Johanningundru 19:2-37

²Mitaia kaparaia mili pirapira dakana wonti dilkandru, ja nunkangu mangatandrani kurana wonti ja nunkangu kati maralje widmana wonti,

³Ja jatana wonti: “Murlali nganamai Juda kanaia Kapara!” Ja nina ngadla nandrana wonti.

⁴Pilatus nakaldra dunkana wonti ja tanangu jatana wonti: “Najianau, ngato ninaia jurangu dunkalkai, jura ngujamananto, ngato nunkangu wata madlentji mankamankai.”

⁵Jesus dunkana wonti ja dilka pirapira ja kati maralje ngamalkana wonti; ja nau tanangu jatana wonti: “Najianau ninaia kana!”

⁶Priesta pirnali ja milieli nina najinani, tana maritjina wonti ja jatana wonti: “Kunarkuni katibamai, kunarkuni katibamai!” Pilatus tanangu jatana wonti: “Patanau jura ninaia ja kunarkuni katibanau; ngangau ngato nunkangu wata madlentji mankamankai.”

⁷Juda kanali nunkangu kalabana wonti: “Ngaiani jirijiribani jaura ngamalkai, ja ngaianini jirijiribani jaurandru Nauja palinanto, ngangau Nauja munta Godaia Ngatamura ngankaterina warai.”

⁸Pilatulu ninapini jaura matja ngarana, nau morla japali pantjina wonti.

⁹Ja nau nakaldra ngankamalini pungani wirina wonti ja Jesungu jatana wonti: “Wodajerindru jundru nganai?” Jesujeli nunkangu wata kalabani jaura jinkina wonti.

¹⁰Pilatus nunkangu jatana wonti: “Wata ngakangu jundru kaukaubai? Jidni wata milkila, ngato ngurula ngamalkai jidnana kunarkuni katibala kara, ja ngurula ngamalkai jidnana kurakala?”

¹¹Jesujeli kalabana wonti: “Jundru wata ngurula ngamalkai ngakangu, jundru nina wata mirindru maninani; jendrangundruja nulupini, nulu ngana jinkangu ngulkujeli jinkina warai, morla madlentji ngamalkai.”

¹²Jendrangundruja Pilatulu wontina wonti nina kurakala. Juda kana maritjina wonti ja jatana wonti: “Jundru ninapini kurakanani, jidni wata morla mitaia kaparaia kamaneli nganai; worana munta kapara ngankateriai, nau kaparaia tula nganai.”

¹³Pilatulu ninapini jaura matja ngarana, nulu Jesus dunkalkana wonti ja kalala jinkini pirini ngamana ngarina wonti; ninapini tanali dikai: “Marda piri; Juda kana talini Gabbatha.”

¹⁴Passa ngankingani ditji nganana wonti, ja ditji dunkani kuperi; ja nau Juda kanani jatana wonti: “Najianau jurani Kapara!”

¹⁵Tana maritjina wonti: “Woramai, woramai, kunarkuni ninaia katibamai!” Pilatus tanangu jatana wonti: “Jurani Kapara ngato kunarkuni katibananto?” Priesta pirnali kalabana wonti “Ngaiani wata kapara ngamalkai, windri nina kapara Cäsar!”

¹⁶Ngadani nulu nina tanangu jinkina wonti, tanali nina kunarkuni katibananto. Tanali Jesus manina wonti ja nina wapalkana wonti.

¹⁷Ja Nulu kunarku nunkani wilimana wonti, ja an dunkana wonti nunkangupini piria, nina tanali dikai: “Mangatandra piri; ja Juda kana talini Golgatha.”

¹⁸Ja naka tanali nina kunarkuni katibana wonti, ja nunkangunto mandru morla, jerra pankini ja jera pankini, ja Jesus terti.

¹⁹Pilatulu bakana dakani miri dakana wonti, ja nina kunarkuni miri katibana wonti, ja jenia dakani ngananala: “Jesus Nazarethandru Juda Kanaia Kapara.”

²⁰Ninapini dakani miri Juda kana marapujeli warapana wonti, ngangau ngurani karakara naupini piri nganana wonti, woderi tanali Jesus kunarkuni katibana wonti, ja dakani parana wonti Juda kana, Grieka kana, ja Roma kana talini.

²¹Juda kanaia Priesta pirna Pilatungu jatana wonti: “Wata dakamai, Juda kanaia Kapara, a-ai, windri Naupini jatana warai: Ngani Juda kanaia Kapara nganai.”

²²Pilatulu kalabana wonti: “Mina ngato dakana warai, jenia ngato dakana warai.”

²³Mitaia kaparaia milieli Jesus kunarkuni matja katibana, tanali kati nunkani manina wonti ja burn mandru ja mandru ngankana wonti, milieli pilki ja pilki wora kulno, ja bakana kati pirna; ja kati pirna wata karpani nganana wonti, mirindru ngarinalujelu ngankana wonti.

²⁴Tana ngankamalina wonti: Ninaia ngaiana wata wokaribananto, a-ai, nunkangundru ngaiana wontjani malka worananto wani nauja nganananto;” ngangau jaura morlalu pantjinanto nauja jatai: “Tanali kati ngakani tanali puntibana wonti, ja ngakani kati pirnandru tanali wontjani malka worana wonti.” Tananapini mitaia kaparaia milieli ngankana wonti.

²⁵Jesuni kunarkuni ngandri nunkani ja nunkanaia ngandria kaku, Maria, Kleophani noa, ja Maria Magdalala terkana wonti.

²⁶Jesujeli ngandri nunkani, ja nina mill, nina Nulu ngantjanala, naka terkanani najina wonti, Nau ngandrini nunkanani jatana wonti: “Widlajai, najiau jinkani ngatamura!”

²⁷Ngadani Nau milini jatana wonti: “Najiau jinkani ngandri!” Ja nunkangupini ditjindru milieli nana pungaia nunkanaia manina wonti.

²⁸Ngadani, ngangau Jesus milkila nganana wonti, pratjana matja mudana warai, ngangau jaura kantji morlalu pantjinanto, Nau jatana wonti: “Ngani tertieli nganai.”

²⁹Naka koko kulno kaldrinto manamiri terkana wonti; tanali miritipa kulno kaldrini multibana wonti, ja nina Ysopani kurana wonti, ja nina nunkangu manani kurana tarana wonti.

³⁰Jesujeli kaldri matja manina, Nau jatana wonti: “Matja mudai!” Ja Nau mangatandra buruna ngarina wonti ja palina wonti.

³¹Ngangau ngankingani ditji nganana wonti, ja palku wora wata kunarkuni parananto Sabbat ditjini, ngangau naupini Sabbat ditji pirna nganana wonti, Juda kana Pilatungu ngatjina wonti, tanali tanangu moku wokaribananto ja tanana ngarilkananto.

³²Mitaia kaparaia mili wokarana wonti, ja ngoperalaia moku wokaribana wonti, ja kulno nguruni, nau nunkangunto kunarkuni parana wonti.

³³Tana Jesungu wokarana wonti ja najina wonti Nau matia palina warai, tanali nina moku wata wokaribana wonti,

³⁴A-ai, kaparaia mili kulnujeli kaltieli nina pankitiri dakana wonti, ja nurujeli kumari ja ngapa dunkana wonti.

³⁵Ja nulia jenia najina wonti, nulia jenia tinkari ngankana wonti, ja tinkari ngankani nunkani morlalu nganai, ja nauja milkila nauja morlalu jatai, ngangau jura morlalu ngundrananto.

³⁶Jenia pantjina wonti, ngangau jaura morlalu pantjinanto: “Wata moku kulno tanali nina wokaribananto.”

³⁷Ja nakaldra jaura kulno jatai: “Tanali nina najila nganai, nina tanali dakana wonti.”