Kàddu yu Xelu 27:2-21

²Bul tëggu, bàyyil ñu tagg la, muy waxi keneen; yaw, bu ko wax.

³Doj diis na, suuf dib sëf, waaye fitnay dof a ko raw.

⁴Xadar day ñàng, mer di wal mu baawaan, waaye fiiraange amul moroom.

⁵Artu yu ñu la biralal moo gën cofeel gu la boroom ñooru.

⁶Soppe, bu lay gaañ sax, wóolu ko. Nit bañ na la, te di la fóon lu bare.

⁷Ku suur, bañ lem ju xelli, waaye boo xiifee, lu wex lu ne neex la.

⁸Ku sore fa nga bokk, dangay mel ni picc mu sore tàggam.

⁹Diwook suuru day naatal xol; waaye li neex cib xarit, xol la lay digale.

¹⁰Bul fàtte sab xarit mbaa sa xaritu baay, bul jàq ba seeti sa mbokk; dëkkandoo bu jegee gën mbokk mu sore.

¹¹Muusal, doom, ma bég, ba mana tontu ku ma sikk.

¹²Kuy foog, gisu ay, làqu; ab téxét ne ca tëñëx, loru.

¹³Ku gàddul jaambur bor, jëlal mbubbam; tayle ko, moo dige feyal ndaw su yemadi.

¹⁴Nuyoo bu xumb, suba teel mooki saagaa yem.

¹⁵Jabar ju pànk mooy senn bu dakkul, cib taw;

¹⁶ku ko mana yemale, mana téye ngelaw mbaa nga ŋëb ag diw.

¹⁷Weñ ay nàmm weñ, nit ay nàmm xelu moroom ma.

¹⁸Ku aar garab, lekk ca doom ya; ku topptoo sa sang, am ngërëm.

¹⁹Ku xool cim ndox, gis sa kanam, nga xool sab xol, gis sa jikko.

²⁰Njaniiw ak biir suuf du fees, bët it du doylu mukk.

²¹Xaalis ak wurus sawaraa koy xelli, waaye àtteb nit ca jëëm.