Johane 21:1-23

¹Juku motec jaŋe Tiberia riqicko juhapie fua‐jarewec. Kecʒiŋuc ehapie fua‐jarewec:

²Jumbiŋ ine Simoŋ Petoro, Toma, ʒâŋene moc Didimo, Natanae e Galilaia mâreŋko Kana hae ŋewec irecnec, erâ Ʒebedaio ŋokâ jahec‐ticne â motecfâcne jaŋeraonec jajahec mocwâc, ŋic iŋuczi jumbiŋ.

³Ehuc Simoŋ Petorozi ʒiŋuc jazawec: “No qowi rozo rakopac.” Mume mumbiŋ, “Nâŋe gohec mâmâc ranaŋ.” Iŋuc murâ wokeo ferâ rambiŋ. Ra juhuc ŋafe ira qowi mi rombiŋ.

⁴Eme riqicko juhapie hae fufurecte Jesuzi moŋgeŋko domawec. Domame Jesu hawarine mi hone tarambiŋ.

⁵Eme Jesuzi wio‐jarerâ muwec, “Motec, qowi‐ŋeŋic moc fokac me?” Eme jaŋe mumbiŋ: “Aricne.”

⁶Mupie ʒiŋuc jazawec: “Woke fâreopec wasaŋ behepie qowi jowaocmu.” Mume wasaŋ behepie qowi mâretec jâmbâŋ jowa susuckeme fâre‐bipiembiŋ.

⁷Eme Jesu motec bufuŋ‐ticnezi Petoro ʒiŋuc âzâcnewec: “I Wofuŋ ine hâcne.” Mume Wofuŋ ʒâŋe manarâ Simoŋ Petoro e kambaŋ sawa qajuwecte ŋaqi‐ticne faine heme hume riqicko rucnewec.

⁸Jaŋe moŋgeŋ heririŋ (100 meta irec sâc) jumbiŋte motec gâcne jaŋe woke foickehuc wasaŋ qowihec fâre fâre rambiŋ.

⁹Eme moŋgeŋko ferâ tiŋko wiac ʒiŋuc honembiŋ: Ʒoc uucko opâ qowi â nânâ ʒegoc ʒahuc fowec.

¹⁰Ra fisipie Jesuzi ʒiŋuc jazawec: “Qowi rombieŋ i tucne bareniŋ.”

¹¹Mume Simoŋ Petorozi wokeo ferâ wasaŋ tiŋko fâreme fewec. Maŋnao qowi kâcqene 153 fowec, eme sifu mi tâcnewec.

¹²Eme Jesuzi ʒiŋuc jazawec: “Ware furic nânâ nâniŋ.” Mume motec jaŋe wemocko ʒiŋuc wionʒapiŋ: “Go mo?” Jaŋe Wofuŋ ine hâcne i mana‐fârembiŋ.

¹³Eme Jesuzi warerâ nânâ qowi bâtâc bahuc jarewec.

¹⁴I Jesu e hâmockonec faharerâ motecfâcne fua‐jareme jahec â moc ewec.

¹⁵Furic nânâ nâpie Jesuzi Simoŋ Petoro ʒiŋuc muhuc wiocnewec: “Simoŋ Johanere ŋokâ, âgofâcge jaŋe no maŋzi ʒâficnueŋgopieŋ, go jowarurâ sâc moc ʒâficnuekic me?” Eme Petorozi muwec, “Wofuŋ, no gore enarekac i manakomec.” Eme Jesuzi muwec: “Go lamafâc‐mae soŋaŋ‐jopazemec.

¹⁶Iŋuc murâ mocwâc wiocnewec: “Simoŋ Johanere ŋokâ, go jâmbomac ʒâficnuekic?” Eme Petorozi muwec: “Wofuŋ, no gore enarekac i manakomec.” Mume Jesuzi muwec: “Go lamafâc‐nane jaŋere soŋaŋ juzemec.”

¹⁷Iŋuc murâ harierâ wiocnewec: “Simoŋ Johanere ŋokâ, go jâmbomac nore egarekac me?” Ʒâʒâficte wiocneme jahec â moc eme Petoro e bune sâqoreme muwec: “Wofuŋ, go wiac sasawa mana‐fâreekic, no gore enarekac i wâc manakomec.” Mume Jesuzi muwec: “Go lamafâc‐nane soŋaŋ‐jopazemec.

¹⁸Jâmbomac jâmbâŋ gazape: Go ŋicmotec juhuc becsahacge jomarâ hata ira me ira razo egareme rajumec. Izi juku ŋicqizec erâ mege bâfeŋnetec ŋic moczi becsahac joma‐garerâ mi razo mucmu ira bacgu raocmu.”

¹⁹Jesu e iŋuc muhuc Petoro hâmoc‐ticnere dâŋ suŋsuŋne âzâcnewec. Hâmoc‐ticne fuŋmoczi Anutu muteŋkeocte manasuhuc muwec hâcne. Dâŋ iŋuc murâ ʒiŋuc âzâcnewec: “Ware bâjâpecnuc.”

²⁰Eme Petoro e fotikierâ Jesu motec bufuŋ‐ticnezi râpefuŋnao rame honewec. Motec e aakic lama nâmbiŋko qizec‐ticne Jesure amecko fohorerâ wiocnerâ muwec: “Wofuŋ, mozi doc bacguocmu?”

²¹Eme motec hâcne ʒâhec rame Petorozi honerâ Jesu wiocnerâ muwec: “Wofuŋ, motec kecʒizi ine weniŋuc eocmu?”

²²Wiocneme Jesuzi ʒiŋuc âzâcnewec: “E juhame no risiepemurâ manacnepe fokacko ere dâŋ wemocte mukomec? Go mâc bâjâpecnuc.”

²³Eme miti mamana gâcne jaŋe ʒâhec Johanere ʒiŋuc musifuckembiŋ: “Motec e mi hâmoocmu.” Jesu e ine ere ʒiŋuc mi muwec: “E mi hâmoocmu.” Dâŋ ʒiŋuc sawa âzâcnewec: “E juhame no risiepemurâ manacnepe fokacko ere dâŋ wemocte mukomec.”