Diyobi 1

1

2

3

4

38

40

42

¹Taumoho hudoꞌi hesana Diyobi mate Udi Nuꞌuna yai ya miyamiya. Hige somo laꞌi lebena yai ti fagilu paꞌana in doga dudulaina. Yaubada ya fafadebasae yo heyaya ya anꞌanfaledi.

²Nanatuna tatau faligigi luwaga yo wawahin faihona.

³Ena sipi oulidi 7 tausan, kamela 3 tausan bulumakau 1 tausan yo donki 5 handele. Ya fagogo wananaha habahim tefa saisai dodogadi.

⁴Nanatuna tatau, hesa - hesa ana fuya mataꞌasi ya ginauli ena luma yai na afa lolofudi faihona sa yogaidi be maidadi sa anꞌangogo.

⁵Mataꞌasi ofina yai, Diyobi ya yogaidi sa laoma be ya abi nonohaidi. Hwalahwalala ya eno obiyo haba ainauya antalasam ya gabu nanatuna enehedi, paꞌana ena nuwatuhu iyen, “Bena nanatugu heyaya ti ginauli yo nuwadi yai Yaubada ti kaumananai.” Laulau te ya famala Diyobi ena miyamiya, fuya ouꞌouli.

⁶Fuya hesa anelu sa laoma be sa fataumahata fuyoꞌidi Guyau nuwanuwana yai, na Tau Laulau Fagilu, Satani, ya lau watanidi hinaga.

⁷Guyau ya libalau Tau Laulau Fagilu lisina iyen, Somo yai wa laolaoma? Na ena bui ya felen iyen, Tanoꞌubu E lau tiga fataꞌiꞌili. E leuleu yo E saesae ganahewana yai.

⁸Habahim Guyau ya libalau Tau Laulau Fagilu lebena iyen, Egu tau paisowa, Diyobi haꞌa wa nuwatuhu fadosi e higeꞌe? Hige sai hesa doha in. Hige somo hesa lisina yai ti fagilu yo in doga dudulaina. Yaubada ya fafadebasae yo heyaya ya anꞌanfaleꞌedi.

⁹Yaubada alinana Tau Laulau Fagilu, Satani, ya bui iyen, Diyobi hige i fadebasae gaibuim!

¹⁰Fuya ouꞌouli, ana boga yo ena ginauli wa bobobodiyedi. Em faloholoho lebena yai be ya fagogo, ena sipi yo bulumakau sa tadada.

¹¹In moho aho, ibe ginauli mahudoꞌidi lebena yai wa kamfahidi, haba ya kaumananaem.

¹²Guyau ya libalau Tau Laulau Fagilu lebena iyen, Logena, ena ginauli mahudoꞌidi nimam yai E toledi. In moho, tabu u abilau tauna yai. Habahim Tau Laulau Fagilu, Guyau ya lau afulen.

¹³Lahai hesa Diyobi nanatuna sa anꞌangogo yo wain sa nomnom tuwahadi taumoho ena luma yai.

¹⁴Wasa tau leyamana ya laoma Diyobi ya faliba iyen, Em bulumakau aba giyagiyali sa felifeliꞌi na donki mate fadidi yai sa anꞌanban.

¹⁵Sabe dodogadi, em tau lau fayofayo sa tulufidi be mahudoꞌidi sa wunuidi na yosiyosi mahudoꞌidi sa angafuhidi. Yau ibogu moho E gela be E laoma, em E liba!

¹⁶Hola ma libalibana yo fede wasa tau leyamana hudoꞌi ya laoma ya liba iyen, Namanamali em sipi yo tau itaꞌita watanidi mahudoꞌidi ya angabuidi. Yau ibogu moho, E gela E laoma em E liba!

¹⁷Hola ma libalibana na wasa tau leyamana fafa faihonana ya laoma ya liba iyen, Tau angafu pwaludi faihona iti Kaladiya dodogadi sa laoma be em kamela mahudoꞌidi sa angafuhidi na em tau lau fayofayo sa wunuidi. Yau ibogu moho, E gela E laoma em E liba!

¹⁸Hola ma libalibana na wasa tau leyamana fafatina ya laoma ya liba iyen, Nanatum sa anꞌangogo yo wain sa nomnom tuwahadi ena luma yai.

¹⁹Ma esega na nuꞌu pitapitalina yai hwayahwayau laꞌilaꞌi ya towama! Luma ya towa fafataꞌiꞌili be ya guli. Nanatum mahudoꞌidi ya saꞌinidi be sa peꞌi. Na yau ibogu moho, E gela E laoma em E liba.

²⁰Yo fede Diyobi ya mwaito be ana luhuluhu ya kamgigi yo kuluna ya holi, ena nuwa heyaya fafaꞌilalana. Habahim ya guli lidi tanohi yai be Guyau ya fadebasae.

²¹Na iyen, E tubuma, ma tau afaꞌafagu. Na ma tau afaꞌafagu haba E peꞌi. Guyau somo ya felegu, haꞌa ya fafuyo; In moho, Guyau E fadebasae.

²²Diyobi pilipili ya fahoina, in moho hige ena lau fagilu hesa Yaubada lebena yai, yo hige ena heyaya hesa.