San Juan 19:1-11

¹Evocoiyase Pilato oporocuai Jesús nupa ãgua.

²Sundao eta omonde ñaca rese yu pɨaprɨ iyavei omboyemonde turucuar pĩraumbɨ vahe pɨpe yuvɨreco.

³Ipare oyemboya sese aipo ehi: —¡Imboeteiprɨ judío Rerecuar tasecoi! —ehi angahu sovapete-pete yuvɨreco.

⁴Pilato evocoiyase osẽ iri ava upe aipo ehi: —Pesepia, anose pẽu pe icua ãgua che ndayosui eté mbahe sembiavɨ —ehi.

⁵Evocoiyase vɨnose yu pɨaprɨ oãca rese turucuar pĩraumbɨ vahe reseve senoha ava upe. Ahese Pilato aipo ehi: —¡Ndo co aipo mbɨa cute! —ehi.

⁶Osepiase pahi eta rerecuar, sundao rerecuar avei, omboɨpɨ osapucai: —¡Tayatɨcasa! ¡Tayatɨcasa! —ehi pãve voi yuvɨreco chupe. Pilato evocoiyase aipo ehi ava upe: —Peraso, peyatɨca pe ae. Esepia, che ndayosui eté mbahe sembiavɨ —ehi.

⁷Judío rerecuar rumo omboyevɨ yuvɨreco: —Ore rumo orovɨreco mborocuaita. Ipɨpe omanoño itera. Esepia, oyeapo tẽi Tũpa Rahɨr —ehi yuvɨreco.

⁸Aipo ñehesa renduse, Pilato oyembosɨquɨyé catu.

⁹Vɨroique iri oɨ pɨpe seraso. Aheve oporandu chupe: —¿Que pendar ité vo nde ereico? —ehi. Ahe rumo nomboyevɨ iri eté iñehe chupe.

¹⁰Evocoiyase Pilato aipo ehi chupe: —¡Mahera ndereñehei eté cheu! ¿Ndereicuai vo che mborerecuar aico nde atɨca uca ãgua, mbahe tẽi sui nde renose ãgua avei? —ehi Pilato chupe.

¹¹—¡Aní! Ndererecoi chietera nde mborerecuasa che harɨve Tũpa nombouise ndeu viña. Sese niha ava che mondosar ndeu oyemboangaipa catu nde sui yuvɨreco —ehi Pilato upe.