Yohane 21:1-23

¹Hambele Yesu kawalawila keli iwanang'ina wake mmbalimbali mwa tsimbu Tiberiya. Tsakawalawila pfino,

²Simoni Petiri, Tomasi iyakemighwe Basa, Nasanaeli iyalawile Kana ghumji ghwa Galilaya, iwana wa Sebedayo, ne iwanang'ina wangi weli wa Yesu wose tsawakala hamwe.

³Simoni Petiri kawalongela, “Noghenda kulowa iwasomba.” Wamlongela, “Twoghenda naghwe.” Apfo wengila mumnumbwi, lekeni chilo chila chose ng'awapatile chinu bae.

⁴Nemitondotondo, Yesu tsakema mmbalimbali mwa tsimbu, lekeni iwanang'ina ng'awamtangile bae ka tsa Yesu.

⁵Kuya Yesu kawaghutsa, “Sale tsangu, ng'ampatile chinu bae?” Wamwidika, “Ona, ng'atupatile chinu.”

⁶Kuya Yesu kawalongela, “Mwase ichelo lubali lwa kumoso lwe imnumbwi, mtsolowa iwasomba.” Apfo wasa ichelo mmatsi na ng'awadahile bae kukwegha kwaapfila tsawapata iwasomba wengi ng'ani.

⁷Kuya imwanang'ina yumwe, iyanoghelighwe na Yesu kamlongela Petiri, “Ayuno ka Imtwatsa.” Bahala Simoni Petiri ayahulike yula tsakakala Imtwatsa, keyoha lighwanda lyake kwaapfila tsakalitsula. Kuya kadalukila mmatsi.

⁸Iwanang'ina wangi watsa mne mnumbwi, kwaapfila ng'awakalile hatali ne isi, ila tsawakala utali wa ghamaghulu miya imwe, tsawakwegha ichelo ichimemile iwasomba.

⁹Hawapfikile mmbalimbali mwa tsimbu, wona ghumoto na iwasomba wekighwa mchanya mwake, na chighate.

¹⁰Yesu kawalongela, “Mngaye iwasomba wangi wamlowile.”

¹¹Kuya Simoni Petiri kadina mne mnumbwi, kakwegha ichelo mmbalimbali mwe tsimbu, ichimemile iwasomba wakulu miya imwe na hamsini na tatu. Hata ka tsakukala ne iwasomba wengi, ichelo ng'achidegheke bae.

¹²Yesu kawalongela, “Mtse mje.” Kuduhu imwanang'ina iyaghetsile kumghutsa, “Ghweghwe uli nani?” Kwaapfila wammanya tsakakala Imtwatsa.

¹³Yesu katsa, kasola pfighate ne iwasomba wala, kaweng'a.

¹⁴Aluno lukala lwakadatu Yesu kuwalawila iwanang'ina wake kulawa hayatsilihuke.

¹⁵Hawamalitse ukuja, Yesu kamghutsa Simoni Petiri, “Simoni imwana wa Yohane, apfi kwoninoghela kubita wano?” Simoni Petiri kamwidika, “Ona, Imtwatsa ghweghwe kwomanya ka nene nokunoghela.” Yesu kamlongela, “Wadime iwanang'olo wangu.”

¹⁶Kuya Yesu kamghutsa lwa keli, “Simoni imwana wa Yohane, apfi kwoninoghela.” Petiri kamwidika, “Ona, Imtwatsa ghweghwe kwomanya ka nene nokunoghela.” Yesu kamlongela, “Wadime iwang'olo wangu.”

¹⁷Yesu kamghutsa keli lwa kadatu, “Simoni mwana wa Yohane, kwoninoghela?” Simoni Petiri kona usungu kwaapfila Yesu kamghutsa lwa kadatu, “Apfi kwonoghela?” Kamwidika, “Imtwatsa, kwomanya pfinu pfose, kwomanya ka nokunoghela.” Yesu kamlongela, “Wadime iwang'olo wangu.

¹⁸Nokulongela ghendo, haung'ali msongolo, tsakutsowela kupfala msipi imwenyegho na kughenda hanu haubamile, lekeni hautsolala kutsogholosa ghamoko ghako, imunu yungi katsokwoha na kukughala hanu ng'aubamile bae kughenda.”

¹⁹Yesu kalonga pfino, kulangusa Petiri pfayatsokufa na kumtunitsa Imulungu. Kuya Yesu kamlongela, “Niwinze!”

²⁰Petiri kahunduka, kamwona imwanang'ina yula iyanoghelighwe na Yesu kowawinza. Imwanang'ina yuno tsakakala yula iyakalile na Yesu mne ichijo cha Ipasaka na iyamghutsile, “Mtwatsa, yuhi iyatsokuhunduka?”

²¹Petiri hamwonile, kamghutsa Yesu, “Imtwatsa, ayuno naye?”

²²Yesu kamwidika, “Ka nombama akale mghima mbaka hanikuya, ghweghwe ubama choni? Ghwe niwinze!”

²³Apfo mbuli tsenela kwa wandughu kuwa imwanang'ina yula ng'atsakufa bae. Lekeni Yesu ng'alongile ka imwanang'ina yuno ng'atsakufa. Bali kalonga, “Ka nombama akale mghima mbaka hanikuya, ghweghwe ubama choni?”