Kawandila 1:1-17

¹Dawuda xa di Darisalamu mangɛ xa kawandi nan ya:

²Duniɲa findixi fe fufafu nan na. Duniɲa fee tide yo mu na, na birin findixi fuyan nan na. N tan kawandila xa masenyi nan nan ki.

³Adamadi geeni mundun sɔtɔma a xa wali ma soge bun ma?

⁴Ndee faxama, ndee barima, duniɲa fan na kɛɲa keren lɔxɔɛ birin.

⁵Soge tema, a goroma, a man gbilen a texi dɛnnaxɛ.

⁶Foye fan minima, a sigama yirefanyi ma, a a mafindima kɔɔla ma. A na gɛ mafindide, a man gbilen a kelide.

⁷Xure birin xun tixi baa nan na, kɔnɔ baa mu rafema. Xuree kelima dɛnnaxɛ, e man gbilenma mɛnni nɛ.

⁸Fe birin ɲɛrɛma, a mu taganma, a mu masarama. Adama ya mu wasama fe matode, a tuli fan mu lugama fe ramɛde.

⁹Naxan bara dangi nu, na nan man gbilenma a ra. Naxan bara raba nu, na nan man nabama. Fe nɛɛnɛ mu rabama duniɲa ma naxan ɲɔndɔn mu nu raba.

¹⁰Fe nɛɛnɛ yo mu na naxan a niyama mixi xa a fala, «Yi mato, fe nɛɛnɛ na a ra!» N xa a fala wo bɛ, na fe mɔɔli ɲan nu na beenun won tan xa bari.

¹¹Ɲama mu ratuma fe dangixi ma, fe naxan sa fama rabade, ɲama nɛɛmuma nɛ na fan na.

¹²N tan Kawandila, n bara findi mangɛ ra Isirayila bɔxi ma Darisalamu.

¹³N natɛ tongoxi nɛ, fe naxee birin nabafe yi duniɲa ma, n xa e mato a fanyi ra. Na kui n a to nɛ a Ala kote xɔrɔxɔɛ nan saxi adamadie fari.

¹⁴N bara wali birin mato naxan nabama yi duniɲa ma. Fufafu na a birin na! Birafe na wali fɔxɔ ra, a luxi nɛ alɔ mixi na birafe foye nan fɔxɔ ra.

¹⁵Naxan kuntinxi, na mu nɔma matinxinde, naxan luxi, na mu nɔma kamalide.

¹⁶N naxa a maɲɔxun n yɛtɛ ma, a n tan bara lɔnni fen dangi Darisalamu mangɛ birin na, naxee singe fa n tan yara. N bara lɔnni nun fe kolonyi gbegbe sɔtɔ duniɲa xa fe ma.

¹⁷N naxa natɛ tongo n xa xaxilimaya nun xaxilitareɲa fan mato. Kɔnɔ n bara a to na fan luxi alɔ birafe foye nan fɔxɔ ra.