JOSUA 8:22-35

²²Eme bâbâni hae rombiŋ jaŋe wahambiŋ. Ehuc bune râpene ejarehuc fitac‐jopapie Israe ŋic jaŋere ŋondeŋko domambiŋ hâcne. Ehame Israe ŋic jaŋe imac‐jopakupie moczi moc mi wise‐jâmbâŋkewec.

²³Â Ai haere ŋicwofuŋ e ine ɋâricne rorâ Josuarao barambiŋ.

²⁴Eme Israe ŋic jaŋe Ai hae rune mâreŋ sawao ʒikazi jopaku jopa mizierâ Ai haeo risierâ ŋecjucfâc‐ticne iŋuc jaha ʒikazi ima samaki bacjopambiŋ.

²⁵Eme ʒoaŋ ira Ai haere ŋic ŋokac sasawa jopambiŋ i ʒare‐jeŋic qâhâckepie 12 tauseŋ ewec.

²⁶Josua e ine damu sicnerâ badomawec i mi fâre suruckeha Ai haere ŋecjucfâc ʒeŋgoma jopa miziembiŋ hâcne.

²⁷Wofuŋzi Josua mutâcnecnewec irec sâcko Israe ŋic jaŋe bulimakao â hae irec wiac gâcne i sawa jaŋacne biŋe eocte rombiŋ.

²⁸Josua e Ai hae ʒoczi turuŋkeme ʒarâ sesucne fuawec i dameŋ ʒiŋuczia ŋekac jaha.

²⁹Eme Josua e Ai haere ŋicwofuŋ qarâ jâc mocko ɋetickeme domaha hae owâewec. Ehame ʒoaŋ huzo eha Josuazi ŋic ejareme qâŋɋâŋ‐ticne jâckonec batararâ haesac motâcko sârockepie hume fainao qânâ he fembiŋ i dameŋ ʒiŋuczia ŋekac wâc.

³⁰Eme Josuazi Ebali tikio Israe ŋic jaŋere Wofuŋ Anutu ere alata moc bawec.

³¹Wofuŋte kiŋaŋŋic Mosezi sâcmutâc dâŋko mu qâreŋ ewec irec sâcko bawec. Dâŋ kecʒiŋuc fowec: “Ŋiczi qânâ qa hefâuc mi ekicne furune rorâ banʒepieŋ,” alata iŋucne barâ Wofuŋte âsu biaŋ â wama bâzi rikembiŋ.

³²Eme Mosezi sâcmutâc dâŋ qâreŋkewec i Josuazi Israe ŋic ŋokac jaŋere maio qânâ faio hâsine qâreŋkewec.

³³Eme Israe ŋic sasawa, mafa â hae fâri, jaŋe soŋaŋ â micne â mumutara ŋicfâc‐jeŋic jaŋehec katapa ŋifec â ŋifec domahuc Lewire guruonec taha bapa Wofuŋte ʒâʒâfic katapa reŋkembiŋ jaŋe maic‐jopambiŋ. Ehuc guru moc jaŋe Geriʒim tikiopec â guru moc jaŋe ine Ebali tikiopec iŋuc domambiŋ. I Wofuŋte kiŋaŋŋic Mose mârâcko Israe ŋic ŋokac jambuŋ‐jopaniŋte mutâcne‐jarewec irec sâcko embiŋ.

³⁴Eme Josuazi dâŋ sasawa sâcmutâcte papia qizecko qâreŋkekicne irec sâcko jambuŋ â sâwecdâŋ i wose‐fârewec.

³⁵Mosezi dâŋ sasawa mutâcnewec i Josuazi Israe ŋic â ŋokac naru motec â mafazi jaŋehec jumbiŋ jaŋe ʒeŋgoma tumaŋnehapie wose‐jarewec hâcne.