IOANE 19:1-11

¹Bena Pilato ese Iesu e abia, e siaia lao, tuari taudia ese e dadabaia.

²Bena idia ese havava ḡauna ḡiniḡini a e hatua, ia kwarana ai e atoa kau; bona dabua kakakakana e hakaralaia.

³Bena e raka henia kahi, eto, Iuda taudia edia pavapava e, ba mauri! Bena imadia amo e pataia.

⁴Bena Pilato ma e raka lasi, eto, A itaia, vairamui ai name hakaua lasi; ba diba, ena kerere ta asiname davaria.

⁵Bena Iesu na e raka lasi; havava ḡauna ḡiniḡini a e hatua be kwarana ai, dabua kakakakana danu tauna ai. Bena Pilato eto, Tau na a itaia.

⁶Hahelaḡa taudia bona edia hesiai taudia ese e itaia, bena e lolo, eto, Ba hasatauroa, ba hasatauroa! Pilato eto, Umui sibomui avabia, ba hasatauroa; badina be lau ese ena kerere ta asiname davaria.

⁷Iuda taudia ese e haere henia, eto, Ai na mai emai taravatu; bena emai taravatu dainai ia na baine mase hari namo, badina be ia na sibona e hegwaurai, e tomamu ia na Dirava Natuna.

⁸Pilato na una hereva e kamonai negana ai na e gari dikadika;

⁹gavana ena ruma ai ma e raka vareai lou, Iesu e nanadaia, eto, Ede amo oma? A Iesu na se haere.

¹⁰Bena Pilato eto, So hereva henigumu a? Asi dibamu lau na mai siahugu baina ruhamu nege bona mai siahugu baina hasatauromu a?

¹¹Iesu eto, Atai amo siahu basinema henimu, asi emu siahu boma noho; badina bunai, taogu e torea tauna ena dika ese oiemu e hereaiamu.