JOSUA 10:4-14

⁴“Gibeoŋ haeonec jaŋe Josua â ŋicfâc‐ticne jaŋehec wama qaqac embiŋte ŋoŋe wefurâ baficnupie imac‐jopanʒepeneŋ.”

⁵Eme Amori ŋic jaŋere ŋicwofuŋ 5: Jerusalemte ŋicwofuŋ, Heboroŋte ŋicwofuŋ, Jaramutire ŋicwofuŋ, Lakisire ŋicwofuŋ â Egeloŋte ŋicwofuŋ jaŋe momorifâc‐jeŋic jaŋehec ferâ Gibeoŋ hae ŋifecnao teuŋ âterâ juhuc ʒika gie bambiŋ.

⁶Eme Gibeoŋ ŋic jaŋe Giligali teuŋko Josuarao dâŋ ʒiŋuc râepie rawec: “Kiŋaŋŋicfâcge nâŋe mi mac behec‐nâpohuc bâruŋ jaha wefurâ ŋezic‐nâpohuc bafic‐nâponiŋ. Amori ŋic jaŋere ŋicwofuŋ tiki mâreŋko jueŋgopieŋ, jaŋe sasawa roroc erâ râsi fisi‐nâreŋgopieŋ.”

⁷Eme Josua â momori ŋic tâpiri wânʒâŋhec sasawa jaŋe Giligali teuŋkonec ferambiŋ.

⁸Ehame Wofuŋzi Josua âzâcnerâ muwec: “Mi hâwicguoc. No gore meo râec‐jopa‐fârepore moczi moc mi sanaŋkeocmu.”

⁹Eme Josua e Giligali teuŋkonec ŋafe hata juku ututuŋ jaha jaŋerao fisiwec.

¹⁰Fisi‐jareme Wofuŋzi râsi mutuc bacjopame bipic tatara ejareha Israe ŋic jaŋe Gibeoŋ hae mendâŋko mâretec imac‐jopambiŋ. Ehuc jopa jâpec ejare raku Betehoroŋ heâŋne i fotâcnerâ raku Aʒeka â Makeda haeo fisirâ iŋuc jaha jopambiŋ wâc.

¹¹Jaŋe Israe ŋic wise‐jarehuc Betehoroŋ heâŋ‐ticne fotâcnerâ Aʒeka haeopec huhapie Wofuŋzi sambâŋkonec qânâ kâcɋene wicke‐jareme hata ŋondeŋko hâmo sipiric embiŋ. Israe ŋic jaŋe ʒikazi jopambiŋ irec sâc jâuruhuc aisi hândâŋzi hecjopame hâmombiŋ.

¹²Wofuŋzi Amori guru Israe ŋic jaŋere meo râec‐jopawec ʒoaŋ ira Josuazi Israe ŋic ʒâŋe fai‐jeŋicko Wofuŋ numucnehuc ʒiŋuc muwec: “Ʒoaŋ go Gibeoŋko sanaŋkerâ ŋec â mosa go wâc Ajaloŋ wâneŋ‐ticnao sanaŋkerâ ŋec.”

¹³Mume ʒoaŋ e sanaŋkerâ ŋewec â mosa e iŋuc jaha ewec. Iŋuc fuame Israe ŋic jaŋe râsifâc‐jeŋic jaŋehec ʒika gie batarambiŋ. Binaŋ ʒi Jasa ere papia qizecko qâreŋkekicne fokac. Ʒoaŋzi ʒâʒâŋiŋ jâmbâŋ niniŋkerâ ŋehuc juha ʒoaŋ gie bapa moc tarawec.

¹⁴Mârâc jaha Wofuŋzi ŋic mocte dâŋ manahuc ʒoaŋ gie bapa iŋucne moc mi bâfuawec â irec faicnao wâc aricne. Wofuŋzi Israe ŋic jaŋere erâ ʒika gie bawecte iŋuc fuawec.