Tinata Valavalar 27:2-21

²Ra enana tutana na pite pa u, ma koko ra ngiem iat; A vaira, ma koko ra bul na ngiem iat.

³A vat i mamat, ma ra veo bula; Ma ra kankan i vuna ta ra lunga i mamat ta dir.

⁴A kulot i varvakadik, ma ra kankan i kaina tuna; Ma na tale to ia ba na tur ta ra luaina mata i ra varkukur?

⁵A varpit di pait ia ta ra kapa I boina ta dir ma ra varmari ba i tur ivai.

⁶Ba talai dat i kita dat i vuna ta ra varmari; Ma ga ra ebar i peal kana vargalum.

⁷Nina ba i tup ia ra minaur i vue ra bulit na livur, Ma pire nina i mulmulum a lavur mapak na magit par dia kalakalami.

⁸Da ra beo i vana irai kan kana po, Damana ra tutana ba i vana irai kan ra kubana.

⁹A dangi na vartap ma ra polo i ang na katkat dir vagugu ra bala i ra tarai, Damana ra varmari kai talai tikai ba i arikai ta ra dovot na nuknukina.

¹⁰Koko una nur vue talaim iat ma talai tamam; Ma koko una ruk ra kuba i turam ta ra bung ba u malari tana. Talaim i ki maravai i boina ta dir ma turam i ki vailik.

¹¹Natugu, una vagagane ra balagu ma una kabinana, Upi ina bali valar pa nina i vul iau.

¹²A tena kabinana i gire ra kaina ma i parau, Ma ra umana papaua dia bolabolo vanavana ka, ma i tup diat.

¹³Una tak pa ra mal kai nina i tar vavalima ure ra vaira, Una kure pi na pait ot pa kana vavalima pire ra enana vavina.

¹⁴Nina ba i tata vadoane talaina ma ra ngala na nilaina ta ra malana ikilik, Da biti ba i varogop ma ra varboar.

¹⁵A tuatua ba pa i ngo ta ra bung na bata tuna Dir vardada ma ra vavina, a tena varngangar;

¹⁶Nina i mainge ba na tur bat ia, i tur bat ra vuvu, Ma i da ra limana tuna i vatur ra dangi.

¹⁷A palariam i vamangi ra palariam, Damana ra tarai dia vargat vargiliane diat.

¹⁸Nina i balaure ra lovo na en ra vuaina, Ma nina i kudakudar pire kana luluai na vatur vake ra variru.

¹⁹Da ra malalar i ra tutana ta ra tava dir varogop ma ra matana tuna, Damana ra nuknuk i ra tutana i vaarike ra tutana iat.

²⁰A ruarua na tulungen ma ra tavul a vinirua pa dir maur ta tika na bung, Ma ra mamainga kai ra tarai pa i ngo ta tika na bung.

²¹Di tun vagomgom ra silva ta ra kabala, ma ra goled ta ra ubu, Ma di valar ra tutana ma ra pite varpa pirana.