Juan 13:8-34

⁸—A, aijama. Ecue ehuachi tuque micue utsanime ama. —Era ni micue utsaya ama, tumemi ecuique ama, —jadyatu Jesúsra acuare Pedro.

⁹Jadya bacatsutu Simón Pedrora jadya acuare: —Jutaquiju ehuachiju camadya ama utsacue, Ecuana Cuatsashaquique. Jutaquiju ecue utsacuedya emetucu, iyuca jadya.

¹⁰—Ejeque iyaja cuita enahuiquetu utsataqui ehuachiju camadya, ecuita jidadya asicadama tibu. Yusura micuanaja jucha cuana apupashahuaju micuana butseeju nahuihua bucha. Yusura tuque micuanaja jucha cuana amena apupashahua. Aniyatu rehua peadya tuja jucha cuana apupashamaque. Tumequedya tu asicadaque buchique, —jadya ecuana Jesúsra acuare.

¹¹Jesústu bahuedya jucuare ejera ecuana tuque ujeu baqui cuana queja inamereyaque. Jadya tibudyatu “Aniyatu peadya micuana ducu jucha cuana apupashamaque”, jadya jucuare.

¹²Ecuana dutya huachi utsatilla jadya aatsutu Jesús dyaque jutu ishuque cajututinucacuare. Cajututinucatsutu mesaju anibutenucacuare ecuana tsehue. —¿Adebayadya micuana era eje bucha juatsu micuana ehuachiju utsahuaque?

¹³Micuanara ique “Ecuana Bahuityaquique, Cuatsashaquique” jadya isarae aya. Tuyudya micuanara jadya isarae aya, ique jadiquedya tibu.

¹⁴Arepa ique Micuana Cuatsashaquique, Bahuityaquique ama bucha, era micuana huachi utsahua, peya cuana tsahua juyara aya bucha. Jadya tibudya micuana jadya cutsatie ehuachi necaticue, peya cuana tsehue yurameta catsahuaticaraque cabamereti ishu.

¹⁵Era micuana bamerehua micuana eje bucha jutaquique. Jutaquiju necatsahuaticue peya cuana tsehue, era micuana tsahuahua bucha.

¹⁶Pusha amadya micuana cuejaya. Mere puji tunajatu patrón muibaya bucha mui bae ama aya. Ecuadishaque bacue tuque cuadishaquique bucha muie ama aya.

¹⁷Micuanaratu bacayadya, jeeque era jadya ayaque. Micuanara ni peya cuana tsahuaya, era micuana tsahuahua bae, dyaque jida micuana judadiya.

¹⁸“Dutya ama micuana Yusura dyaque jida amereya. Era micuana peadya peadya adebaya era mepehuaque. Peadyara micuanara ique ujeu baqui cuana queja inamereya. Yusuja quisarati ehuene baedyatu juya: “Eatsehue araarayara ique bijidamadurabuque”.

¹⁹Icueneta cuejadya micuana aya riyaque, ique inameretama jarijudya. Era cuejahua bae cuitadya juhuaju, tuque micuana ejeneya ique Mesiasque, era micuana cuejahua baedya.

²⁰Ejera ni era cuadishayaque jida batsaya, tumebaedya tunara ique jida batsaya. Ejera ni ique jida batsaya, tumebaedya tunajatu Ique Cuadishaquique jida batsaya, —jadya ecuana Jesúsra acuare.

²¹Jadya ecuana cuejatsutu Jesús dyaque capeya inimeticuare. —Yuneridya peadyara micuanara ique ujeu baqui cuana queja inamereya, —jadya tujatu quisarati acuare dutya ecuanaja baca ishu.

²²Jadya quisaratiyaju bacatsu ecuana yurameta capetatibare jucuare. Bape bapedya jutidya tuque ecuana inime tupucuare ejeque tura jadya ayaque.

²³Ique Jesús aniya peque anicuare, ique Jesúsja dyaque iyuhuedaque jucuareque.

²⁴Tume ique Simón Pedrora tuja emetucu tsehue piyecuejacuare. Bacaduramerecara tura Jesús acuare ejera inamereyaque.

²⁵Tume ique Jesús queja jipetanacuare. Tuaqueja pana cajipeti juatsu tuque bacaduracuare: —Ecuana Cuatsashaquique, ¿airami inamereya? —jadya tuque acuare.

²⁶—Pan cuesi tuque enameju mullaya. Mullatsu micuana ejequedya tyaya. Ejeque era tyayaque, tudya tume, —jadya Jesúsra acuare. Jadya juatsu tujatu mullacuare pan cuesi. Tume tujatu tyacuare Judas Iscariote, Simónja ebacuaque.

²⁷Judasratu pan cuesi inatsacuare Jesúsra tyayaque. Inatsahuajutu Ijahua tuaqueja nubicuare tuque tura amereya eque amere ishu. Jadya ahuajutu Jesúsra Judas acuare: —Mira eje bucha acara ayaque, acue iyaja cuitadya, —jadyatu Jesúsra acuare.

²⁸Ecuanaratu adebacuare ama eje bucha juatsu Jesúsra jadya isarae ahuaque.

²⁹Judastu jucuare chipiru quiniquique caja caca naruquique. Umaeja tuque ecuanaja inime jucuare: —Jesusratu Judas jadya ahua, earaqui chine ishu ara ishu quemira cuaishu. Peya cuanajatu inime jucuare: —Jadya tujatu ahua, Judas queja nerecada cuanaque chipiru tyamerecara aatsu, —jadya tuque ecuana cuji cuita juatsu inime tupucuare.

³⁰Judastu pan inatsa jadya aatsu apuda ducu diruquenacuare.

³¹Judas cuinanahuajutu Jesús quisaraticuare: —Masadama IQUE ECUITA muitaya. Ique eje bucha ataya equetu ecue Etata muitaya.

³²Era Yusuja casa dyaque aniyaque bamereya buchadya tura bamerenucayadya ecue casa dyaque aniyaque. Tsunutaya amatu jadya juyaque.

³³Amena tsunudama micuana tsehue aniya, micuana ecue ebacua bucha cuanaque. Sareya datse micuanara ique. Iyacua micuana cuejaya, ecuanaja huaraji cuana icuene cuejachineque: “Ique eju diruyaju micuana judirutaqui ama”.

³⁴Jeeque cacuatsashati iyacuaque micuana cuejaya: “Iyuhueda necabaticue micuana cama. Era micuana iyuhueda baya bucha iyuhueedya micuana necabaticue dutya peya cuana tsehue”.