1Okanta inampiite Judá-paeni ipinkatharitzira Acaz itomi Jotam icharini Uzías, ikenkithashiretaka Rezín iwinkatharite Siria-jatzi, raapatziyaari Peka itomi Remalías iwinkatharite Israel-paeni rowayirityaari Judá-paeni. Ikoyi ikye inampiiteki, teemaeta imatziro.
2Ari ikamanteetakiri pinkathari Acaz itsipatakari ikaatzira jeekapankotziriri, ikanteetziri: “Raapatziyaakari Siria-jatzi Isaías.
3Ari iñaanateeri Tajorentsi Isaías, ikanteeri: “Paanakiri Acaz piotonkyotyaari pinkathari Sear-jasub othapiki nampitsi roonkanaateetzirowa nijaa, iiteetziri ‘inatsiryaapankaatakotakira kiwawaerentsi’?
4Pikanteri pitomi: ‘Paamahaeya, tekatsi pithaawanteeya, Tontashireri pikantya, eero pithaawantari apite oshiyakawori okachaatzi paamari, Irikaete Resín, Siria-jatzi, eejatzi itomi Remalías, katsimaki ikantaka ayimatziri mashirenkari.
5Irika Siria-jatzi itsipatakari Efraín-iite itomi Remalías, ikowaeyakini rowashironkayimi. Ikanteeyakini:
6“Jame aapithateri iipatsite Judá-paeni. Jame ominthaaweri ikine aapithateri iipatsite. Arika aakiro kepatsi riitaki owaeri itomi Tabeel ipinkathariwentee.” ’”
7Roori kantzimaetacha ikantaki Tajorentsi: “¡Eero imatziro!
8Tema Damasco rootaki otzinkamintsitari inampitsite Siria-jatzi. Riitaki Rezín iwinkatharitewitari Damasco-jatzi. Arika awijaki 65 ojarentsi, aritaki ithonkaeteeri Efraín-iite eero iñahaeteero inampiite.
9Rootaki Samaria otzinkamintsitari inampi Efraín-iite. Riima itomi Remalías riitaki iwinkatharitetari Samaria-jatzi. Eerorika pikyaaryooteeyini, aritaki ithonkaetakimi eejatzi eerokaete.”
10Iroka otsipa ikantakiriri Tajorentsi irika Acaz:
11“Pikowakoteri Pitajorentsite Tajorentsi roñaayemi kaari piñaapiintzi, rootaki piñeeri pijeekira otapinaki kepatsi, pijeekira eejatzi ojenokiperotzira jenokinta.”
12Rakanaki Acaz, ikantzi: “Tee okameethate noñaantawaetyaari Tajorentsi nokowakoteri roñaayena kaari noñaapiintzi.”
13Ikantanaki Isaías: “Pikeme isheninkaete pinkathari David. ¿Iitaka pikijaneentakiriri atziriite, pikijaneentzitakarima eejatzi Notajorentsite?
14Riitaki Awinkatharite oñaayemironi kaari piñaapiintzi: Ari owaeyantaki tsinani kaari yoterini shirampari, Itzime otomi, iitya Emanuel.
