Juan 19:1-11

¹Kwian ulita gerudu ene Pilato ole gire Pilato joni gwa Jesu kle ngwadi, Pilato Jesu kwabatangu.

²Guardia donga Pilatonu ulita Jesu kwabatu gire ama giska kobaske bliu Jesu chuga batreti gire batu Jesu chugaske, kwian e Jesu ngama tku kwian chugagwalla kweri nga dba aimu kle mo ngama tke kare ñometra chada dabere, ñometra e kareske Jesu jo ngama tkaba.

³Gire guardia donga Pilatonu ulita chiu Jesudi, ama ngautu kweri Jesu gbe gidagda, ama gerudu Jesu ole kidere: —¡Nege ba kwian israelita ulita chugagwalla kweri, ba chege no kwian chugagwalla kweri kwian ulita gwa giti! Guardia donga ulita gerudu ene Jesu ole ta me no ole, kaire ama Jesu batu gwage kodi.

⁴Kle boi ene ulita gwa Jesu ole Pilato jo goga kwaite gerule kwian israelita ulita ole Jesu giti, Pilato gerudu kwian nglea ulita ole: —Cha be ama gbe aini goga ba ulita gwa giti, ene cha takalin suge bage, chage ama me skwen jiske dale.

⁵Gire Jesu dbachiu gbale kwian ulita gwa giti, Jesu chiu goga giska kobaske bliaba bataba ama chugaske, ama jo ngama tkaba ñometra chada dabereske, ama chku goga kwian israelita ulita gwa giti gire Pilato ama kaitu kwian ulitage, Pilato gerudu kwian ulita ole: —¡Gwagede onbre aidi, ama kle aini ba ulita gwa giti!

⁶Kwian gerunga Chube ole daba alin chugagwalla ulita kaire guardia u gerungwa Chube ole mananga ulita, kwian e ulita gwagedu Jesudi gire ama ulita ngautu kweri Jesu dollale: —¡Ama gwangeda kruge! Pilato gerudu kwian ulita ole: —Ba ta ama gwakalinda joga ama dbe, ba ulita agali ama gweda kruge ba takalin kare, agwa chage ama me skwen jiske dale.

⁷Kwian israelita ulita gerudu Pilatoge: —Cha kwian israelita ulita alin geru kle gbaba, geru e gerule kwian gweale mo gbe Chubere ama gwadaleda, onbre e kle gerule mau giti ama Chube Kirolla, malen cha ulitage suge ama jogedaleda ama kle mo gbe Chube Kirollale gdale.

⁸Pilato kwian keruchugu gerule “Chube Kirolla” gire Pilato ta kendunga tanre.

⁹Pilato joni gwa ule Jesu ole gire geru kadu Jesuge: —¿Ba nga bainimu? Agwa Jesu me jaindunga Pilato kalen.

¹⁰Pilato gerudu Jesu ole: —¿Mineade ba me jainnga cha kalen? ¿Me uñale bage cha kwian chugagwalla kira molen, cha ñage kwian kage ba gweda kruge kaire cha ñage kwian gbe ba skajwennga?

¹¹Gire Jesu gerudu Pilato ole: —Chube kle ba chuge ngwadi age cha ole, malen ba ñage age cha ole, ba gballa me ñage age cha ole. Malen kwian ulita cha ketanga bage gwaleda, ama jiske kweri kweri age me no cha ole giti, ama ulita jiske ma kweri bage.