Hechos 9:1-32

¹Joo ndaja coo da̱ naní Saulo cája xíxi tá cája xíxi da xi̱hín na̱ cúú cuéntá Jesús. Ta sácú ini da ndaja caja da cahní da̱ na̱. Ta sa̱há ña̱ cúni̱ da̱ jándihi da sa̱ha̱ ná sa̱há ña̱ cán quéa̱ na̱sa̱ha̱n da̱ cáha̱n da̱ xi̱hín da̱ cúú sa̱cua̱ha̱ nu̱ú ju̱tu̱

²ña̱ ná quia̱hva na in carta nu̱ cáha̱n ña̱ ñéhe̱ dá ña̱ma̱ni̱ qui̱hvi da veñu̱hu ñúhu ñuu Damasco já ná ndinducú da̱ na̱ ndíco̱ íchi̱ cuéntá Jesús já ná cató da̱ na̱ cañehe da na̱ quixi na cu̱hu̱n na̱ veca̱a ñuu Jerusalén. Co̱ cája toho a á cúú ná ta̱a á ñáha̱. Chí na̱quee Saulo ñuu Jerusalén xi̱hi̱n mé carta.

³Joo nani xíca da cua̱ha̱n da̱ íchi̱ tá sa̱ yati xi̱nu̱ co̱o da ñuu Damasco já in náá cuití na̱ndiyi̱hvi̱ ndaa ñúhu̱ ja̱ta̱ dá. Mé ñúhu̱ yóho na̱quixi a chí indiví.

⁴Chí i̱vi̱ la̱á na̱ndicava Saulo nu̱ ñúhu̱. A̱nda̱ já na̱xini jo̱ho da cáha̱n in a xi̱hi̱n dá já cáchí a̱ já xi̱hi̱n dá: —Saulo, Saulo. Ndá cuéntá quéa̱ cája xísún xi̱hín i̱ —cáchí a̱ xi̱hi̱n dá.

⁵A̱nda̱ já na̱casáhá ndáca̱ tu̱hún Saulo já cáchí da̱ já: —Yo cúú ndó, na̱ cáha̱n. Ndaja naní ndo̱ —cáchí da̱. A̱nda̱ já na̱nducú ñehe a cán tu̱hun nu̱ dá já cáchí a̱ já xi̱hi̱n dá: —Ye̱he̱ cúú u̱ Jesús, mé a̱ cája xísún xi̱hi̱n. Ta xi̱hín ña̱ cájún yóho cúú á tátu̱hun cája xísún xi̱hi̱n mé vún jáchi̱ cájún tátu̱hun cája in ti̱ndi̱qui̱ tá sáni̱ ndaa rí nu̱ yócó poya ta jándicue̱he̱ ri̱ mé va rí.

⁶A̱nda̱ já na̱casáhá quíji Saulo xi̱hín ña̱ yíhví da̱ já na̱cachi da já: —Ca̱ha̱n ndó xi̱hín i̱, xitoho i̱ ndía̱ quéa̱ cúni̱ ndó ná caja i̱ —cáchí da̱. A̱nda̱ já na̱nducú ñehe Jesús tu̱hun nu̱ dá já cáchí a̱ já xi̱hi̱n dá: —Cuándaco̱o ta cuáhán qui̱hvi ñuu Damasco. Ta ja̱n ca̱ha̱n na̱ xu̱hu̱n ndía̱ ndítahan cajún —cáchí Jesús.

⁷Ta tócó ndihi da̱ cása̱ha̱n xi̱hi̱n Saulo cán na̱yi̱hví ndiva̱ha da jáchi̱ na̱xini jo̱ho da ña̱ cáha̱n cán va̱tí co̱ó ña̱yivi ná xini da.

⁸Tá na̱ndihi já na̱ndaco̱o Saulo nu̱ ñúhu̱. Joo tá na̱suná da̱ nduchú núú da̱ chí co̱ tívi ga̱ nu̱u̱ dá. Sa̱há ña̱ cán quéa̱ ja̱ndá tíin ndaa na da̱ cua̱ha̱n da̱ chí Damasco.

⁹Cán na̱sahi̱in cuáá da̱ ti̱xi u̱ni̱ qui̱vi̱ ta chí co̱ó na̱xixi da ta ni ticui̱í co̱ó na̱xihi da.

¹⁰Mé ñuu Damasco cán na̱sahi̱in in da̱ cúú cuéntá Jesús naní Ananías. Ta ndaja coo na̱xini ndímáhnú da̱ Jesús ta na̱ca̱ha̱n xi̱hi̱n dá já na̱cachi a já: —Ananías. A̱nda̱ já na̱nducú ñehe da tu̱hun nu̱ á já cáchí da̱ já: —Yóho íin i̱. Ndía̱ cúni̱ ndo̱, xitoho i̱.

¹¹A̱nda̱ já na̱cachi Jesús xi̱hi̱n dá: —Candichi ta cuáhán cáyé naní a̱ Nda̱cú Nda̱a̱. Ta vehe da̱ naní Judas cán nda̱ca̱ tu̱hún sa̱há in da̱ naní Saulo, da̱ na̱cacu ñuu Tarso. Viti ñúhú xíca̱ ta̱hví da̱ nu̱ Ndióxi̱ ndáca̱a̱n da̱.

¹²Jáchi̱ na̱xini ndímáhnú da̱ ña̱ quíhvi mún, Ananías vehe nu̱ ndáca̱a̱n da̱. Ta na̱xini da ña̱ chínúún ndáhu̱n ji̱ni̱ dá ta já cuu cande̱hé tucu da —na̱cachi Jesús xi̱hi̱n Ananías.

¹³Tá na̱xini jo̱ho Ananías ña̱ yóho já na̱cachi da já: —Cande̱hé ndo̱, xitoho i̱. Yíhví i̱ cu̱hu̱n i̱ jáchi̱ sa̱ cua̱há ndiva̱ha ña̱yivi ndícani nu̱ú i̱ sa̱há mé Saulo ja̱n. Ta ndícani na nu̱ú i̱ ndá quia̱hva xíxi cája da xi̱hín na̱ cúú cuéntá mé á, na̱ ndúu ñuu Jerusalén.

¹⁴Ta viti va̱xi da̱ ja̱n ñuu yóho jáchi̱ sa̱ na̱xi̱ca̱ da̱ ña̱ma̱ni̱ nu̱ú na̱ sa̱cua̱ha̱ nu̱ú ju̱tu̱ ña̱ ná cuu játaca da tócó ndihi na̱ cája cáhnu mé ndó já ná cañehe da na̱ cu̱hu̱n na̱ veca̱a —na̱cachi Ananías.

¹⁵A̱nda̱ já na̱cachi Jesús já xi̱hín Ananías: —Cuáhán quíi̱ jáchi̱ sa̱ na̱ca̱xi i̱ da̱ ña̱ ná ca̱ha̱n da̱ sa̱há i̱ nu̱ú ña̱yivi java ga̱ nación ta quia̱hva já ca̱ha̱n da̱ sa̱há i̱ nu̱ú na̱ cómí cuéntá sa̱há na̱ cán. Ta na̱ca̱xi i̱ da̱ ña̱ ná ca̱ha̱n da̱ sa̱há i̱ nu̱ú na̱ na̱quixi chi̱chi Israel viti.

¹⁶Ta jána̱ha̱ i̱ nu̱ dá ndá quia̱hva ndítahan ndoho ini da sa̱há i̱ —na̱cachi Jesús.

¹⁷A̱nda̱ já na̱quee Ananías cua̱ha̱n da̱ vehe nu̱ íin Saulo cán. Tá na̱xi̱nu̱ da̱ cán já na̱chinúu da ndáha̱ dá ji̱ni̱ Saulo já na̱cachi da já xi̱hi̱n dá: —Ñani Saulo. Mé Jesús, xitoho í, mé á na̱xi̱nún nu̱ú na̱quisún íchi̱ cán, mé á cán quéa̱ na̱chindahá ye̱he̱ va̱xi i̱ já ná ndinu̱na̱ nduchú núún já ná cuu cande̱hé tucún. Ta já cúni̱ Ndióxi̱ ña̱ ná ndicutú nda̱a̱ ínimu̱n xi̱hi̱n ínima̱ yi̱i̱ mé á —na̱cachi Ananías xi̱hi̱n Saulo.

¹⁸Chí i̱vi̱ la̱á na̱casáhá cúyu ña̱ha tátu̱hun runchu ti̱yacá nduchú núú Saulo chí na̱nu̱na̱ nu̱u̱ dá sánde̱hé tucu da. A̱nda̱ já na̱sa̱ha̱n Saulo na̱candúta̱ dá.

¹⁹Tá na̱ndihi já na̱xixi da ta na̱ndi̱hvi tucu ndée̱ dá ta na̱sahi̱in tóo da chá qui̱vi̱ xi̱hín na̱ cúú cuéntá Jesús ndúu ñuu Damasco cán.

²⁰Tá na̱ndihi já na̱casáhá Saulo jána̱ha̱ da̱ tu̱hun Ndióxi̱ ini veñu̱hu ta jána̱ha̱ da̱ ña̱ cúú Jesús in túhún ji̱ni̱ já ja̱hyi Ndióxi̱.

²¹Ta tócó ndihi na̱ táa jo̱ho nu̱ cáha̱n da̱ cátóntó na̱ cája da. Já cáchí xi̱hi̱n táhan na já: —Á a̱ ju̱ú da̱ yóho cúú da̱ na̱ndicui̱ta cája xíxi xi̱hín na̱ cúú cuéntá Jesús ñuu Jerusalén, nduu. Á a̱ ju̱ú sa̱ mé da̱ yóho va̱xi da tiin da na̱ cúú cuéntá Jesús mé ñuu yóho já ná cu̱hu̱n na̱ nu̱ú na̱ sa̱cua̱ha̱ nu̱ú ju̱tu̱ já ná taán ñahá na̱ veca̱a —na̱cachi xi̱hi̱n táhan na.

²²Joo ví ga̱ ví ndíndeé ini Saulo cáha̱n da̱ tu̱hun Ndióxi̱. Ta náha̱ da̱ nu̱ú ña̱yivi ña̱ mé Jesús cúú Cristo, mé á na̱chindahá Ndióxi̱ cacomí cuéntá sa̱há ña̱yivi. Ja̱nda̱ quia̱hva já na̱jája̱ca̱ da̱ xíní túni̱ na̱ na̱quixi chi̱chi Israel ndúu Damasco cán xi̱hín tu̱hun cáha̱n da̱ xi̱hi̱n ná.

²³Tá sa̱ na̱ya̱ha cua̱há qui̱vi̱ já na̱jándique táhan na̱ na̱quixi chi̱chi Israel cán tu̱hun na ña̱ cahní na̱ Saulo.

²⁴Joo na̱canda̱a̱ ini Saulo ña̱ ndúcú na̱ cahní na̱ da̱. Ta mé na̱ ndúcú cahní Saulo cán na̱sandati na ñuú ta ndiví yéhé ñuu cán ja̱nda̱ quia̱hva ná queta da já ná cahní na̱ da̱.

²⁵Joo in ñuú na̱ cúú cuéntá Jesús ndúu ñuu Damasco cán na̱chica̱a̱n na̱ da̱ ini in to̱yi̱cá cáhnu já na̱jánuu na da̱ ndi̱ca náma̱ cáhnu ndájí yuhú ñuu cán já na̱ca̱cu da ta na̱quee da cua̱ha̱n da̱.

²⁶Tá na̱xi̱nu̱ co̱o Saulo ñuu Jerusalén já na̱nducú da̱ ndique táhan da xi̱hín na̱ cúú cuéntá Jesús ndúu cán. Joo tócó ndihi na̱ cán na̱yi̱hví na̱ da̱ jáchi̱ co̱ cándúsa na ña̱ sa̱ na̱ndiquehe da íchi̱ cuéntá Jesús.

²⁷Joo na̱ndiquehe Bernabé sa̱ha̱ Saulo. Na̱sa̱ha̱n da̱ na̱jána̱ha̱ da̱ da̱ nu̱ú na̱ apóstol cán já ná ndique táhan na xi̱hi̱n dá. Ta na̱ndicani Bernabé nu̱ ná ndaja na̱sahi̱in tá na̱xini Saulo Jesús íchi̱ nu̱ xíca da cua̱ha̱n da̱ chí ñuu Damasco. Ta na̱ndicani da ña̱ na̱ca̱ha̱n Jesús xi̱hi̱n Saulo. Ta na̱ndicani da ña̱ co̱ó na̱yi̱hví Saulo ca̱ha̱n da̱ sa̱ha̱ Jesús ñuu Damasco.

²⁸A̱nda̱ já na̱ndiquehe na Saulo ta na̱cando̱o da ñuu Jerusalén. Ta na̱casáhá xíca nuu da xi̱hín na̱ apóstol.

²⁹Ta co̱ yíhví da̱ cáha̱n da̱ sa̱há Jesús. Ta na̱nditúhún da̱ xi̱hín na̱ na̱quixi chi̱chi Israel, na̱ cáha̱n tu̱hun griego ndúu ñuu cán. Joo mé na̱ cán ndúcú na̱ ndá quia̱hva caja na cahní na̱ da̱.

³⁰Tá na̱canda̱a̱ ini na̱ cúú cuéntá Jesús ña̱ ndúcú na̱ cahní na̱ Saulo já ñéhe na da̱ cua̱ha̱n da̱ ñuu Cesarea. A̱nda̱ já na̱chindahá na̱ da̱ cuanúhu̱ dá ñuu Tarso.

³¹A̱nda̱ já na̱nduu va̱ha ini tócó ndihi na̱ cúú cuéntá Jesús ndúu ndijáá estado Judea xi̱hi̱n estado Galilea xi̱hín estado Samaria. Ta na̱ndindacú chága̱ ví ini na xi̱hín tu̱hun Ndióxi̱. Ta xi̱hín ndinuhu ini na cája cáhnu na Ndióxi̱. Ta chíndeé ínima̱ yi̱i̱ mé á na̱. Ta já na̱ndicua̱ha̱ chága̱ na̱ cua̱ha̱n na̱.

³²Ta ndaja coo xíca nuu Pedro xíto nihni da na̱ cúú cuéntá Jesús ndúu ñuu válí cán. Ta já na̱sa̱ha̱n ri da xíto nihni da na̱ cúú cuéntá Jesús ndúu ñuu Lida.