Kɛɛwotiiti 9:1-32

¹Naama ziɛsu, Sɔle ɠɛni ba nɔ, é ɗa maalua vaiti ta nu ʋaa vai wo Maliɠii ná-kaladopoiti daalɔɠɔma. É liini zalaɠa ɠula ɠundiɠi wolai ʋɔ bɛ,

²é sɛʋɛa ɠaiziɛ zea, teʋegai Damase ƓALA dɛbi ʋɛlɛi wu nuiti ma, ga ni a nu nɔpɛ kaana, zunu ɓaa anzanu, é kidaaleʋe ʋele niinɛi naa ma, é gili, é ʋaa la Zeeluzalɛme.

³Kɛai ma pelei zu, é ɗa li, maaɓuɠaai ma Damase ʋa, gaamago nɔ wozakalagi ta ɠulani geeɠɔlɔgi zu, é ɗa volo maaɠoolii zu.

⁴É looni zooi ma, é wooi ta mɛnini, é ɗa toli, é ɗa ɠɛ ma: «Sɔle, Sɔle, lee vaa zu è wɔ̀inzeɠezu?»

⁵É ɠɛni naa ma: «Ɓɛ ɠa ga ɗe, Màliɠii?» Naa ɠɛ ma: «Nà ɠa gè ga Yesu, nii è wɔ̀inzeɠezu.

⁶Kɛlɛ wuzeɠe, è lɛ taa zu, ta naa wo è ma, nii ɗa kɛ.»

⁷Siɛɲɔɠɔiti ti loni, ti laavɔ kpaan, ti la zooni ti ʋa woo ɠila kpalaa bo, ti ɠɛni wooi mɛnisu, kɛlɛ ti la ɠɛni nu nɔpɛ kaazu.

⁸Sɔle wuzeɠeni zooi ma, gaazuzeɠeni ma, kɛlɛ é la ɠɛni wozaɠaazu. Ti soni zeei ʋa, ti lii la Damase.

⁹É kɛɛni ga folo saʋagɔ, é la wozaɠaazu, é la laamiizu, é la ɓɔɔlezu.

¹⁰Tama kaladopoi ta ɠɛni Damase, daaseigi ga Ananiase. Maliɠii tolini, é ɠɛ ma: «Ananiase!» É gooɠaaʋote, é ɠɛ ma: «Nà ɠaa, Màliɠii!»

¹¹Maliɠii ɠɛni ma: «Wuzeɠe, è li ga koiyɔɠɔzu ʋelei nii daaseigi ga ‹Sɔlegai,› è wɛlɛ Zudase ná-pɛlɛi wu ga zunui nii daa ga Sɔle, Taalese nui, mazɔlɔɔ toɠa GALA falizu.

¹²Tama é zunui ta ɠaaʋɛ kulakɛlɛmai zu, daaseigi ga Ananiase, é ɗa lɛ pɛlɛi wu ga é yeela ma, nii a kɛ gaazuʋɛ zeɠe ma.»

¹³Ananiase ɠɛni ma: «Màliɠii, gè mɛniga nu mɔinmɔin da, ga zunui naa faa ɲɔu mɔinmɔin kɛa ga ɗa-nuiti Zeeluzalɛme taazuʋɛ.

¹⁴Naa ʋoluma, zalaɠa ɠula ɠundiɠiiti ta-zobogi ɠa zea ʋɛ, nii a kɛ é naati gili, zɔiti nɔpɛ a ti ɠa, ti ɗa wooɠula GALA ma è-laaseigi zu.»

¹⁵Kɛlɛ Maliɠii ɠɛni ma: «Li, tɔɔzei zunui nuu ɠa ga aniɲakai nii gè yiimazeɠeai la, nii a kɛ é dàaseigi ɠula kɛlɛma zii ɠiligiti bɛ, ta masagiti, naa ʋɛɛ Izelayɛle nuɓusɛiti ba.

¹⁶Nà ɓɔɠɔi, nà ʋaazu dɛɛzu la, ʋelei é ʋaazu ɓɔlɔzu la bɛ̀.»

¹⁷Ananiase liini, seeliai ma pɛlɛi wu, é yeelaani Sɔle ma, é ɠɛ ma: «Kɛ̀ɛloun Sɔle, Maliɠii Yesu, nii kulaai è ʋɛ kɛlɛma pelei zu, nii è ʋaai la, naa ɠa é tèʋegai ga è-ɠaazuʋɛ zeɠe ma, ta è laave ga Zɛnvu Ɲadegai.»

¹⁸Gaamago nɔ, é ɠɛɛni eɠɛ ani ɠalaiti ta ɠula Sɔle ɠaazuʋɛ, ti loo, gaazuʋɛ zeɠe ma. É wuzeɠeni, é ɓatize.

¹⁹É daamii wogai ma, é zɛbɛi zɔlɔɔni. É foloi tanigaa ɠɛɛni kaladopoiti ba, niiti ti ɠɛni Damase.

²⁰É tɔɔzeini gaamago ga Yesu ná-fai laazeeli GALA dɛbi ʋɛlɛiti bu, é ɗa ɠɛ ma: «Yesu ɠa é ga GALA Doun Zunui.»

²¹Zɔiti pɛ ti ɠɛni goomɛnisu, ti laavɔɔni, ti ɗa ɓɔɠɔ ɠaazaɠa ga: «Nii lɛi é ɠɛa naama nuiti wɔinzeɠezu Zeeluzalɛme, niiti ti GALA tolisu daaseigi nii zu? Kɛbɛ, paa ungi ɠa nɔ ga é naama nuiti gili, é li ga tiye zalaɠa ɠula ɠundiɠiiti pɔ, kɛlɛ?»

²²Kɛlɛ folo-o-folo Sɔle ná-kala gooi zɛbɛi ɠɛni ɓaaɠozu: Zuifui niiti ti ɠɛni Damase, ti la mɔ ɠɛni kwɛɛ nii ta bo, tɔɔzei é ɠɛni dɛɛzu ga tiye ga Yesu ɠa é ga Kilista.

²³Yeeɠɛɠala zuɠooza teʋegai ma, Zuifuiti ti ɓɔɠɔ leveni ga ti paa.

²⁴Sɔle faa ɠwɛɛni ta-yaava vai zu. Ti ɠɛni wɛlɛzu vɔlɔ taa ziɠidaʋɛti ma, folo ʋɛɛ kpidi ʋa, nii a kɛ ti paa.

²⁵Kɛlɛ, ná-kaladopoiti ti seɠeni ga kpidii, ti da kpɔlɔgi zu, ti zei ga siɠigi ʋolu ʋelei.

²⁶Sɔle zeeliai ma Zeeluzalɛme, é kɔɠɔni ga é ʋɔ pɛɛ kaladopoiti ba, kɛlɛ ti pɛ ti ɠɛni luazu ba, ti la ɠɛni laani da ga é ɠɛa ga kaladopoi ta.

²⁷Ɓalanaɓase seɠe ʋele ɠana, é lii la keelaiti pɔ bɛ. É naa kpein suɠulani ti ma, ʋelei Maliɠii ɓɔɠɔ lɛɛni la ga Sɔle pelei zu, é ɓɔɛ pɔ, ta ʋelei Sɔle GALA daawooi laazeelini la ga ladalai Maliɠii Yesu laaseigi zu Damase.

²⁸É zo naazu ma niina, ta naati ti ɠɛni lɛɛzu, ti ɗa yei Zeeluzalɛme taazuʋɛ, é ɗa GALA daawooi laazeeli ga ladalai Maliɠii laaseigi zu.

²⁹Zuifui niiti ti Gɛlɛke wooi wosu, ta naati ti ɠɛni yɛpɛzu, ti ɗa ɓɔɠɔ maaɠaali, kɛlɛ naati ti ɠɛni paa ɠeleɠele gaiziɛzu.

³⁰Kidaaleʋe nuiti ti naa zuɠwɛɛgai ma, ti liini la Seezalee, ti teʋe Taalese.

³¹Ziilɛigi ɠɛni Zudee Egilisii pɛ su, ta Galilee, naa ʋɛɛ Samali ʋa, é ɠɛni wɔɔlɔzu kidaaleʋei zu, é ɗa ziɛ ɓɔɠɔmaayeii zu Maliɠii ʋɛ, gaa ɠɛni wɔɔlɔzu ga nui liegɔi, nii é ɠɛni ʋɛɛzu ba ga Zɛnvu Ɲadegai ná-kpɔbai.

³²Tɛi Piyɛlɛ ɠɛni leʋesu zooi zu ná pɛ, é zeelini ɓalaa kidaaleʋe nuiti pɔ bɛ, niiti ti ɠɛni Lida taazuʋɛ.