Mantá Tanla 9:1-32

¹Aman junnasa Saulo mantimini Miya Jesucrístobe penenaminlaca duque pa canenaminue. Tsaracari toteyanaequesiri pato nenaminue. Tsan jominnan israelítalachi mantá tan patelechica jito,

²yabe rocainue donun pilaca cuwasa. Junni donun pila casi, Damasco puebloca jinaminue. Jun puebloca jito, Diosichi fiqui miinun yabi ya donun pilaca mancuwano jominue. Junto Jesucrístobe penenaminlaca neyato féto catori, mantanjino jominue jun patelechi donun pilachi. Jesucrístobe penenaminlaca cato, Jerusalenca doquebi mantanjino jominue unilalacanan, sonalacanan.

³Junni aman Saulo Damasco pueblo quelobi jinasa, jamochi nechi tiri cuwenta duque tsequiniquinue yachi awinta.

⁴Junni Sáulori tobi queereito, fiquica meránue. Itsantinue: —Saulo, Saulo, ¿nuri laca ti quichun seiton quinayun? tinue.

⁵Ya fiquica merasi, Saulo itsantinue: —Miya, ¿nuri moyun? tinue. Junni beconan pato itsantinue: —Jesúyoe tinue. ¿Ti quichun laca seiton quinayun? tinue. Laca seiton quinato, nu tencachiquenan fécari padeseinae tinue. Nuri calu chide teyanca terachi quimin cuwenta jochunae tinue.

⁶Junni Saulo duque wepanachi jowinponato itsantinue: —Miya Jesús, ¿la ti quino jowan? tinue. Junni Miya Jesucrístori Sáulobenan itsantinue: —Mancupato, puebloca jide! tinue. Junbi tsachi manca nube cuenta quichunae tinue ti quino jonunca.

⁷Tsanhinasanan, Sáulobe pejinaminla jelechi pano podeitulajonue. Fiquica meránato, mocanantiya quiratulajonue.

⁸Junni Saulo tobi nechi mancupato, caca mantsetonan, quirano podeiton inue. Junnan yaca tedele cato Damáscoca tanjilainue.

⁹Junni peman ma fecári quirano podeiton, ano fitumin, pi cuchitumin, jominue.

¹⁰Tsan josanan Damáscobi manca tsachi chuminue Ananías mumun. Yanan Jesucrístobe penenamin jominue. Junni Ananíachi quirajanasa Miya Jesucrístoca quiranue. Junni Jesucristo yabe pato, Ananías tinue. Junni Ananíari Miya tinue. Ina chuyoe tinue.

¹¹Junni Miya Jesucristo Ananíabe quiraito, itsantinue: —Nuri cupato, Júdachi yaca jide! tinue. Ya Júdari Derecha tinun cayebi chue tinue. Junchi jito, Saulo tinunca panhade! tinue. Ya Saulo Tarso pueblobi nechi joe. Yari tsaina labe rocainae tinue.

¹²Junni Sáulonan labe rocainasa, yachinan quirajaca joe tinue. Yachi quirajanasa, nuca janaminca quiraca joe. Nu yaca tedechi tale quebi janaminca quiraca joe tinue. Junni nu yaca tale quinunsi, Saulo manquirano podeichunae tinue. Sáulochi tsanque quirajaca joe tinue.

¹³Junni Jesucristo yabe tsantica josa, Ananíanan beconan pato itsantinue: —Miya Jesús, ya Sáulori seiton joe tinue. Yaca duque mera joe tinue. Jerusalenbi nuchi sen tsachilaca duque padeseisa carinaminue latie tinue.

¹⁴Junni in pueblocanan jato, mantá tan patelelachi mantate jaca joe tinue nube rocaiminlaca cato jera dochun.

¹⁵Miya Jesús mantimini Ananías tsantinunca tennatuto, yabe itsantinue: —Nuri jiniide! tinue. Lari Sáuloca wentecayoe tinue. Yari laca cuenta polarimin jochunae. Uyan tobi chuminlabe, mantaminlabe, israelítalabenan laca cuenta polarimin pejochunae tinue.

¹⁶Yaca micarichinayoe tinue yanan lachi tenchi duque padeseino joeque.

¹⁷Junni Jesucristo tsantinunsi, Ananíari Júdachi yaca jinue. Junbi fesi, Sáuloca tedechi tale quito itsantinue: —Aco Saulo, ¿nu janaminbe Miya Jesús quirainuco? tinue. Aman lanan Jesuchi joyoe tinue. Junni Miya Jesús ereca jun jayoe tinue yape nu manquirano podeisa. Junsi Diosichi Tencanan nuchibi jera pewichunae tinue.

¹⁸Junni Ananías cuenta quinasaleri, Sáulochi cacabi nechi liquinan quiran bajinue. Tsanhinunsi manquirano podeinue. Junto mancupasi mumunhinue.

¹⁹Junsi ano manfitobi, mansonbainue. Junni Damasco pueblobi Jesucrístochi tsachilabe nasi pechuminue.

²⁰Junni Saulo mansonbaisi, israelítala tala Diosichi fiqui miinun yabi winue. Junbi Jesuca paca fiquica micarinaminue Diosichi Nao joeque.

²¹Aman junni junbi chuminla Saulo pánanunca meráto, jera wepanalaito itsantilatinue: —¿Inni Jesucrístoca pa jomin tsachi jotun? latinue. Aman yari Jesube rocaiminlaca Jerusalenbi duque seiton quinaminue. Inchi janatonan, yalaca cabi janaminue tilatinue mantá tan patelelachica mantanjichun. Tsan jotori, ¿niyaito Jesucrístoca paca fiquica micariniquinan? latinue.

²²Tsanlatinasanan Sáulori fe seque pade pade jiniinaminue. Damáscobi chumin israelítalari yaca meráto, beconan manpano podeilaitunue. Tenca jera palaicala joto podeilaitunue. Saulo mantimini seque micarinaminue Jesús Diosi wenteca Cristo tinun tsachi joeque.

²³Junni Saulo numari micarinasanan, israelítala tenpalaquinue yaca totechun.

²⁴Junni aman jun pueblo awinta wa serica jominue tamo cuwenta. Junni israelítala jun serica tamolante quirato Sáuloca méraminlanue. Quepen, malon méraminlanue Sáuloca cato totechun. Saulo mantimini junca jera meránue.

²⁵Junni Jesuchi tsachilari yaca se larilaquinue yape totelaquitusa. Quepen nosa epele jun pueblobi nechi manlarilaquinue. Tsalabi poto, serica urachi manpatarilaquinue.

²⁶Aman Sáuloca manlarilaquinan, Jerusalenca manjinue. Junbi Jesuchi tsachilabe layaichique tenfenasanan, yalari jelechi facaritulajonue. Nene joe tito, Jesucrístochi tsachi iton jonhoe tilatinue.

²⁷Bernabé mantimini Sáuloca cato, Crístochi mantá tanlachica tanjinue. Junchi tanjito, Crístochi mantá tanlabe itsantinue: —In Saulo minuse jinasanan Miya Jesús yabe quiraito cuenta quinue tinue. Junni Damasco pueblobi Jesuchi mantate seque jeleratuto micarinaminue tinue.

²⁸Junni Bernabé tsantinunbi, Saulo Jerusalenbi pechuto, yalabe penenaminue.

²⁹Miya Jesuchi mantate seque jeleratuto micarinaminue. Griego fiqui pamin israelítalabe pacaanaminue. Junni yalaman Sáuloca paito totechi tinaminlanue.

³⁰Junni Jesucrístochi tsachilari junca miito, Sáuloca Cesarea puebloca tanjito Tarso puebloca manherelaquinue yape yaca totelaquitusa.

³¹Junte nechi Judea tobi, Galilea tobi, Samaria tobi, Jesucrístochi tsachi bolonla pansi chuto sonba tenca jera ilainue. Miya Diosica respetaito jelerato chuminlanue. Diosichi Tenca yalachi seque tenca cuwanan, serade serade jinaminlanue.

³²Junni aman Pedro jerale Jesucrístobe penenaminlaca quiradede nenaminue. Junto Lida pueblocanan jito, junbinan Diosichi sen tsachilaca quirabi jinue.