Iba Gana 95:1-7

¹Uru-o ti ibidaba. Anduane Homogonaga mini mo yaraga halu iba gana lami̱ya ibidaba. Ngode Datagaliwabe ibugua ibunaga hongome ina haru dai bialu pele ngiyago mitangi bialu ibuhondo turu halu iba gana lo mimi̱ya ibidaba.

²Iname ibu kagoria kaware hapara howa ibuhondo ka̱i̱ lo mali̱ya ibidaba. Iba gana baya turubiru ibunaga mini mo yaraga halu ibuhondo lo mimi̱ya ibidaba.

³Anduane Homogo ibu Ngode Datagaliwabe hongohe kagoni. Ibu kini hongo gibihe howa dama mitangi bialu wali agali gime wabini karubi ndo ibu daligaore gibi kagoni.

⁴Ibugua gundu uli unura wiape karuha howa handame hama iralu hari daligaore wedarunaga neneni handairi howa dindi bibahendeha handame ho kagoni.

⁵Ibugua wabini iba solowara bedarubi dindi bibahende ngarubi bibahende ibunime dege handame ho kagoni.

⁶Uru-o ti ibidaba. Iname inanaga ma podope halu Anduane Homogo ibu duniniore kago mitangi bialu ibuhondo lotu lami̱ya. Anduane Homogo ibu ina Wabiaga kago iname ibu kagoria kaware ibuwa ge duli hangaho biruwa ibu mitangi bialu lotu lami̱ya ibidaba.

⁷Ibu inanaga Ngode Datagaliwabe kagoni. Ibugua ibunaga wali agali bu kamaru nogo sibi haru haradagua haru haga kagoni. Ina tomo noloma̱ya ibugua ngiaga kagoni. Ibugua áyu bi o larago hale hadaba.