HECHOS 9:1-32

¹Numacuahn ro min ne, riquendi Saulo redin ta̱n se nduco ihyan che ritahno ye Dihvo vo Jesucristo, nahn ca̱hno se ihyan. Chahn se na̱n chidocuya̱n che tahque ndina̱n,

²chica se a̱ma ca̱ca, quenda se, ca̱va che ca̱hn se ya̱co yahn ihyan nación yahn Israel che vate ye ya̱n Damasco, din se preso nde nda̱hta, nde cha̱hn, ihyan che ritahno ye Dihvo vo, quenda se ihyan ya̱n Jerusalén.

³Ate cuahn che nda̱ nino se ya̱n Damasco ne, adena̱n chiya a̱ma dave che chica na̱n ro na̱n se.

⁴Ndeta̱hno chenda̱h se ndiya̱hn, ne chihnevan se a̱ma ndudo che ra̱hn: ―Saulo, Saulo, ¿dehco che redin tan nduco ihyan yáhn?

⁵Tumerune se: ―Dihvé, ¿duh ndih ne? Ndaconan ndudo me: ―U che Jesucristo che redin tan nducó. Nduhca̱ itenine che renun yah ma̱n te ite, renun te ya̱hn cuiyon che rahco nduco ihyan ite ne, tihca̱ redin.

⁶Saulo ne, a̱ma dihya se chi, nde tuno rendoh se che va̱h se, ne ra̱hn se: ―Dihvé, ¿deh nahn ne che dín ne? Ndahconan Dihvo vo yahn se: ―Cuenecuen, ne cuehn viya̱n. Min ca̱hma a̱ma ihyan co ye di deh va che din.

⁷Namin sa̱hn che nduco Saulo ne, a̱ma dihya se chi, te chihnevan sa̱hn chahn ndudo me, ate hua duhva ndihche se.

⁸Tuhme necuan Saulo, ate cuahn che na̱hne se ndutina̱n se ne, ametah ro na̱n se. Chemin che cheta̱h sa̱hn chahn ta̱h se, ne quendanan se sa̱hn nde nda̱ se ya̱n Damasco.

⁹Min quenan se ino ro, ne hua ro na̱n se, nde hua cheh se, nde hua chih se.

¹⁰Ya̱n min va a̱ma ihyan che duche ye Ananías che ritahno ye Dihvo vo Jesucristo. Ndihchero ihyan min a̱ma vederihno va̱n ya̱hnde yahn ye che nda̱ Dihvo vo na̱n ye, ne ya̱hve ye ihyan: ―¡Ananías! Ndahconan ye: ―Dihvé, ca̱hma ne.

¹¹Tuhme ra̱hn Dihvo vo ri ye ihyan: ―Cuehn cuahn yune che duche Yune Cua̱co, ne min ndeva̱co Judas, cuiquerone ca̱va a̱ma sa̱hn ya̱n Tarso che duche se Saulo. Min quenun se, reva̱h se.

¹²Sa̱hn min ne, din Dendiohs che va̱n ya̱hnde yahn se ndihchero se di che nda, nahn tah sa̱hn ca̱va che ndaconan co ro na̱n se.

¹³Cuahn che chihnevan Ananías che tihca̱ ne, ra̱hn ye: ―Dihvé, a̱ma ya̱hn ihyan rente ye nducó yahn sa̱hn min che a̱ma redin ta̱n se min ya̱n Jerusalén nduco ihyan che ritahno ye ndih.

¹⁴Ma̱n ne, nda̱ se muhn, nda se a̱ma ca̱ca che dendah chidocuya̱n che tahque ndina̱n ca̱va che din se preso nducoya̱ca nuhn che ritahno nuhn ndih, quenda se nuhn.

¹⁵Ate ra̱hn Dihvo vo ri ye ihyan: ―Cuehn, te má̱n tenda̱hnún sa̱hn ca̱va che cuahndudo se ndudo yáhn, cahnevan ihyan nación yahn Israel ma̱n, ihyan nación chena̱hn ma̱n, rey yahn ye ma̱n.

¹⁶Ca̱h cuandé sa̱hn che va che a̱ma chuhrihn se che cuande yáhn.

¹⁷Tuhme cuahn Ananías, chenda̱ ye vah na̱n che quenun Saulo. Nahn ta̱h ye sa̱hn, ne ra̱hn ye ri ye sa̱hn: ―Dihnó Saulo, Dihvo vo Jesucristo, ihyan min che chihnde ro ye nan cua̱hn yune ne, dechuh ye u ca̱va che ndaconan co ro nan ma̱n, ca̱va che conun Vaco Ndah yahn Dendiohs di ma̱n.

¹⁸Ndeta̱hno chera che deca̱ ro yun ro che chenan ndutina̱n se, ne chi ro na̱n se. Tuhme necuan se, ne chedenune se.

¹⁹Chihno min ne, cheh se, ne ndeva fuerza sa̱hn. Quenan se neve ro min ya̱n Damasco nduco ihyan che ritahno ye Dihvo vo.

²⁰Chihno min ne, cana̱n cahndudo Saulo nduh cua̱n chete ya̱co, ne ra̱hn ye te Jesucristo ne, ihyan min che Da̱ya Dendiohs.

²¹Nducoya̱ca ihyan che rihnevan ye ne, rahn ino ye, ne retumarune vih ye: ―¿A ndiyu sa̱hn tih che redin ta̱n se ya̱n Jerusalén nduco ihyan che ritahno ye Jesús? ¿A ndiyu sa̱hn tih che nda̱ se muhn ca̱va che quenda se ihyan che ritahno ye ihyan min, neca̱h se ihyan ta̱h chidocuya̱n ndina̱n?

²²Ate Saulo ne, nde tahque numa ino se rahndudo se che cua̱co te Dihvo vo Jesucristo ne, a ihyan min che a va ca̱de che chi ye ndedevahn ye ihyan iyehnse. Nde na̱n che ametah deh che ca̱hma ihyan nación yahn Israel che vate ye min ya̱n Damasco.

²³Chihno ndeh ro ne, ihyan nación yahn Israel chahn ne, ntuhno ye ca̱va che ca̱hno ye Saulo,

²⁴ate checadino se. Nde ro nde ra̱hn rano ihyan chahn sa̱hn nduh cua̱n chende chan yahn ya̱n me ca̱va che ca̱hno ye sa̱hn.

²⁵Ate a̱ma vino ne, ihyan che ritahno ye Dihvo vo ne, ndedevah ye sa̱hn chete a̱ma cuahte chahte na̱n chete che ndi chan yahn ya̱n me, ne tihca̱ chi che ndevahn se.

²⁶Cuahn che nta̱ Saulo ya̱n Jerusalén ne, nahn conduco se ihyan che ritahno ye Dihvo vo Jesucristo, ate nducoya̱ca ihyan chahn ne, va̱h ye, te ra̱hco ye te co hua cua̱co che a ritahno se Dihvo vo.

²⁷Ate Bernabé ne, quenda ye Saulo na̱n ihyan apóstol chahn, ne neca̱h cuande ye ihyan nduhca̱ che chihnde ro Dihvo vo na̱n se cua̱hn yune ma̱n, nduhca̱ che ya̱hve ye sa̱hn ma̱n, nduhca̱ che numa ino se cahndudo se ya̱n Damasco vederihquentiyon yahn Dihvo vo ma̱n.

²⁸Tuhme chinduco Saulo ihyan apóstol chahn, ne quenan se min ya̱n Jerusalén.

²⁹Numa ino se rahndudo se vederihquentiyon yahn Dihvo vo, riya̱hve se ihyan, nda̱ta yahn Israel, che rente ye deva̱co griego. Ate ihyan chahn ne, rinuhn ino ye ta̱ca̱ co ca̱hno ye sa̱hn.

³⁰Cuahn che checadino ihyan che ritahno ye Dihvo vo che tihca̱ ne, quenda ye sa̱hn ya̱n Cesarea, ne ndedechuh ye sa̱hn ya̱n va̱co se Tarso.

³¹Ta̱hn min ne, numachahte esta̱do yahn Judea ma̱n, Galilea ma̱n, nación yahn Samaria ma̱n ne, nducoya̱ca ihyan che ritahno ye Dihvo vo ne, cheguan redin ta̱n ihyan nduco ye, ne a ndevate tahn ye, rendeva ye yavena̱n Dihvo vo Dendiohs numacuahn vedenecun. Reneca̱h ya̱n Vaco Ndah yahn Dendiohs chedave yahn ihyan chahn, ne redin Dendiohs che a̱ma ya̱hn ihyan ritahno ye Dihvo vo, rinduco ye ihyan.

³²Cuahn che quechica Pedro, rahndudo ye va̱n ihyan che ritahno ye Dihvo vo Jesucristo ne, chahn ye, chendihchero ye ihyan che vate ye ya̱n Lida.