Kiŋ 1 22:9-17

⁹Go Ahab gêmôêc laumata teŋ ma kêsôm gebe “Naôkôc Imla latu Mikaia êmêŋ sebeŋ.”

¹⁰Kiŋ Ahab agêc Jehosapat tonêŋ gêlôŋ kiŋŋa sêŋgôŋ nêŋ lêpôŋ, taŋ kêkô gamêŋ sêsac mopolomŋa aŋga malac Samaria ŋasacgêdô naŋ, ma propete samob seoc biŋ lasê sêmoa êsêagêc laŋôŋnêmŋa.

¹¹Ma Kenan latu Sedekia kêmasaŋ jabo ki luagêc kêtu tauŋa ma geoc biŋ lasê gebe “Apômtau kêsôm amboac tonec gebe ‘Aôm oc ôsuc lau Suriaŋa piŋpaŋ ŋa jabo tonaŋ e sênaŋa.’”

¹²Ma propete samob têdaguc ênê biŋgeŋ ma sêsôm gebe “Ôpi Ramot-Gilead ôna ma ôku malac tau tulu. Apômtau oc êkêŋ malac tau êsêp aôm lêmam.”

¹³Ma ŋacjaeŋ, taŋ gêja gebe êmôêc Mikaia naŋ, kêsôm gêdêŋ eŋ gebe “Ôŋô acgom, propete samob tomalageŋ seoc biŋ ŋajam lasê gêdêŋ kiŋ. Amboac tonaŋ aôm ôsôm êtôm êsêac sêsôm ma ôsôm biŋ ŋajamgeŋ.”

¹⁴Mago Mikaia kêsôm gebe “Apômtau gêmoa mata jali, tec biŋ, taŋ Apômtau êsôm êndêŋ aê naŋ, aê oc jasôm lasê.”

¹⁵Gêdêŋ taŋ gêô lasê gêdêŋ kiŋ naŋ, kiŋ tau kêsôm gêdêŋ eŋ gebe “Mikaia aêac oc ana Ramot-Gilead gebe anac siŋ me ênêcŋa.” Ma eŋ gêjô ênê biŋ gebe “Ôpi ôna ma ôku tulu. Apômtau oc êkêŋ malac tau êsêp aôm lêmam.”

¹⁶Mago kiŋ gêjô ênê biŋ gebe “Aê janac biŋsu aôm êtu dim tendocgeŋ gebe aôm ôsôm biŋŋanôgeŋ êndêŋ aê ônam Apômtau laŋô.”

¹⁷Ma Mikaia gêjô eŋ awa gebe “Aê galic lau Israel sêc êliŋ-êliŋ aŋga lôc amboac domba, taŋ ŋacgejobmê naŋ, ma Apômtau kêsôm gebe ‘Êsêacnêŋ ŋatau masi, samob sêmu sêna nêŋ andu towamageŋ.’”