Johane 19:2-37

²Qarâ muc ʒârâneheczi hendiŋ ba akic erâ qizecnao hecnepie huwec â ŋaqi bâbâroŋ mâmâc hecnepie huwec.

³Iŋuc erâ maŋfuŋnao birickerâ domahuc fânâŋkecnehuc mumbiŋ: “Ohec, Judaŋic jaŋere ŋicwofuŋ.” Muhuc mainao qambiŋ.

⁴Eme Pilatozi Judaŋic jaŋerao mocwâc hurâ muwec, “Honeniŋ, no ŋoŋerao jowa wahakopac, no kiŋticne basakopacte ŋaŋac fuŋne‐ticne honeniŋ.”

⁵Eme Jesu e muchendiŋ â ŋaqi bâbâroŋ, wiac iŋucnehec waha domame Pilatozi jowaturâ muwec: “Ŋic mac ʒi honeniŋ.”

⁶Eme taha bapa micne â ŋicfâc‐jeŋic jaŋe honerâ dâŋ ɋeŋɋeŋnehec ehuc mumbiŋ: “Maripoŋko feoc, feoc.” Mupie Pilatozi micjeŋicko rorâ muwec: “No kiŋticne basakopacte ŋoŋe ŋaŋac rorâ maripoŋko qaniŋ.”

⁷Eme Judaŋic jaŋe ʒiŋuc mumbiŋ: “E jahacnere no Anuture Ŋokâ muekac, eme ŋic iŋucne jaŋe hâmoniŋte sâcmutâc dâŋnâŋec fokacte hâmozejec.”

⁸Eme Pilato e dâŋ i manarâ mâretec hâwickewec.

⁹Eme Jesu mocwâc ficmaŋko jowa ferâ indiŋkerâ muwec: “Go wenirec fuameŋ?” Mume Jesuzi micnao mi rowec.

¹⁰Iŋuc eme Pilatozi ʒiŋuc âzâcnewec: “Go dâŋ mi nazakomec me? Noni mupe jucmu me mupe maripoŋko hâmocmu irec tâpiri râe‐narekicne, i mi manakic me?”

¹¹Eme Jesuzi ʒiŋuc âzâcnewec: “Mâc muzac go nore dâŋ wemocko munʒaŋ, nore dâŋ mumure faicnec tâpiri qikiŋne‐garekicnere mukomec hâcne. Irec gorao râecnukac ŋic ere kiŋzi gore jâurukac.”

¹²Dâŋ i manarâ Pilatozi Jesu akickezo mume Judaŋic jaŋe owa ruruckerâ mumbiŋ: “Go ŋic e akickerâ Sisare âgo mocwâc mi jucmu. Moc e jahacnere ŋicwofuŋ muhuc Sisa âkehockeocmu.”

¹³Pilatozi dâŋ i manarâ mume Jesu jowa wahapie dâŋ mumutara ŋeŋe‐ticnao waha ŋewec. Ŋeŋe i qânâ ʒaeo râekicne, eme ʒae irec ʒâŋe Judaŋic jaŋe Gabata mujumbieŋ.

¹⁴Eme Judaŋic jaŋe hae fureme aakic hombaŋ ŋeniŋte teuŋko raʒimbiŋ. Ehame qâqâtâc bembeŋkeha Pilato e ŋeŋe‐ticnao ŋehuc Judaŋic ʒiŋuc jazawec: “Honeniŋ, ŋicwofuŋ‐ŋeŋic ʒi.”

¹⁵Mume jaŋe owa ruruckerâ mumbiŋ: “E arictac eoc, e arictac eoc, maripoŋko feoc.” Eme Pilatozi muwec: “Hâc, eme ŋicwofuŋ‐ŋeŋic mupe maripoŋko hâmoocte muŋgopieŋ me?” Mume taha bapa micne jaŋe dâŋ ʒiŋuc bâtikiecnembiŋ: “Nâŋe ŋicwofuŋ‐nâŋec moc aricne, Sisa mocjahazi junârekac.”

¹⁶Eme Pilatozi mana urue‐jarerâ Jesu maripoŋko hâmoocte qikiŋne‐jarewec.

¹⁷Eme momori jaŋe Jesu rorâ maripoŋ râcnepie hâpome mâreŋ moc ʒâŋene Utusiec, Judadâŋko Goligata, ira barambiŋ.

¹⁸Bararâ maripoŋko qambiŋ. Erâ sâqocne bapa jajahec mâmâc jofarâ moc ŋifec, moc ŋifec, â Jesu ʒâʒâŋiŋko, iŋuc biric‐jopambiŋ.

¹⁹Eme Pilatozi mume Jesure qizec botâŋko maripoŋko qâreŋ kecʒiŋuc râembiŋ: “Jesu Nazarete haeonec Judaŋic jaŋere ŋicwofuŋ.”

²⁰Jesu qambiŋ mâreŋ i hae bembeŋko fowecte Judaŋic bocjahazi ira rac warec ehuc qâreŋ i wosembiŋ. Eme qâreŋ i Judadâŋko â Romadâŋko â Grikdâŋko râekicne.

²¹Eme Judaŋic jaŋere taha bapa micne jaŋe Pilato ʒiŋuc âzâcnembiŋ: “Go Judaŋic jaŋere ŋicwofuŋ iŋuc mi qâreŋkec. E jahacne muwec, no Judaŋic jaŋere ŋicwofuŋ, iŋuc qâreŋkec.”

²²Eme Pilatozi muwec: “Qâreŋkepac izia fooc.”

²³Eme momori jaŋe Jesu maripoŋko qarâ ŋaqi‐ticne faine bâtâcnepie jahec â jahec eme ru sâc embiŋ. Â ŋaqi‐ticne maŋne hâfâ iŋucne oorâŋ fukicnere

²⁴ʒiŋuc mumbiŋ: “I bâtâcnepene sâqoreocmu, irec ɋâsâi qapene rune âke fuaoc.” Iŋuc epie miti papiao dâŋ moc kecʒiŋuc qâreŋkekicne i sanaŋkewec: “Jaŋe ŋaqi‐nane faine bâtâc bambiŋ, â maŋnere ine ɋâsâi qambiŋ.”

²⁵Momori jaŋe iŋuc hâcne embiŋ. Jesure maripoŋ fuŋko ine ʒiŋuc domambiŋ: Neŋgoc‐ticne â neŋgoc‐ticnere qo, erâ Maria Kelopa ere ŋonâŋ, â Maria Madala haeonec.

²⁶Eme Jesu e neŋgoc‐ticne â motec bufuŋ‐ticne domapire honec‐jofarâ neŋgoc‐ticne ʒiŋuc âzâcnewec: “Ŋokac, motecge keci hâcne.”

²⁷Iŋuc murâ motec‐ticne ʒiŋuc âzâcnewec: “Neŋgocge keci hâcne.” Eme dameŋ ira Jesure neŋgoc jowame motec jahacne ficko ferâ ŋec juc ewec.

²⁸Eme Jesu e gie‐ticne tarame manarâ, miti papiao findaŋdâŋ moc fokac i deŋkeocte, ʒiŋuc muwec: “No opâre enarekac.”

²⁹Eme râqâc moc maŋnao waiŋ opâ ʒaʒacne ŋewec, ira hâwec sâmbiŋ âke uruckerâ qeŋqeŋko âke kindeŋnerâ micnao iticnepie nâwec.

³⁰Waiŋ opâ nârâ wirahuc muwec: “Batarakopac.” Iŋuc mume qizecne forârieme mâro‐ticne wefuwec.

³¹Eme Judaŋic jaŋe teuŋko raʒimbiŋte ʒiŋuc mumbiŋ: “Tomâcko sabata hombaŋ sâkoo ŋic jopakicne jaŋere qâŋɋâŋ maripoŋko mi domazejec.” Iŋuc murâ Pilato âzâcnepie momori jaŋe ŋic siec‐jeŋic qazurâ qâŋɋâŋ‐jeŋic bataraniŋte Judaŋic mana‐jarewec.

³²Eme momori jaŋe sâqocne bapa Jesuhec jofakicne mocte siec qazurâ ra mocte siec qazumbiŋ.

³³Iŋuc erâ Jesurao fisirâ honembiŋ: E biac hâmowec. Honerâ siecne mi qaqazu

³⁴momori moczi tambaraŋne sânduzi âke mârâŋkeme soc â opâ wahawec.

³⁵Wiac i ʒâŋe fâri‐ticnezi honewec eki mutaniŋkeme jâmbomac ekac. E manakac, dâŋ i fârine. Irec ŋoŋe mana ʒakienʒepieŋ.

³⁶Miti papiao findaŋdâŋ moc kecʒiŋuc fokac i sanaŋkeocte wiac i fuawec: “Ŋoŋe siecne mi qazunʒepieŋ.”

³⁷Erâ wâc miti papiao dâŋ moc kecʒiŋuc fokac: “Jaŋe âke mârâŋkembiŋ erao ʒâŋe finʒepieŋ.”