Oweziwa wa Yinsa 9:1-32

¹Zinrettikhanaru vitthu zaya epo, Saawulu aarettiye ahilikhelelaka owaatuturucha na owaala maaswihaapa a Mbwana. Khulankha khulawa wa nttunkhulu a mahaakhimu a tiini,

²khumvekela warakha yoori alawe mmamanyupa anthukumaniwaamo sitati ya Damashiku yoori amana awaasikanamo anamalottela a Yinsa, waaza alume mpakha aakha awaathuule awaalawane Yeruzaleemu awaatthe nkalapooso.

³Khulankha khusala alotta tarikhi, asaleelaka ofiya Damashiku, khumpuwela nuuru yaalankha pinkuuni khusala yaara aphale aarivo,

⁴Aphano ye khukwela vathi, khusiila huula yaari omuuzaaye yoori: “Saawulu, Saawulu mwaasa aya niini onikilupatthelaaye?”

⁵Saawulu khuuzela yoori: “O paani weeyo, Mbwana?” Ye khujipu araka: “Miiyo ki Yinsa, otule weeyo oninlupatthaaye.

⁶Olankhe olawe nsitati ena anttelaaye owuuza weeyo etthu yooretta.”

⁷Atthu aari olawanaaye vamote Saawulu khweemela ari oosuthuwa, khusiila huula khuhisala amoona hatha ntthu.

⁸Saawulu khulankha vathi aphale akweliyeevo, afumulaka maasho khuhisala awahi woona hatha etthu, atthu khunkholela khunlawana mpakha Damashiku.

⁹Khwiikhala siikhu ttatthu ari woohooni, woohiji etthu na woohinywi etthu.

¹⁰Damashiku aarivo namalottela aari wiitthiwaaye Ananiiya. Mbwana khunkhuwela muulottha yoori: “Ananiiya!” Khujipu yoori: “Lape, Mbwana.”

¹¹Mbwana khumuuza yoori: “Olawe owawe Yuuda, tarikhi enitthiwaaye Yookowa, omuuzelele ntthu mmote wa Tarusu aniitthiwaaye Saawulu. Otu aya entta olompa;

¹²muulottha khumoona mwinyi aari wiitthiwaaye Ananiiya atiye anttheeliye makhono yoori arutele woona.”

¹³Ananiiya khujipu yoori: “Mbwanaaka, kaaza raku osiila vitthu anrettazo mwinyi oto na vitthu zooshi zootakhala aniwaarettelaazo mattakatthiifu awo Yeruzaleemu.

¹⁴Ye ata okhuno khwa ruhusa ya attunkhulu a tiini yoori ate awaakhole ooshi apale ansifwaaye nzina lawo.”

¹⁵Ila Mbwana khumuuza Ananiiya yoori: “Olawe! Mwinyi oto tu waaka, yaana yaka ethawuliweeyo yoori ethuule nzina laka ewaalawanelaka makafiri na afwalume awe na vakatthi wa atthu a Ezirayeele.

¹⁶Kinlawa koothoonyezeni nanna atthu anttelaazo ohoowa mwaasa wa nzina laka.”

¹⁷Aphano, Ananiiya khulankha khulawa. N'oofiya khuvira nnyupa khunttheela makhono khumuuza yoori: “Ttwiiyaku Saawulu, Mbwana Yinsa, otule oopuweleliyeeyo ntarikhi ataaka ohali waari olankhaawo, akiperekha miiyo yoori orutele woona na wiiye wa wiitaala Rooho Ttakatthiifu.”

¹⁸Nasaapiru vitthu nkhama mavalako khusaruwa mmaasho, khwaaza woona opheya. N'oolankha khulawa khoosiwa.

¹⁹Wakathi ajiiyeevo etthu-yoojiwa, khurutelamo kuvu zawe. Saawulu aavirisiye siikhu vattitthiiru aari na anamalottela sitati wa Damashiku.

²⁰Wakathi otthuupule khwaaza olaleya mmanyupa a Nnyizinku yoori Yinsa mwaana wa Nnyizinku.

²¹Ooshi apale aari onsiilaaye khwiiya ootikinisiwa channu, khusala alupa yoori: “Khahiyo otthuutu nlume otule aari weekesakaaye owoola apale ooshi aari osifwaaye nzina la Yinsa? Khaatiye okhuno oteela owaathuula atthu nkhama anamafukiwa yoori awaalawane Yeruzaleemu wa attunkhulu a anamalokozela a tiini?”

²²Saawulu khusala avira ajilipisaka wakhula siikhu, mayaahuuti khusala amwaakanyerela yoori oniikhala Damashiku athoonyezaka yoori Yinsa ti Almasiihu.

²³Ziviriyeevo siikhu za waatta, mayaahuuti khusiilana ooshi aya wahati woomuula,

²⁴ila Saawulu khwiiya woojuwa shawuri zaya epile. Nthana na osikhu aari wiiya oothotolela milako za sitati etile yoori apatthe omuula.

²⁵Anakhiyoni awe khunthuula n'oosikhu khunwelisa khumwishushela onyuma khwa vahali wa pwejiweevo wa muuri.

²⁶Wakathi afiiyeevo Yeruzaleemu khutakha owaakusanya anakhiyoni a Yinsa, ila ooshi khusala amoova mwaasa woohinkhupali yoori khweele nakhiyoni.

²⁷Aphano Baranabe khuwaathuula maswihaapa khusala awooza yoori ntarikhi, Saawulu amoona Mbwana amuuziyeeyo nanna awahiyeezo olaleya hapari zooshapweya woominyalavo khwa nzina la Yinsa Damashiku.

²⁸Attaaphale, Saawulu khwiiya vamote na yo, khusala eettetta woohoovi Yeruzaleemu, alaleyaka woominyalavo khwa nzina la Mbwana.

²⁹Khusala attakhula na weelezana na mayaahuuti aari ottakhulaaye luuka ya ekereeku, ila apo aya aari otakha omuula.

³⁰Attwiize n'oojuwa mattakhuzi apale, khunthuula khunlawana nti wa Sezareeya khumpakhirisa yoori alawe nti wa Tarusu.

³¹Siikhu zaya epo kereja yaari ya heeri nti wooshi wa Yudeya, Kalileya na wa Samariya. Atthu a waamini aari otepa okhomaala na Rooho Ttakatthiifu na waatta, khwa meekhazi oomoova Mbwana.

³²Pheeturu khusala eettetta wakhula phantte, khulawa owaathotola attakatthiifu apale aari wiikhalaaye Liida.