Jon 12:5-27

⁵Agai te po wai, “Te we agai te wel dabolo menama, tama dago te wel munama, gasa bidigo abelegi sogo da, teda dago masigi hauwa 300 kina sigi dao. Te sę egi sogo da, teda te masigi ge dago te nai meni yai we bidibolo magi da. Magi baso agai te tiwai sę ebewe?” Judasgo te po wai.

⁶Judas agai te nai meni yai we bidide homu dene elama, te po wabeo. Menio. Aga nai wi sabo bidi bidai dao. Tama agai te Jisas wali pabo bagego masigi mubo halobage tolalu, tama aga te halobagede mubo masigi deli deli sogo meba wi sai dao.

⁷Tialima Jisasgo te po Judasbolo wai, “Te we tagalao, wado po wagio. Agai te wel tolalubadi, ena gų pageba muabo sogo asobo si, te wel ena tigide mumainao.

⁸Nai meni yai we bidi augwali dage dali sesemane sogo bidaibao. Tama tibaso, dagego augwali tau sabo sogo hauwa elaluaibao. Tialima, ena da dage dali sesemane sogo bidigobeo,” Jisasgo te po wai.

⁹Te Juda bage hauwa mu augwaligo Jisas te be nani Betanide bidibo po odolama, tama teba Jisas sugi pai. Augwali Jisas naga suainogo asobeo. Augwaligo Lasarus te Jisasgo polobadu gų pagede ma hodolali bidi dao obaso, te Lasarus me augwaligo suainogo asai.

¹⁰Tama tibaso, te pris hani tobolu bidi dabe augwaligo Lasarus me elabo po miai.

¹¹Magi basowe? Juda we bidi hauwa augwaligo te Jisasgo Lasarus dali yali sęde homu elama, tama augwaligo te pris bage wali pabo tagalama, tama augwaligo augwa homu tigidali Jisasba naga muani.

¹²Umabo we bidi augwali Jerusalem moni hanuba asai dao, te Pasova olo bidibo side. Tama do tama wabo sogo augwaligo Jisas Jerusalem buluba asaibao wabo po augwaligo odai.

¹³Tama tibaso, genuai bidi asobo homu eyu, augwaligo te ni sebedi nologo tiwai ni selama, Jisas tųdu tiąba pai. Augwaligo bomo elama, i wai, “Dago Godigo nogi ugwaba sao. Dago te bidi nogi ugwaba sao. Aga Genuai Bidigo nogide asai. Aga da Israel bidi dabego tuni bidi dao,” augwaligo te po wai, Jisasde. Te genuai bidi dabe augwali genuai wiegi yai kibu hos tudide dualasa pabo dao.

¹⁴Tialima Jisas aga nagamea pai homu eyu, tama gasa kibu hos nogi donki, te donki wai selama, tama te donki wai tudide dualasa pai. Te yali sę te Godigo bukude wali po egilama, te po tama wai,

¹⁵“Te dage Jerusalem hanu tomode bidiyu te bulu du nogi Saion tede bidibo bage, dage wi egio. Suao. Dagego tuni bidi asobo, aga kibu donki waide dualasa asobao,” te po polobadu bukude tama po asęani.

¹⁶Te sę yali sogo Jisas wali pabo bidi dabe augwaligo te sę page konebeo. Tiali goli nosali Jisas dagaluba hodaluama, aga genuai nogi dali, genuai bomo dali si ma selama, te sogo augwaligo te bukude asęani po ma koneai. Te po ma koneyu, augwaligo te homu yai ‘Jisas te kibu donki wai tudide dualasa pali me, te we bidi augwaligo wali po me, te po si polobadu bukude asęani po wali peyu, te sę yai.’

¹⁷Polobadu Lasarus isilama, gų pagede munalubadi, tama we bidi hauwa augwali Jisas aga dali bidibadi, tama agai Lasarus i olama, hodolai, tama augwaligo suai. Megi te we bidi hauwa augwaligo Jisasgo te yali sę po te gasa buludu tamadi asai we bidibolo pusai.

¹⁸Te tamadi asai we bidi augwaligo Jisasgo te bomai sę yali po odobaso, tama augwali Jisas tiąba pai.

¹⁹Tama te Farisi bage augwaligo te we bidigo te sę ebo sulama, tama augwa hasi po weyu, te po wai, “Megi dagego koneao. Agade dago yali sę usu ebeo. Tigidali tǫde bidibo we bidi augwaligo aga wali poba,” te Farisi bage augwaligo te po wai.

²⁰We bidi umabo augwali te olo bidibo side Jerusalem hanuba holama, lotu po Godibolo wainogo yai. Tama Grik bidi hani bidi me badu augwali me Jerusalem hanuba lotu po wagasai.

²¹Te Grik bage augwali Filip pageba asai. (Te bidi Filip aga page bulu te Betsaida be nani, te Galili tǫde.) Tama te Grik po wabo bage augwaligo Filipbolo hanaluyu, te po wai, “Edao, dago Jisas gedugo sulama, te bidi deli dali dago po mieo,” te po wai.

²²Tama tilama, Filip te bidi Andru pageba pelama, tama agabolo te Grik bagego hanalu wali po pusali. Tama pusulama, tama Andru dali, Filip dali augwali si pelama, Jisasbolo te Grik bidi dabego wali po wagi pai.

²³Tama Jisasgo augwali dali po wei ponoyu, te po wai, “Te Godigo Bidi Mu aga moni nogi dali, moni bomo dali, te si sabo sogo mu pedalai dao, megi.

²⁴Eno mu po dagebolo obao, te nai wit wai tǫba tulaluai, te pedama, kulubi holisiąyu da, te agaduba deli bidaibao, te tǫde daumua paibao. Tialima, aga pedama, kulubi pedaliyu da, te agai nai hauwa walaibao. Te ena me tiwai dao.

²⁵Tama te tiwai bidi aga tǫde bidibo sogode aga tobade aga digi dąų obaso da, teda nosali te bidi aga mu bidada pabo sogo mu hagawaibao. Me ma, bidigo e tǫde bidibo sogo aga digi tudiba muyu da, te bidi aga bidibo sogo mu elaluaibao, aga bidada peyu, bidada paibao.

²⁶Niwai bidi me deligo eno sę yainogo ebo bidi, te bidi aga ena wali asao. Tama ena bidibo bulu, te bulude naga eno sę ebo bidi ena dali bidaibao. Bidigo eno sę ebo bidi, te eno Ayago te genuai nogi mawaibao,” Jisasgo te po wai.

²⁷Agai po ma weyu, Jisasgo te po wai, “Megi eno homu sęgę mu eyu, midigi ebao. Tama eno magi po wagowe? Tiyu eno te po wagawe, ‘Aya, nago te enabolo tamadi pedalainogo ebo sę sela sąyao, enaba asidali.’ Eno te po wagawe? Woo, te po eno wagobeo. Tialima, te tiabo sogo ena pedalagasai dao, te ena dene somainogo yaibao.