Juan 13:8-34

⁸Entonces sutpa ojron e Pedro che: —Pero nen ma tiaꞌ tuaꞌ inwactet apoqui nioc, che e Pedro. Entonces e Jesús che: —Jay machi awacta abꞌa tuaꞌ impoqui oꞌc, ma erer iquetpa inteꞌ niwajcanuar, che e Jesús.

⁹Entonces che e Pedro: —Jay bꞌan anata, Niwinquiraret, ira apoqui nioc taca, sino que poco nicꞌabꞌ y poco nijor ubꞌan, che e Pedro.

¹⁰Y che e Jesús: —Tin e wartocto acꞌapa aꞌti machi ucꞌani tuaꞌ aꞌti otronyajr, sino que jax taca uyoc tuaꞌ apoctzꞌa. Y tamar era nox matucꞌa e bꞌonemar tamarox. Pero ayan inteꞌ xeꞌ ayanto e bꞌonemar tamar, che e Jesús.

¹¹Pues e Jesús cay che que ayan inteꞌ xeꞌ ayanto e bꞌonemar tamar porque war unata chi umen tuaꞌ atujchꞌa.

¹²Entonces conda cꞌapa upoqui uyoc uyajcanuarobꞌ, sutpa ulapi ubꞌujc y turuan tor e mesa otronyajr y che: —¿Inata ca tucꞌa inche tacarox era?

¹³Nox iwaren que nen Iwajcanseyajen y que nen Iwinquiraren. Y bueno que war iwaren cocha era porque jax.

¹⁴Pues jay nen xeꞌ Iwajcanseyajen y xeꞌ Iwinquiraren cay impoqui iyoc nox, entonces nox ubꞌan ucꞌani tuaꞌ ipoqui uyocobꞌ e inmojr inteꞌ intiox.

¹⁵Pues cay inche tunor era tuaꞌ inwirsiox lo que ucꞌani tuaꞌ iche nox. Chenic ubꞌan nox bꞌan cocha cay inche nen era.

¹⁶Cꞌani inwareox era que inteꞌ man majax más nuquir winic que upatron. Y tin e ebꞌetbꞌir axin majax más nuquir winic que tin e uyebꞌta ixin.

¹⁷Pues jay inata tunor era cꞌani ixtzay jay iturbꞌa ibꞌa tamar.

¹⁸’Pero machi war onjron tama tunorox, porque nen innata chi xeꞌ sicbꞌabꞌir nimener. Y cꞌani acꞌapa achempa tunor lo que chꞌar tzꞌijbꞌabꞌir tama uyojroner e Dios tiaꞌ che que: “Tin e cay weꞌ tacaren cꞌani aqꞌuijna nipater.” Bꞌan che tama uyojroner e Dios.

¹⁹War inwareox tunor era bꞌajxan conda merato anumuy porque tamar era conda axin anumuy ixixin ixcꞌupseyan tamaren que nen jax e Ajcorpesiaj tuaꞌ tunor e gente tara tor e rum.

²⁰Cꞌani inwareox era que tunor tin e axin uchꞌami tin e inwebꞌta axin war uchꞌamien nen ubꞌan, y tunor tin e uchꞌamien nen war uchꞌami ubꞌan tin e uyebꞌta tarien, che e Jesús.

²¹Entonces conda e Jesús cꞌapa ojron cocha era cay uqꞌui tama uyalma y uyare uyajcanuarobꞌ y che: —Cꞌani inwareox era que ayan inteꞌ tijam xeꞌ tuaꞌ axin utuchꞌien, che e Jesús.

²²Entonces uyajcanuarobꞌ cay uwira ubꞌobꞌ, pero machi unatobꞌ chi tamar war oꞌjron.

²³Y ayan inteꞌ uyajcanuar xeꞌ más achojresna ut umen e Jesús xeꞌ war aweꞌ tuyejtzꞌer tama e wiar era.

²⁴Entonces e Simón Pedro cay uche ucꞌabꞌ tut e ajcanuar era xeꞌ turu tuyejtzꞌer e Jesús tuaꞌ asutpa uyubꞌi tuaꞌ e Jesús que: “¿Chi umen tuaꞌ itujchꞌa?”

²⁵Entonces e ajcanuar era uqꞌueche uyej más tut uchiquin e Jesús y uyubꞌi tuaꞌ y che: —¿Chi era, Niwinquiraret? che uyajcanuar era.

²⁶Y che e Jesús: —Cꞌani inxere imbꞌijc e pan tuaꞌ intzꞌayi y tin e iwira que inwajcꞌu e pan era, natanic que jax era, che e Jesús. Y tamar era cay uxere imbꞌijc e pan y utzꞌayi, y uyajcꞌu e Judas Iscariote xeꞌ uyunen e Simón.

²⁷Entonces conda e Judas uchꞌami e pan wacchetaca ochoy e Satanás tama uyalma. Entonces ojron e Jesús y che: —Lo que quetpa tuaꞌ ache, chen rajxa era, che e Jesús.

²⁸Pues mamajchi xeꞌ turobꞌ tor e mesa era cꞌotoy unatobꞌ tucꞌa tuaꞌ ojron e Jesús cocha era taca e Judas.

²⁹Pues e Judas jax xeꞌ quetpa tuaꞌ uqꞌueche axin e tumin tuaꞌ e inmojr era, y tamar era ayan tin e cay ubꞌijnuobꞌ que e Jesús uyare e Judas tuaꞌ axin umani lo que ucꞌani tama e nojqꞌuin era. Pero ayan ubꞌan tin e cay ubꞌijnuobꞌ que cꞌani axin uyajcꞌu e tumin tin e tzajtaca ut.

³⁰Entonces conda e Judas cꞌapa uchꞌami e pan wacchetaca locꞌoy ixin, cocha warix acbꞌare era.

³¹Pues entonces conda cꞌapa locꞌoy e Judas cay ojron e Jesús y che: —Coner era cꞌani achecta nitawarer xeꞌ Uyunenen e winic, y cꞌani achecta utawarer Catata Dios tamaren ubꞌan.

³²Y cocha nen era xeꞌ Uyunenen e winic cꞌani inchectes utawarer Catata Dios, jaxir cꞌani asutpa uchectes nitawarer nen ubꞌan, y bꞌan tuaꞌ uche rajxa era.

³³Pues machi ixto tuaꞌ inquetpa tacarox nox xeꞌ bꞌanox cocha nimaxtac. Nox ixixin isajquen, pero bꞌan cocha cay inware e winicobꞌ xeꞌ tuobꞌ e Israel y bꞌan tuaꞌ inwareox nox ubꞌan: “Tiaꞌ inxin nen, nox machi uyubꞌiox ixcꞌotoy.”

³⁴Cꞌani inwareox inteꞌ ojroner xeꞌ imbꞌutz xeꞌ jax era: Yajtanic ut ibꞌa inteꞌ intiox. Bꞌan cocha nen war inyajta iut, y bꞌan ubꞌan tuaꞌ iyajta ut ibꞌa inteꞌ intiox.