JOSUA 1:1-15

¹Wofuŋte kiŋaŋŋic Mose e hâmohame Wofuŋzi Nuŋte ŋokâ Josua, Mose babafic‐ticne hâcne, e ʒiŋuc âzâcnewec:

²“Kiŋaŋŋic‐nane Mose e hâmowec. Irec go â ŋic ŋokac sasawa ŋoŋe faharerâ Jordaŋ ocniŋucnao raʒiniŋ, mâreŋ i hâcne Israe ŋic ŋoŋe ŋarekopac.

³Mâreŋ sasawa kike‐ŋeŋiczi âteniŋmu i Mose mupaŋkecnepo irec sâcko ŋarekopac hâcne.

⁴Mâreŋ burocnaonec fuŋkerâ wareku Lebanoŋ mâreŋ ʒira fisirâ raku Eufrata opâ sâkoo mickekac, erâ wâc ʒoaŋ huhunao Hâwec Sâkoopec mâreŋ forakac, Hitiŋic jaŋere mâreŋ sasawa hâcne, i ŋoŋere efâreocmu.

⁵Juju dameŋ fogareocmu sâc ŋic moczi sâcne mi bawahacguocmu. Mosehec jupo irec sâc jaha gohec jupemu. No behecgupe bekâ mâsiŋ moc mi ecmu.

⁶Go sanaŋkerâ hâbige roc. No mimi ŋosafâc‐ŋeŋic mupaŋke‐jarehuc mâreŋ biŋe qajarepo i jarepe ro rauc eniŋte bâtâc bajarezemec.

⁷Mocjaha, go sanaŋkerâ hâbihec ezemec. Â Mose kiŋaŋŋic‐nanezi mumupaŋ dâŋ râehuc mutâcne‐garewec irec sâc aimuŋ juhuc wiac ebac ezore manasuzemec, ehuc fâreopec me qanaopec moc mi qâsoriezemec. Iŋuc ehuc gie i me i batec fârine biaŋne fuaocmu.

⁸Papia qizec ʒirec maŋnao sâcmutâc dâŋ fokac i gore micko hati fuahuc fozejec, â ʒoaŋko me ŋafeo irec manatâc qâtâc ezemec. Ehuc wiac sasawa qâreŋkekicne fokac irec sâcko jucmurâ manasuzemec. Go iŋuc ehuc jucmuo ine giege fârinehec eocmu.

⁹Go sanaŋkerâ hâbige rocmurâ mi gazapo me? Irec hâwicgume maŋge mi gâckezejec. Wofuŋge Anutu no jucmu sâc gohec jupemu.”

¹⁰Eme Josuazi ŋic ŋokac micnefâc‐jeŋic kecʒiŋuc mutâcne‐jarewec:

¹¹“Ŋoŋe teuŋ sâc fotâcnehuc ŋic ŋokac ʒiŋuc jazaniŋ: ‘Ŋoŋe nânâ‐ŋeŋic rike bâmoc efâreniŋ. Eme ʒoaŋ jahec â moc ehame Jordaŋ opâ ʒi fotâcnerâ Wofuŋ Anutu‐ŋeŋiczi mâreŋ ŋarekac i ro rauc eniŋte raʒinʒepieŋ.’”

¹²Eme Rubeŋ â Gade jahere ɋâricfâc â Manasere ŋicguru dâkâne jaŋe mâmâc Josuazi ʒiŋuc jazawec:

¹³“Wofuŋte kiŋaŋŋic Mose e dâŋ ʒiŋuc muhuc ŋaza qâmoc ewec irec manasunʒepieŋ: ‘Wofuŋ Anutu‐ŋeŋic e ŋoŋe jumananiŋte manahuc mâreŋ ʒi hâcne ŋarekac.’

¹⁴Mosezi Jordaŋ ʒiŋucnao mâreŋ ŋarewec forakac ira ŋokac naru motec â bulimakaofâc‐ŋeŋic jaŋe junʒepieŋ. Juhapie ŋic sanaŋne tâpirichec ŋoŋe ʒikare ʒawierâ opâ fotâcnerâ ŋifecnao qomâfâc‐ŋeŋic bânie‐jarehuc bafic‐jopanʒepieŋ.

¹⁵Ŋoŋe iŋuc ehuc juhapie, Wofuŋzi ŋoŋe juju mana mâreŋ ŋarewec iŋuc jaha ɋomâfâc‐ŋeŋic jaŋe jareocmu. Eme jaŋe Wofuŋ Anutu‐ŋeŋiczi mâreŋ jareme ro rauc ehapie ŋoŋe wâc risierâ mâreŋ‐ŋeŋicko junʒepieŋ, Wofuŋte kiŋaŋŋic Mosezi Jordaŋ ʒiŋucpec ʒoaŋ wewefunao mâreŋ ŋarewec ira hâcne.”