Jon 12:5-27

⁵“Sur asa ning bel di siuran a koto na tomtoboh ne sur a ngas a arlou tagun a takai a rau kidol, sur dir tabar a kapan a taraila ono?”

⁶Bel i maris a kapan a taraila. I atongi larne, anasa i sira tai alar anunla mani pa i sira kinau kumnani, anasa i a tena kinkinau.

⁷Ning e Iesu i longor a warwara ane Judas, i kelesi mange, “Noren a hane ning, i tol a titol ne hok sur a pukakiar ning ar mat pa dir akas iau ting na kulam a minat.

⁸A kapan a tarai lar laun mokos taum o mulo, ika iau bel ar kes tikin napirimulo.”

⁹Ning a kunum a tarai tagun a tarai Juda la longori mang e Iesu kano e Betani, la han uto. Bel la han sur lar oroi e Iesu ka, la han otleng sur lar oroi e Lasarus, ning e Iesu i alaun pasi kusun a minat.

¹⁰Pa a leklek a tena artabarla la wolwol sur lar umkol e Lasarus otleng,

¹¹anasa a galis a Juda la han kusun la pa la tortorot o e Iesu, kamkamna o e Lasarus.

¹²Ana pukakiar lamur a tnan kunum a taraila ning la hanot sur a lotu na Han Lakai, la longori mang e Iesu otleng kaning i han amon usaot e Jerusalem.

¹³La los pas a paka baibaila pa la han sur lar barat e Iesu. La kukuk mange, “Hosana! Esaning i hanot ana risan a Leklek i angis.’ A King anuna tarai Israel i angis!”

¹⁴E Iesu i ben pas a dongki, pa i kes saot onoi, larning a Buk Tabu ka atong tari ono mange,

¹⁵“A tarai Saion, gong mulo matmataut. Oroi, anumulo a king i hanot, i kes ana nat a dongki.”

¹⁶A kakak a asaerla ane Iesu bel la tasmani mang a ututnala ning di ka tumus nigon tari ting na Buk Tabu. Ika ning e Iesu ka kes ana nuna matatar, io, la bot nuk lalani mang di ka tumus tar a ututnala ne o e Iesu, pa di ka tol tar a ututnala ne onoi.

¹⁷A galis a tarai ning la tur taum o e Iesu ning i kabah purum pas e Lasarus kusun a kulam a minat pa i alaun pasi, la ning la warwara talapor onoi.

¹⁸A galis a tarai la han sur lar barat e Iesu, anasa la ka longor tar a warwara ana akinalang ning.

¹⁹A Parisaiola la atai artalai la mange, “Mulo oroi, bel dalar tolsot pas ta utna ning dala mang sur dalar toli. Anasa a tarai tagun a rakrakan hanua rop la ka muri.”

²⁰Dingla na tarai Grik otleng la han usaot e Jerusalem ana lotu na Han Lakai, sur lar lotu.

²¹Pa la han tetek e Pilip, a te Betsaida. E Betsaida a hanua ting na papar Galili. Pa la atai i mange, “Lak, mila mang sur milar oroi e Iesu.”

²²E Pilip i han pa i atai e Endru, pa dia han sur diar atai e Iesu.

²³Pa e Iesu i keles diau mange, “A pukakiar ka hanot ning dir mermer a Nat a Barsan.

²⁴A atong momoli ta mulo, ning a pat a wit bel ir punga ting na kabalapiu pa bel ir mat pas, ir kes ot larning, takai ka. Ika ning ir mat pas, ir wai pa ir suah galis a patna.

²⁵Esining i mang kol sur anuna lalaun, ir hirua, pa esining i nget anuna lalaun te na rakrakan hanua, ir suahi sur a lalaun tikin.

²⁶Esining ir titol tetek iau, i wakak ning ir mur iau, pa i anuka tena titol pa ir kes taum hok ting na pukna ning ar kes ia. Esining ir titol tetek iau, e Tata ir aleklek pasi.

²⁷“Onone anuka lalaun i mamahat kol. Asa ning ar atongi? Mangmangasa, ar atongi larne, ‘Tata, gong u noren tar a mamahat ne ir hanot tetek iau’? Bel! Bel ar nunung larne, a kamkamna ot ne, ning a hanot suri.