegkeuripena kandin etawa wazè pa meveǥayi te vayàbayà, kinahanglan he edsilutan sikandan. Piru kenà sikandan edhimetayan su kenè pe man ebpekevayàbayà haazà is bahi.