Dioni 12:5-27

⁵Do senisita꞉ ma꞉nda꞉ma꞉ hambena꞉ laata꞉ 60 kina meaata꞉ nate hali wanda꞉hali pa꞉ta꞉ na teli teli peaemeke ekita꞉ ekipeke pimipe leekeme.

⁶Do leeke pita꞉ nate hali wanda꞉hali pa꞉ta꞉ a꞉ta꞉ma꞉ homolo na leke pake hali hata꞉ leekeme. Mani pausata꞉ ipikana꞉ma꞉ miniki hata꞉ mea pomiekepate ipika꞉ hone wia yoka꞉ mea꞉tiki piekeme.

⁷Koto leekepate Yesuma꞉ alota꞉ Koto wanda꞉ pa꞉ta꞉ pi na lapeke. Ipika꞉ wia hala꞉eki pa miniki haena꞉ I̱ toko hoiyulu peleme natena꞉ loa꞉me.

⁸Natehali wanda꞉halita꞉ iki ame̱le̱ hao halo pelemepate I̱ta꞉ iki ame̱le̱ na hao halumeke leekeme.

⁹Diu wanda꞉hali wopuma꞉ Yesuta꞉ Bedani da pa꞉ta꞉ a꞉pa hala꞉me lemekeeki opuaata꞉ koto pa꞉ta꞉ pemekeme. Yesu homeke handuluekema꞉ na pekepate hande Yesuma꞉ lapa꞉ pa꞉ta꞉ pa mea tiaeyeke hali La꞉satesi make handuluekema꞉ pemekeme.

¹⁰Koto ekina꞉ mo yeni peao haemeke you haliwekima꞉ta꞉ La꞉satesi make lulu pimiki pota꞉ weimikime.

¹¹Diu haliweki wopuma꞉ La꞉satesi pa꞉ta꞉ hone witolo hata꞉ ika꞉ you haliweki mina꞉pa꞉lao Yesu pa꞉ta꞉ hone tulaemeke ekina꞉ pimikime.

¹²Da ka꞉la꞉peeketa꞉ hande Lombei Pupa Yapeeke dina꞉ ne pambuluekema꞉ momba꞉la haemeke wanda꞉hali paeyaoma꞉ta꞉ Yesuta꞉ Diutuseleme da nane ipula꞉me lemekeeki opimikime.

¹³Koto ekina꞉ dopema꞉ handeke ti palekemanu tonda꞉pa꞉ mepi pea mina Yesu manda꞉hande puluekema꞉ wi la꞉tiki pulu hata꞉ alota꞉ Koda꞉na꞉ pi laapa꞉pe. Tekehalina꞉ bikina꞉ ipula꞉ halita꞉ Koda꞉ma꞉ epeaeya꞉ka꞉na꞉ta꞉ epelieke. Ipikita꞉ Isulai wanda꞉halina꞉ Kini halie la lemekeme.

¹⁴Yesuma꞉ donki ma꞉na꞉ handa꞉ wiata꞉ mo ma꞉na꞉ hoki manda pitiekeme. Kutu pieke ekita꞉ mo Baibolo buka pa꞉ta꞉ wape pa꞉la꞉ ekita꞉ dupa

¹⁵Saioni data꞉ paala꞉ma꞉ na homa꞉peke. Handa꞉e. Naka꞉ kini hali koto ipula꞉ handa꞉e. Donki ma꞉na꞉ siki ipika꞉ hoki manda pita꞉ koto ipula꞉ handa꞉e laa wape pa꞉la꞉me.

¹⁶Yesuma꞉ koto hau pieke pita꞉ta꞉ ipika꞉ disaipolo haliwekima꞉ hone na wimikipate pa wetepena꞉ta꞉ Yesu paa tiao oli ipika꞉ pa̱a̱ piki kapu tieke mulu pieke haena꞉ ikana꞉ma꞉ mo Baibolo bukana꞉ dupiki pi wape pa꞉la꞉ ekita꞉ ota꞉ Yesu pa꞉ta꞉ kone yaeyekeeki hone wimikime.

¹⁷La꞉satesi lapa꞉ pa꞉ta꞉ wina꞉ Yesuma꞉ wi la paa mea tiaeyeke pita꞉ma꞉ Yesu ame̱le̱ haemeke wanda꞉halima꞉ koto pieke ekita꞉ hande wanda꞉hali pa꞉ta꞉ amba꞉ la halemekeme.

¹⁸Koto wele wopu pieke ekina꞉ wanda꞉hali paeyaoma꞉ opuata꞉ Yesu manda꞉hande pulu pemekeme.

¹⁹Koto ekina꞉ mo Pa꞉tisi haliwekima꞉ ika꞉ kone ane la꞉ mone la꞉ pu alualu pitolo alota꞉ Handelemepe. Nikana꞉ma꞉ hau ma꞉nda꞉ pea꞉peke na ya꞉la꞉me. Handa꞉pe. Wanda꞉hali paeya꞉ tapao ipiki telia꞉ mea pulimime lemekeme.

²⁰Mo hande ne pambemeke pita꞉ Diutuseleme da pa꞉ta꞉ yeni pulu pemeke wanda꞉hali ame̱le̱ta꞉ mandane Kitiki wanda꞉hali make pemekeme.

²¹Mo wanda꞉halima꞉ hande Ka꞉lili nane hayeke da Betesaida da hao epeeke hali Pilipi pa꞉ta꞉ pua alota꞉ Aneke halio. Nika꞉ honema꞉ta꞉ Yesu handulumeke hone witoloma꞉me lemekeme.

²²Pilipima꞉ A꞉ndutu pa꞉ta꞉ pua laata꞉ Ipilikana꞉ma꞉ Yesu lolo pepekeme.

²³Yesuma꞉ ipilika꞉ pi hombo peaaso alota꞉ Wanda꞉halina꞉ Eiyekema꞉ mo pa̱a̱ piki kapu tieke mulu pa꞉la꞉ di ame ipula꞉me.

²⁴Ipiliki pa꞉ta꞉ ota꞉ pi alome. Kuni wae alesiki homeketa꞉ kenkena꞉ na opa꞉ pa lopa na homea꞉ka꞉na꞉ta꞉ ipika꞉ pa u pelia halieke. Kutu pulu pa꞉la꞉pate homea꞉ka꞉na꞉ta꞉ opa kiliki wotu a꞉elieke.

²⁵Hali epima꞉ ipika꞉ da꞉ta꞉la꞉eki kone hone wotu wia꞉ka꞉na꞉ta꞉ ipika꞉ da꞉ta꞉la꞉ ekita꞉ alupilieke. Hali epima꞉ do kenkena꞉ hata꞉ ipika꞉ da꞉ta꞉la꞉eki kone hone wopu na wia꞉ka꞉na꞉ta꞉ ipika꞉ da꞉ta꞉la꞉eki mea miniki hata꞉ da꞉ta hao halo pa꞉la꞉eki kone yelieke.

²⁶Hali epima꞉ yaka e pokaaluekema꞉ hone pia꞉ka꞉na꞉ta꞉ ipikana꞉ma꞉ ya hoki nane telia꞉ mea epena꞉e. Yaka e pokaasa꞉ halita꞉ I̱ halo alena꞉ kone diki mandakena꞉ halupekema꞉ loa꞉me. Yaka e pokaasa꞉ halita꞉ yaka Apa꞉ma꞉ koto halina꞉ biki tieke wina꞉ lelieke leekeme.

²⁷Ameta꞉ ya puki tandama꞉ homolome hata꞉ eki pi lonope. Doeki lapeke ya꞉la꞉pe. Apa꞉o. Hande I̱ pa꞉ta꞉ epolo pa꞉la꞉ di na epena꞉ lapeke lonope. Dia꞉me. Koto tanda tandama꞉ homolo polo di muluekema꞉ epoa꞉me.