San Juan 13:8-34

⁸Na' gož Pedron' ḻe': ―Gwbat gua'a latje c̱hibo' ṉi'an'. Jesúsen' gože'ne': ―Še bi c̱hiban', bich gaco' txen len neda'.

⁹Na' Pedron' gože'ne': ―X̱ana', gague ṉi'a na'zen' c̱hibo' še ca', san doxena'.

¹⁰Nach gož Jesúsen' ḻe': ―Beṉe' noša' nazje', ṉi'e na'zen' chyažjen c̱hibe', ḻe doxen cuerp c̱hen' naquen xilaže'. Can' nac le'e, nac lažda'olen' xilaže', ḻa'czḻa' gague yogo'le.

¹¹Jesúsen' gwṉezde' non' gwde' ḻe' ḻo na' beṉe' chesegue'ede' ḻe'. Da'nan' gwne': “Gague yogo'le nac lažda'olen' xilaže.”

¹²Na' cate' beyož gwdibe' ṉi'a yogüe', nach beyaze' xe' dan' chaze' cha'le na' bebi'e da' yoble cho'a mesen'. Na' gože' ḻegaque': ―¿Chejni'ile bi zejen dan' ba bena' nga len le'e?

¹³Le'e nsi'le neda' Maestrw na' X̱anḻe, na' güenczen' žale, ḻe can' naca'.

¹⁴Na' neda' ḻa'czḻa' naca' X̱anḻe na' Maestrw c̱hele, ba gwdiba' ṉi'alen' ca to mos, na' can' cheyaḻa' gaclen ḻježle ca to mos.

¹⁵Ba gwdiba' ṉi'alen' cont blo'eda' le'e cheyaḻa' gonḻe can' ba benan'.

¹⁶Chnia' le'e to da' zejen, note'teze mos bi naque' beṉe' blaoch ca x̱ane', na' to beṉe' zej mandadw bi zaca'che' ca beṉe' gwseḻa' ḻe'.

¹⁷Še chejni'ile da' quinga na' gonḻe can' gwnian', nach soale mbalaz.

¹⁸’Bi žia' ca' c̱he yogo'le. Nombi'a yic̱hjlaždao' to to le'e ba gwleja' cont soale txen len neda'. Na' ṉezda' gac can' ža Xtiža' Diosen' da' nyojen žan: “Beṉe' gwdagw len neda' txen ba blej bšošje' neda'.”

¹⁹Chnia' le'e da' quinga cate' za' gac ca' cont cate' ba goc ca' soac̱hac̱hle šejḻe'le ḻe naca' ben' gwseḻa' Diosen' can' ba gwnia' le'e.

²⁰Chnia' le'e to da' zejen, beṉe' ca' chosolebe' note'tez beṉe' chseḻa', neda'czen' chosolebe' še ca', na' beṉe' chosolebe' neda' ḻecze chosolebe' Dios beṉe' gwseḻe' neda'.

²¹Beyož gwna Jesúsen' ca' ba gwzolao chacyaše'chgüede' ḻo' yic̱hjlažda'ogüen', na' bochix̱gaten' gwne': ―Da' ḻi chnia' le'e, to le'e gwdelenda' ḻo na' beṉe' chesegue'e neda'.

²²Na' beṉe' ca' zjanaque' ḻe' txen con cheseṉa' cho'alao ḻježe' chesone' xbab c̱he noen' gwne' ca'.

²³Na' toe' chi'e cuiten' dan' chaquechgüe' Jesúsen' ḻe'.

²⁴Nach Pedron' bene' señw len bena' cont gwṉabde' Jesúsen' no c̱hen' gwne' ca'.

²⁵Nach gwbigue' bago gože' Jesúsen': ―¿Non' gon ca'?

²⁶Na' gož Jesúsen' ḻe': ―Bena' gwnežjua' late' yetextilen' cate' ba bḻo'ojan' ḻo' nis yeḻa' guagon', ḻe'na' gon ca'. Nach bḻo'oje' late' yetextilen' ḻo' nis yeḻa' guagon' na' bnežjuen' Judas Iscariote beṉe' nac xi'iṉ to beṉe' le' Simón.

²⁷Na' beyož bnežjue' Judasen' yetextilen' ḻa' gwyo'o gwyazte Satanás dan' chnabia' da' x̱igüe' ca' ḻo' yic̱hjlaždao' Judasen'. Nach Jesúsen' gože' Judasen': ―Da' ba zoa gono' benen bedao'nez.

²⁸Na' ṉe to ben' zjachi' cho'a mesen' bi gosejni'ide' bixc̱hen' gože' ḻe' ca'.

²⁹Baḻe' gosacde' da' nox̱e' Judasen' bols mechon' Jesúsen' gože' ḻe' šjax̱i'e da' cheseyažjde' ḻo ḻṉin' o šjanežjue' mechw da' chyažje no beṉe' yaše'.

³⁰Nach cate' beyož gwdagw Judasen' pedas yetextil dan' bnežjw Jesúsen' ḻe', ḻa' bchojte'. Na' ba nac ba goḻ gual.

³¹Gwde bchoj Judasen', Jesúsen' gwne': ―Diosen' gwseḻe' neda' golja' beṉac̱h na' ṉa'a ba nḻa'laon naca' beṉe' zaca' juisyw, na' neda' ḻecze ba chlo'a Diosen' naque' beṉe' zaca' juisyw.

³²Na' dan' chlo'a naque' beṉe' zaca', ḻecze ḻe' gwlo'e naca' beṉe' zaca', na' ḻa' gontien' ṉa'a.

³³Xi'iṉda'ogua', yešložga soa' len le'e. Na' yeyiljwle neda', na' chnia' le'e dan' goša' beṉe' gwnabia' c̱he nación Israel c̱hechon', bi gac sa'lenḻe neda' gan' yeya'an.

³⁴Na' to da' cobe chžia' bia' gonḻe, gaque ḻježle tole yetole. Can' chacda' le'e, ḻecz can' cheyaḻa' gaque ḻježle tole yetole.