JOSUA 10:18-37

¹⁸Eme Josuazi muwec: “Qânâ kâcɋene qârândiŋkepie hawec motâcne ŋebâzickeha soŋaŋ râec‐jopanʒepieŋ.

¹⁹Â ŋoŋe ŋaŋacne ira mi juhuc râsifâc‐ŋeŋic jâpec‐jopahuc râpec‐jeŋicko kikeo kikeo ejarenʒepieŋ. Wofuŋ Anutu‐ŋeŋiczi meŋeŋicko râec‐jopawecte behec‐jopapie haemaŋ‐jeŋicko mi raʒi‐jâmbâŋkenʒepieŋ.”

²⁰Eme Josua â Israe ŋic jaŋe ima samaki bacjopakupie moc moc sawazi wiserâ hae sanaŋ‐jeŋic sâc raʒimbiŋ.

²¹Ehame Israe ŋic jaŋe furu jaha Josuarao Makeda teuŋko risiembiŋ. Eme dameŋ ira râsifâc‐jeŋic jaŋe pepec i me i moc ejareniŋte hâbi‐jeŋic basambiŋ.

²²Eme Josuazi muwec: “Hawec motâcko qânâ bârâriehuc ŋicwofuŋ 5 bacjopa wareniŋ.”

²³Eme jaŋe iŋuc erâ ŋicwofuŋ 5 Josuarao bacjopa fisimbiŋ, ine kecʒiŋuc: Jerusalemte ŋicwofuŋ, Heboroŋte ŋicwofuŋ, Jaramutire ŋicwofuŋ, Lakisire ŋicwofuŋ â Egeloŋte ŋicwofuŋ.

²⁴Ŋicwofuŋ i bacjopa fisipie Josuazi Israe ŋic hetumaŋ‐jopa‐fârerâ momori micnefâc‐jeŋic ʒiŋuc jazawec: “Ʒira warerâ kike‐ŋeŋiczi ŋicwofuŋ ʒi jaŋere upeo âteniŋ.” Mume jaŋe bembeŋko rarâ kike‐jeŋiczi upe‐jeŋicko âtembiŋ.

²⁵Eme Josuazi jazawec: “Manabâc erâ mi hâwic‐ŋopaoc. Sanaŋkerâ hâbi‐ŋeŋic roniŋ. Wofuŋzi râsifâc‐ŋeŋic jaŋerao mâsi iŋuc bafâreocmu hâcne.”

²⁶Eme Josuazi qâhâmoc‐joparâ jâc 5 ira ɋetic‐jopame domahapie hae owâewec.

²⁷Eme ʒoaŋ otewerâ huzo ehame Josuazi ejareme qâŋɋâŋ jâckonec batarac‐joparâ qânâ hawec soŋkerâ jumbiŋ ijaha sâroc‐jopapie hupie qânâ kâcɋene bocjaha qârândiŋkepie motâcne ŋebâzickewec i dameŋ ʒiŋuczia ŋekac jaha.

²⁸Eme ʒoaŋ ira Josuazi Makeda hae rorâ ŋicwofuŋ â kikefuŋfâcne ʒikazi imac‐jopawec. Erâ wiac jujune moc mi akic‐jopahuc sasawa bâsirowec‐jopawec. Â Makedare ŋicwofuŋ e ine Jeriko haere ŋicwofuŋ ecnewec irec sâc jaha ecnewec.

²⁹Eme Josua e Makedanec fahareme Israe ŋic jaŋe bâjâpepie Libina haeo ʒika qaniŋte rambiŋ.

³⁰Eme Wofuŋzi hae i iŋuc jaha Israe ŋic jaŋere meo râeme Josuazi hae mecne ŋicwofuŋ mecne erâ wiac jujune moc mi akic‐jopahuc ʒikazi imac‐jopa‐fârewec. Ehuc ŋicwofuŋ‐jeŋic e Jeriko haere ŋicwofuŋ ecnewec irec sâc jaha ecnewec.

³¹Eme Josua e Libinanec fahareme Israe ŋic jaŋe bâjâpepie Lakisi haeo rarâ teuŋ âterâ juhuc ʒika qambiŋ.

³²Ehame Wofuŋzi hae i iŋuc jaha Israe ŋic jaŋere meo râeme Josuazi Libinao ewec irec sâc jaha ehuc hae fureme raʒirâ wiac jujune sasawa ʒikazi imac‐jopawec.

³³Ehame Geʒera ŋicwofuŋ Horam e Lakisi ŋic bafic‐jopaocte wefuwec. Eme Josuazi e â ŋicfâc‐ticne ʒeŋgoma imac‐jopawec.

³⁴Eme Josua â Israe ŋic jaŋe Lakisinec Egeloŋ haeo rarâ teuŋ âterâ juhuc ʒika qambiŋ.

³⁵Ehuc ʒoaŋ ijaha hae ro rauc erâ Lakisio embiŋ irec sâcko hae ima bahuc wiac jujune sasawa jopa miziembiŋ.

³⁶Ehuc Josua â Israe ŋic jaŋe Egeloŋnec Heboroŋko fembiŋ.

³⁷Ehuc hae i rorâ ʒika qahuc hae â ŋicwofuŋ â hae piticfâc‐ticne erâ irec maŋnao wiac jujune moc mi akic‐jopahuc ʒikazi imac‐jopambiŋ. I Egeloŋko embiŋ irec sâc jaha ehuc wiac jujune ʒikazi bâsirowec‐jopambiŋ.