Jon 21:1-23

¹Ke mara gurina ma Yesu irumatarame kana kivikivina kurisi, ma berana weni nakanani itupuwa.

²Mara sago kana kivikivina miikovimaruwa Taiberiyas tokana baranai ivi kiidaburana. Ti na Saimon Pita, Tomas (kana vava sago Didimas), Nataniyera (ina kwanatu Keina, Gariri dobunai), Zebedi natunatuna ma bade kivikivina ruwa yavata.

³Saimon Pita turaturana ivonesi bo, “Ana nae ana wito.” Ma damsi ivonapotei bo, “Peyarita tanae.” Inae da ku waka igeru, ma nani didibarinai na iwito mareba da ke iyana sago ita konai.

⁴Ma mara boiboi vaghata ikitai da wawaya sago kikirai imiimiiri ma ke ita vogiini da tuna na Yesu.

⁵Ma Yesu ivi kwatu kurisi bo, “Turaturaku, kade iyana kokonai, bo kegha?” Ma peyarisi ivi kwatupotei bo, “Kegha. Ke sago.”

⁶Ma Yesu ivonesi bo, “Ami wito ku katagheyami kotawei na iyana kona konai.” Ma damsi i wito itawei ma ke kovokovoghina da wito ita tinepai ku waka, iyamna iyana ikona kirakiiyei.

⁷Ma kana kivikivina sago Yesu nuwanuwana iviiviiya na tuna Pita kurina ivona bo, “Nokona Bada.” Ma Saimon Pita namada kupuna garana ivotawei ma maranai iakovi da Bada na yaghiyaghinai kupuna garana iviiya da ikotei ma ivi kapoka ku okowa ma iyeka ioru ku kikira.

⁸Ma turaturana na Pita ikivini wakiiyai ioru. Ma wito na ere iyanina itini ku kikira, iyamna ke ita rabaraba, 100 mitas ruvana.

⁹Damsi ku kikira ivoghae na keyama mokina ikitai ma tepanai na iyana. Ma ririnai na parawa yavata.

¹⁰Ma Yesu ivonesi bo, “Iyana viya wekarakava kokonai na kokavarapiyei.”

¹¹Saimon Pita ighae ku waka da wito itinaoruwei ku kikira. Iyana ghamaghamasi ikona na ivi 153, ma kegha da wito ke ita bewari.

¹²Ma Yesu ivonesi bo, “Kopisi. Tikawaboiboi.” Ma ke sago kana kivikivina iti tarakiiyanei bo, “Tam iyai?” iyamna kudubisi iakovi da tuna na Bada.

¹³Ma Yesu parawa iviiya ma irereghisi, ma bade iyana iviiya na berana sago iberai.

¹⁴Yesu rabobowai ivomiiri ma nani murinai mara ipeyari kana kivikivina kurisi irumatara. Ma weni tuna na mara kana viaroba.

¹⁵Yesu kana kivikivina yavata ikam ikovi na Saimon Pita ivonei bo, “Saimon, tam Jon natuna, vonavaghata da nuwanuwaku kuviiya, bo? Am nuwaviina kuriku irakata, ke nakanani ma weni damsi, bo?” Ma Saimon ivonapotei bo, “E, Bada, vonavaghata. Kuakoviku da taku nuwanuwam aviiya.” Ma Yesu ivona bo, “Tuna kubiine aku sipu gegeyisi kevi kanisi.”

¹⁶Ma bade Yesu sisiyina sago ivona meyei bo, “Saimon, tam Jon natuna, vonavaghata da nuwanuwaku kuviiya bo?” Ma Saimon ivonapotei bo, “E, Bada, vonavaghata. Kuakoviku da taku nuwanuwam aviiya.” Ma Yesu ivona bo, “Tuna kubiine aku sipu kekoyagha bubunisi.”

¹⁷Ma Yesu ivoname bo, “Saimon, tam Jon natuna, nuwanuwaku kuviiya bo?” Ma Saimon ivi nuwapoya kirakai, iyamna weni tuna mara kana viaroba Yesu ivi tarakiiyanei da nuwanuwana iviiya bo kegha. Ma ivonapotei bo, “Bada, bera peyarina kuakova yavui. Ma namada kuakoviku da taku nuwanuwam aviiya.” Ma Yesu ivona bo, “Tuna kubiine aku sipu kevi kanisi.”

¹⁸Ma patana da ivivi sisiya Pita kurina, ivona bo, “Vonavaghata avonavonem, yaragimuwai na tam mani kuvovororona da kuvivi kotevunaghim, ma am kayowanai kubababa. Ma kuna morapa na kuna vororona da wawaya imam ina patumi. Ma ina rutinim da gawara ke kuta kayokayowei na nake ina terem.”

¹⁹Yesu weni nakanani ivi sisiya na ivi debei da ikikava Pita ina rabobo, ma nani rabobona kamonai na God kana kadara ini debei. Muriyai ivona bo, “Saimon, kekiviniku.”

²⁰Pita itavire na Yesu kana kivikivina sago ikitai, murisiyai ipipisi. Tuna tomowina na Yesu ina nuwaviina ghamana ma vaghina tomowina kam kamonai ivi rugwabi Yesu kurina ma ivonei bo, “Bada, iyi ini wawanem?”

²¹Ma Pita tomowina ikitai na ivona bo, “Bada, nokoni tomowina na ikikava?”

²²Ma Yesu ivonapotei bo, “Mikeda ata kayokayowei da nani tomowina yawayawana ita makamakai da aku ku vovira marana na ke tam am nuwapoya. Tam na kekivina bubuniku.”

²³Weni sisiyina kubiine na vitumaghana damsi kamosiyai sisiya wapawapa irakata, inotanotai da tuna tomowina na ke meyani ita rabobo. Ma kegha da Yesu ke nakanani iti sisiya, tuna ivona bo, “Mikeda ata kayokayowei da nani tomowina yawayawana ita makamakai da aku ku vovira marana na ke tam am nuwapoya.”