Idisu 24:15-22

¹⁵Amalalu, e da amo ba:la:lusu amane sia:i, “Ba:ila:me, Bio ea mano, da moloiwane ba:sa. Ea sia: da agoane gala.

¹⁶Na da Gode Ea sia: dalebe naba. Na da si godonasini agoane sosodosa. Na da esalebe ba:lala, Gode Bagadedafa da nama olelesa.

¹⁷Na da hobea misunu hou ba:la:lala. Na da Isala:ili fi ba:sa. Hina Bagade dunu, hadigi bagade gasumuni agoai, amo fi ganodini heda:lebe ba:mu. E da ofa:su gasumuni defele Isala:ili sogega misunu. E da Moua:be ouligisu dunu famu amola Sede soge dunu amo banenesimu.

¹⁸E da ea ha lai dunu Idome sogega esala amo hasalili, ilia soge huluane suguli lamu. Amola Isala:ili dunu da hasaliliwane masunu.

¹⁹Isala:ili fi dunu da ilia ha lai amo osa:le heda:le, dunu hame bogoi esalebe, amo huluane fane legemu.”

²⁰Amalalu, Ba:ila:ge da ea esala ba:su amo ganodini A:malege fi ba:lalu, amane ba:la:lusu sia:i, “A:malege ea gasa bagade hou da eno fi huluane baligi dagoi. Be fa:no e da gugunufinisi dagoi ba:mu.”

²¹Amalalu, Ba:ila:ge da ea esalebe ba:su amo ganodini, Ginaide dunu fi ba:i. E da amo ba:la:lusu sia:i, “Dia esalebe sogebi da gaga:i dagoi. Sio ea bibi da gafulu bagade amoga bibiba:le, eno liligiga wadela:lesimu hamedei.

²²Be dilia Ginaide dunu da gugunufinisi dagoi ba:mu. Bai Asilia dunu da dili doagala:le, suguli lamu.”