Juan 1:27-50

²⁷Ẽ iskaratĩa mato Niospa meka yoifafãini. Askafiano aato chipo mato yoixii. Fãsi ea finõkõia. Ẽ afaa tãpiama ẽ sharakeroko ẽ ãfe zapato risfi nexaxopanã,” ixõ Juan ato yoini.

²⁸Nã pexe rasi Betania faka Jordán okirishtaxõ Juan ato faka mẽra ikimapakekĩ maotisafani. Nãnoax ato fe yoinãni.

²⁹Askata pena fetsa Juanki Jesús kani. Jesús fichixõ Juan yorafo yoini iskafakĩ: “Õikapo. Nã Niospa ãfe oveja tetomashta keskara oa. Nato keyokõi yorafo chaka soaxonõ Epa Niospa nĩchia nokoõnoax naxõ nõko chaka noko soaxonõ.

³⁰Ẽ mato aõnoa yoimis. Ẽ mato yoia iskafakĩ: ‘Chipo oi ea keskarama finakõia, nãmãi ẽ fakeamano iyopaonixakĩ.’ Nakĩa mã oa.

³¹Ẽrifi Cristo tãpixoma yorafo maotisafapai a nõko kaifo judeofãfe tãpinõfora,” ixõ Juan ato yoini Cristoõnoa yoikĩ.

³²Ato yoixõ anã Jesúsnoa Juan ato yoini: “Niospa Yõshi Shara nai mẽranoax rifi keskara Jesúski fotopakekafanaito ẽ õia.

³³Ẽri õiyamano Epa Niospa ea yoiti iskafakĩ: ‘Fatofãfe ea chanĩmara faimãkai mĩ faka mẽra ato ikimapaketiro maotisafakĩ. Akka mikiki fetsa nokoano ẽfe Yõshi Shara nã feronãfakeki fotopakekafãxii. Afe nĩtaxii. Nã mĩ õikĩ mĩ tãpixii nãato ẽfe Yõshi Shara matoya rafemaxii ãfe shinã shara mãto shinã mẽra nanenõ,’ ixõ ea yoia. Epa Niospa ea anori yoiyamakẽ Jesús nã Niospa Fake ẽri tãpikeranama.

³⁴Askafixõ mẽ õia. Askaxõ ẽ mato chanĩmakõi yoi nafi Niospa Fakeki,” ixõ Juan ato yoini.

³⁵Pena fetsa nãno Juan aõxõ tãpimisfo rafe ini.

³⁶Afe niafono Jesús ato finõfaini. Ato finõfainaito Juan ato yoini: “Õikapo. Oa Niospa ina oveja fake keskara,” ixõ Juan ato yoini.

³⁷Juan ato yoiaito nikakata Jesús chĩfafãinifo.

³⁸Jesús ifiakekafã ato õikĩ ato yõkani: “¿Tsoa mã fenaimẽ?” ato faito, “Maestro, ¿fanĩ mĩ ikamẽ?” faifãfe,

³⁹“Ono õifokãfe, ẽ mato ispanõ,” ixõ ato iyoni. Askata afe fokakĩ õiafo nã ika ano afe nokoni. Mã nokoaifono mã xini kai ini. Nãno afe yãtapakenifo.

⁴⁰Nã rafe Juan ato yoia keskara nikakata Jesús chĩfafainifo. Fetsa ãfe ane Andrés. Nã Andrés Simón Pedro ãfe exto ini.

⁴¹Jesús ika ano nokokata Andrés ãfe ochi Simón fenaikai kani. Akiki nokoxõ yoini: “A Niospa nokoki nĩchia Mesías mã nõ fichia. Nã Cristora nõ famis. Õiyotãfe,” fani.

⁴²Askata Andrés Simón Jesúski nokokini. Akiki nokoaino Jesús Simón yoini: “Mĩ Simón, Jonáspa fake. Iskaratĩa ẽ mia ane fetsafaxonõ. Nõ mia Cefas fanõ,” fani. (Cefas nãfa mekapa yoimis Pedro fakĩ.)

⁴³“Ẽ Galilea ano kaira,” ixõ Jesús shinãni. Kapaikĩ Felipe fichixõ yoini: “Efe kafe, eõxõ tãpisharakõixikĩ,” fani. Askafaino afe kani.

⁴⁴Felipenõ Andrésnõ Pedronõ pexe rasi ãfe ane Betsaida ano imisfo.

⁴⁵Askata Felipe Natanael fichixõ yoini: “Moisés Niospa yoini keskara kenekĩ iskafani: ‘Ẽ mãto xanĩfokõi Cristo matoki nĩchixira,’ ixõ Niospa yoini anori Moisés keneni. Nãnorikõi Niospa meka yoimisfãfe kenenifo. Nãkai mã nõ fichia. Jesús José fake Nazarete ano ika. Nãõnoa Moisés feta Niospa meka yoimis fetsafãfe kenenifo,” faito,

⁴⁶“¿Afaa shara Nazarete anoax oimẽ?” ixõ yõkaito, “Ofe, õixikĩ,” Felipe fani.

⁴⁷Natanael akiki nokoaino Jesús õixõ aõnoa yoini: “Nafi israelifãfe fakeki. Nato afaa chaka yoimisma. Chanĩmakõi fisti shinãfafãimiskĩ. Tsoakai pãramisma,” ixõ Jesús aõnoa yoini.

⁴⁸Askafaito nikakĩ Natanael kemani: “¿Afeskaxõ mĩ ea õiyamafikatsaxakĩ mĩ ea tãpiamẽ?” faito, “Mia Felipe fichiyoamano ẽ mia õikĩ taefaita ifi higuera nãmãnoa ẽ mia õita,” Jesús fani. (Akka Jesús Natanael chai ixõ tãpini õiyamafikĩ.)

⁴⁹Askafaito, “Maestro, mĩfi Niospa fakeki. Askatari mĩfi israelifãfe ãto xanĩfokĩ,” faito,

⁵⁰Jesús kemani: “ ‘Mĩ ifi higuera nãmã tsaoa ẽ mia õia,’ ixõ ẽ mia yoia, ¿nã nikaxõ mĩ ea chanĩmara faamẽ? Afara shara fetsa finakõia mĩ õixii.