30Taazuʋɛ naa pɛ ge ɠɛni gaama wuulee, nuɓusɛiti ti ɗa ɠula adɛti pɛ ga kpizɛi, ti ɗa ʋa, ti Pɔle zoni, ti kula GALA sei ʋɛlɛi wu, ti kpogiti daaɠulu gaamanɔ.
31Ti ɠɛni ɠɛɛzu, ti Pɔle ʋa, eyɛsu ma wooi zeeli Wɔlɔme salaʋusu ɓulugiti unda ɠɔɔɠuluɓai ma ga Zeeluzalɛme taazuʋɛ ɠa wuulee.
32Gaamago nɔ, é salaʋusuiti ta ta-ɠundiɠiiti seɠeni, ti li bɛbɛi ʋɔ pelei ga kpizɛi. Ti kɔɔɠuluɓai ɠaai ma ta salaʋusuiti, ti ɓeni Pɔle loɠa vai ʋa.
33Kɔɔɠuluɓai maaɓuɠani Pɔle ʋa, é so, é devei ve ga ti gili ga yɔlɔɠɔ felegɔ. Naa ʋoluma, é ti ɠaazaɠani ga toɠa ga ɓɛ, ta leeni ɠa é kɛai.
34Kɛlɛ bɛbɛi zaama ɛsɛ pɛ ge ɠɛni nɔnɔ wosu, ti ɗa ɓain, ti woo la liini ga faa ɠila. Tɛi kɔɔɠuluɓai la ɠɛni faa nɔpɛ gaaɠaazu naama vaa zupui zaama, é devei veeni ga ti lii la kɔɔlaɠai zu.
35Siɛgi zu Pɔle ɠɛni la nu lɛɛzuʋɛ, kɛni salaʋusuiti ti seɠeni, tɔɔzei bɛbɛi ná-ziiɠulai ʋa,
36mazɔlɔɔ bɛbɛi ɠɛni polu, ti ɗa ɓain, ti ɗa ɠɛ ma: «À paa!»
37Siɛgi zu ti ɠɛni Pɔle lɛɛzu la kɔɔlaɠai zu, é kɔɔɠuluɓai ɠaazaɠani, é ɠɛ ma: «Ɗa kɛ gè ɓɔɛ è ʋɔ ɓaa?» Naa ɠɛ ma: «È Gɛlɛke wooi ɠwɛɛ mu ɓaa?
38Ɗa lɛi è ʋa ɠɛ mu ga Ezipete nui naa, nii é ʋuutugi leʋeai feya, é li ga nu ʋaa nu waanaanigɔ (4 000) teʋebai zu?»
39Pɔle ɠɛ ma: «Ɓa-o, nɔ̀un, nà ga Zuifu ɠiteɠite, sɔ̀lɔɔgɛ Taalese, Silisi yooi zu, nà ga sɔɓelama laa wolai naa zu nu. Nà è maanɛɛnɛzu, va bu, gè ɓɔɛ nuɓusɛiti pɔ.»
Kɛɛwotiiti 21
Kɛɛwotiiti 21:30-39