San Juan 12:5-27

⁵—¿Penak nii kwtody aceit nii xlyaa nex re tson kyoow denario par kak meñ prob yudar?

⁶Per chëbty Judas ngo porñee xkëstyoo xaa meñ prob, sink lëëw chëb xaa porñee ngbaan xaa, aan como lëë xaa kënoy bols tumi, xkwan xaa tumi nii no leeñgo.

⁷Lëë Jesús chëb: —Psaan me, por pena ngotsey mew par tse nii jkyeetsyaa.

⁸Tugak kan do meñ prob, per lëë naa, lëdy tugak son lo do.

⁹Ndaly meñ Israel kwey Betania tsiñee biñ meñ nii lëë Jesús ptsiñ siko. Kweydy meñ par kan meñ nonsy Jesús, sink lëë meñ kwey par kan meñ Lázaro nii beeñ kpañ Jesús.

¹⁰Per lëë xaa nii xñabey lo pxosy byaan tiits nii wi Lázaro kuty xaa,

¹¹porñee por Lázaro ndaly meñ Israel bniladzy xtiits Jesús.

¹²Tsi lëë lyu byaani ndaly meñ nii sitedy paskw Jerusalén biñ nii lëë Jesús ktsiñ.

¹³Lëë meñ pchug siñ par tsiktsiilnëz meñ xaa. Kchësy meñ xñee: —¡Skizh Dios! ¡Xaatke buen xaa nii pxaal xaa, xaa nii kak xrey meñ Israel!

¹⁴Lady tu burr kwsob Jesús, por singo kë leñ kitsy nii kë xtiits Dios:

¹⁵Kchësy to sinak to meñ Sión ktsyebty to. Kol kuy gaanoo lëë xrey do sëëd sobsye xaa lady tu burr wiñ.

¹⁶Klo byeñdy xpëëdscuel Jesús nii beeñtsyey Jesús, per tsi lëë Jesús lox byëp kpaa, lëë xpëëdscuel xaa psaladzy nii kël nii sinrii ktsyool xaa aan nli gaa singo ptsyool xaa.

¹⁷Kchësy meñ nii kon xa kwlii Jesús Lázaro leñ paa ni xa beeñ kpañ xaa xaa bitiitso.

¹⁸Kuktsiil nëz meñ Jesús porñee biñ meñ nii lëë xaa beeñtsyey kyalntson go.

¹⁹Per lëë xaa fariseo bislo xñee lo xcombañer: —¿Pe chan dow na? Ni tu pe chilody kuuñtsyeey no. Kchësy meñ no xlad xaa.

²⁰Lady kchësy meñ nii kukiily lay lo Dios paskw no bla xaa sit.

²¹Lëë xaa sit ko big lo tu xaa Betsaida nii lë Felip aan lëë xaa chëb: —Xey, chakladzy noo tyon noo Jesús.

²²Lëë Felip kukëbo lo Ndresy, aan chop xaa kukëbo lo Jesús.

²³Lëë Jesús nii nak mguiy nii pxaal Dios chëb: —Lëë wor kutsiñ nii lëë Dios klisklaa naa.

²⁴Nli xñen nii deelñee kñaady xobxtily lo lyu, ktyaldyo, per deelñee kñaaw, lëëw ktyaly.

²⁵Kchësy meñ nii xkëstyoo xkyalmbañ lo kislyu re kety, per kejty meñ nii xkëstyoody xkyalmbañ, sink lëë meñ go jkaa kyalmbañ nii xnitylody.

²⁶Kchësy xaa nii chakladzy kuñ xtsiñaa no nii kiidnal xaa naa parñee laañee tson siko tso xaa. Xle Tat Tios lo meñ nii chuñ xtsiñaa.

²⁷’Mban xteedy styoon nina, per ¿pe sëpaa lo Tat Tios nayak nii kteelaa xaa naa lo kyalnë re con par ngo syelyaa?