Iob 1

1

2

3

4

38

40

42

¹Apana ebowa Iob tawo Us bedewe wandie. Me ipa apana dodomana dewa euda os dewalala. Me God sawaleidie atoweleidie mai kadi da dewasapona, dia.

²Me obampa mona 7 ita anoanopa natadea gamomon.

³Ita me sipsipwa uduudu 7,000, kamelwa 3,000, kauwa 1,000 ita donkiwa iwoa 500. Ita do me nolawa apanawa uaraia. Tane me ipa maura apanawa mai apana isiwa bola sa omo wisedia deneuwe waimoia ruau.

⁴Iob obampa muba duwoduwo oda dewasaie ita mo deadea walamau wisedio oda dewasaie weaweanapu natadea nisomoio wimoio do nana nai.

⁵Tane oda dialeidio Iob dewawa rua dewasadie ita obampa gagalou wadiaubedio mampe wimoio ita mo deadea dewamodio euntoi God emawe. Ipawa me insediase, “Ne obaina kadiwa dewasaiena ba nuau bedewe God wakadisa waiena.” Sa baiwa me tadinaida enedie pue sumodie puloleide God mampe me obampa euntompa baiwa God emawe.

⁶Walama dea Iawe God danawe me enseliwa auweiena ita Seitan do sape wisen.

⁷Iawe God Seitan diene wanase, “E naepe os lamoie tauma wien?” Tane Seitan leusane wanase, “Ne tawo uduudu osowe di leidine.”

⁸Tane Iawe God Seitan diene wanase, “E ne nolana dewalala Iob ewaana ba, dia? Me ipa apana eudida mai mida da me rua tawo osowe wainipona, dia. Me dewa dodomana os dewamodie ita ne wiwiranaleide tane mai kadiwa da dewasapona.”

⁹Tane Seitan Iawe God mampe wane wanase, “E onieiadewaitiana baiwa me wiwiraaleide.

¹⁰E walama uduudu me ita obampa ita do puraiwawa oniadewasamoiana. Dima me dewasadia e dewamoiano euda os segaleide. Sa baiwa tauma me mampe kau ita sipsip uaranton

¹¹tane naita e me nituwa uduudu otaubaitaa me e nanawo wakadisaa wapi.”

¹²Tane Iawe God wanase, “Oa, me nituwa uduudu e witaawosadina tane mai me kadisaa, dia.” Mape Seitan Iawe God ene alen.

¹³Walama dea Iob obampa mona ita iwoa otopa tautuwa duwa bedewe oda dewasaie.

¹⁴Ita walama sa dea bedewe benema apanawa Iob duwe wisene diene wanase, “E kaua dogo nobantoie laie ita donkia tampo ina naie laie

¹⁵ita poiwaa bola Sabe apanawa wimone pue uduudu poisamoiena ita nola apanawa uduudu bomoiena. Ne dea os eneieno weuwane e dieepa baiwa winen.”

¹⁶Tane apana sa gagaloleidio benema apanawa da wisene wanase, “God kelama uboe wanaubeno iene e sipsipa ita mo onioniau apanawa do imontuan. Ne dea os eneieno weuwane e dieepa baiwa winen.”

¹⁷Tane apana sa gagaloleidio benema apanawa natadeawa wisene wanase, “Poiwaa ua natadea Babilon tawowa bedewe wanwanla wimone e kamela uduudu poisamoiena ita e nolaa dewalala bomoiena. Ne dea os eneieno weuwane e dieepaa baiwa winen.”

¹⁸Ita apana sa gagaloleidio benema apanawa da wisene wanase, “E obana mona ita iwoa otoa tautuwa duwa bedewe odantoie.

¹⁹Tauwadea os lanunu debamaia sala makowa bedewe wisene du sainapa epamono du bioudene nosene obana uduudu bomontuwan. Ne dea os eneieno weuwane e dieepa baiwa winen.”

²⁰Ita Iob enene nuaparewa eueuwa garawa siolen ita uwa korelen. Ita me dunelene namba dogo osowe itune God wadaposisan.

²¹Ita me wanase, “Ne muntedine mai dima da wadape noneapona ita bontepine mai nitu da wadape do anteapa, dia. Nitu sa uduudu Iawe God ne nen ita mainawo mebaa leusane oten. Ne Iawe God ebowa wadaposisadina.”

²²Poka saiwa ema uduudu Iob mampe seganton tane me mai God wawusape baiwa waponase, “God ne mainawo kadi dewasan.”