Yohana 13:8-34

⁸Petulo ngannengela, “Mwe unyeleaje makongono!” Yesu ngajanga, “Anda nukunnyeleaje mme nanengaje pamwe kabele.”

⁹Simoni Petulo nganyanga, “Angwana makanyelea makongono tuje, unyeleye na maboko gango na mutwe uyo.”

¹⁰Yesu ngannengela, “Ojwa jomwi kujoga apaligwije ukuya ila makongono gambu abi chwapi mmele gwoa, mangweto mmi chwapi nambu mmoaje.”

¹¹Yesu ammanyi ojwapakung'aluka, nga maana alenga, “Mmoaje mammi chwapi.”

¹²Pajomola kajelea makongono nukwinda kabele lutando lwakwe, ngatama pamecha ngabalenge, “bo, mmanyingite genia aganantendelinge?

¹³Mangweto ungema aboli na Angwana, mangweto nnonge chambone, ngapambile.

¹⁴Bai andane nambi naboli na Angwana nannyeleinge mangweto makongono, na mangweto mpaligwa kujeleana makongono.

¹⁵Nampilingite kulandanakia ibe mangwetumwe ntendi andi panantendilinge

¹⁶Nannengelanga kweeli, mmanda nkolongwaje kumpeta nngwana mundu, wala ndundame nkolongwaje kupeta jwajo ojwantumite.

¹⁷Bai anda mmikumanya genia mammaganga mbaya anda magatendite.

¹⁸“Ganga ganongela gano giinu mmoaje. Ne namaanyi banachagwile. Nambu mpaka oti gatimie Majandiko Machwapi agalenga, ‘Jwajo jwali chakulya chango ang'alambwike.’

¹⁹Nenga nannengalinge ilebe yenje ngoe tango nukupitilaje, ibe paibakupitila mpatange kuamini kube ‘nga nenga.’

²⁰Nannenge kweli, ojwampoke jwajo junantuma amboke ne, na ojwamboke nenga bapoke abandumite.”

²¹Pajomola kulonge genia, Yesu ngaechuka umwojo ngachalakicha kulenga, “Nannenge kweli, jumwe kati jinu apakung'aluka.”

²²Akinapunji ngabalolana, baotwije kumanya bannonge mmene.

²³Jumwe kati ja akinapunji, jwombe Yesu ojwakampala muno, akiba atamite papipi na Yesu.

²⁴Simoni Petulo ngankinyila nukulenga, “Makonye balonge geniago kwa magambu ga beneke.”

²⁵Napunji jwenio ngaegelela papipi muno na Yesu, ngankonya, “Angwana, nga beneke?”

²⁶Yesu ngajanga, “Jwajo jwambakumpe kipande cha nkate chanelite muchaani, ngajweno.” Bai ngatola kipande cha nkate ngalela muchaani ngampe Yuda mwana jwa Simoni Isikalioti.

²⁷Yuda papokela kipande chenie, Lichetani ngilinnyingila. Yesu ngannengela, “Champakutenda ntende chokwe!”

²⁸Nambu akibaje wala jumwe kati jabe ojwatamite pamecha ojwaamanyi alenga genia kwa magambu gani.

²⁹Kwa magambu Yuda akiba mmeka ela kati jabe, bapemelela Yesu annenge Yuda ajende akaemele eipaligwa kusikukuu, andaje annenge apange chachotichela kwa akaocho.

³⁰Bai Yuda apajomola kutola kipande cha nkate chela ngapita panja chokwe. Ikiba kilo.

³¹Kuboka tu Yuda, Yesu ngalenga, “Ngoe Mwana jwa Mundu akoigwe, na Nnoongo akoigwe nkati jakwe.

³²Na anda kibumo cha Nnoongo kiekwike nkati ja Mwana, bai mwene Nnoongo apakuekula kibumo cha Mwana nkati jakwe mwene, na matenda genia chokwe.

³³Akinangota bango, tango mbi namangweto kwa kingobu chenje tu. Mpakumbala, nambu ngoe nanenge gaga ganalengela achilongochi ba Akayahudi, ‘Kunyenda mangweto kuotoje kujenda!’

³⁴Nampeganga amuli nhyono, mpalane andi panampalanga mangweto.