Aposolo Jaŋere Binaŋ 21:30-39

³⁰Paulo e iŋuc ecnepie haeŋic mâmâc sasawa kike saoŋ qajareme ɋuruŋ herâ qâture‐fârembiŋ. Ehuc ŋic gâcnezi Paulo rorâ ufuŋkonec fâre wahambiŋ. Fâre wahapie izia motâc hembiŋ.

³¹Ŋic jaŋe Paulo rorâ qâhâmozo ehapie biŋe Roma momori jaŋere soŋaŋ sâkorao rame ʒiŋuc manawec: “Jerusalem ŋic jaŋe mâmâc sasawa râsi roroc eŋgopieŋ.”

³²Dâŋ iŋuc manarâ izia momori fekicne wahakicne rocjopame ɋuruŋ ɋuruŋ rambiŋ. Eme ŋic jaŋe Paulo qahuc juhapie soŋaŋ sâko â momorifâc‐ticne fisipie honec‐joparâ behembiŋ.

³³Eme momori soŋaŋ sâkozi fisirâ Paulo jowac rorâ mume kâpâcwâru jajaheczi bândeŋnembiŋ. Erâ Paulo ʒâŋe‐ticnere â wemo wiac ewec irec iindiŋ gie bawec.

³⁴Eme ŋic jaŋe owage owa‐nane epie qâsifuo dâŋ fuŋne sâcne mi mana‐hâmohuc mume momori jaŋe Paulo ficjeŋicko barambiŋ.

³⁵Eme Paulo e ririo fezo eme ŋic jaŋe orâŋkerâ bâbâzickepie momori jaŋe Paulo hâporâ reŋke fembiŋ.

³⁶Ŋic guru sâko jaŋe bâjâpec‐jopahuc owac owacke rahuc ʒiŋuc mumbiŋ: “Ŋic e arictac eoc!”

³⁷Eme Paulo ficmaŋko bafezo ehapie momori soŋaŋ sâko wiocnerâ muwec, “Manatec dâŋ moc gazape?” Mume soŋaŋzi muwec, “Go Grikdâŋ manaekic?

³⁸Mârâcko Aigita ŋic moczi ʒika bâfuaocte râsi 4 tauseŋ rocjopame mâreŋ tuhuo rambiŋ, go ŋic e me moc?”

³⁹Wiocneme Paulozi ʒiŋuc âzâcnewec: “No Judaŋic, erâ Kilikia mâreŋko Taso hae sâko ŋekac irec rune. Go mana‐naretec ŋic dâŋ piticne jazape.”