Text copied!
CopyCompare
Didzaʼ cub rucáʼn tsahuiʼ - Hechos

Hechos 2

Help us?
Click on verse(s) to share them!
1Catiꞌ chbdxin dza Pentecostés, tsazxö́n nudubquëꞌ yúguꞌtë bönniꞌ taꞌyejlëꞌë Cristo.
2Tu tsalz byön bö bruj luzxbá, byön ca ryön catiꞌ reycj böꞌ bdunuꞌ, atiꞌ byön gdutë lu yuꞌu ga naꞌ röꞌquëꞌ.
3Gululuíꞌ lahui lauquëꞌ lu böꞌz yuguꞌ blul guiꞌdauꞌ, atiꞌ gulaguís qui queëquëꞌ, yajsóalengac lequëꞌ.
4Dusóalenëꞌ yúguꞌtëꞌ Dios Böꞌ Laꞌy, atiꞌ gulazú lauquëꞌ tuꞌë didzaꞌ yubl, tsca nac le bëꞌë qui queëquëꞌ Dios Böꞌ Laꞌy luꞌë didzaꞌ yubl naꞌ.
5Nacuꞌë Jerusalén dza naꞌ bönniꞌ judío, nacquëꞌ bönniꞌ taꞌyíj ládxiꞌquëꞌ Dios, len zaꞌquëꞌ narujquëꞌ yúguꞌtë yödz gdu yödzlyú ni.
6Catiꞌ gulayönnëꞌ bö naꞌ, guludubëꞌ bönniꞌ zian, atiꞌ szxöni gulaböꞌë baguíꞌi, le gulayönnëꞌ, ca nac xtídzaꞌquëꞌ qui queëquëꞌ, tuꞌë didzaꞌ bönniꞌ naꞌ taꞌyejlëꞌë Cristo.
7Gulanáꞌ badxëꞌ yúguꞌtëꞌ, len gulubannëꞌ, taꞌnë́ꞌ: ―Gul‑yutscaꞌ. ¿Naruꞌ clëg bönniꞌ Galilea yúguꞌtë bönniꞌ ni tuꞌë didzaꞌ?
8¿Nacxcz nac ryö́niruꞌ tuꞌë xtídzaꞌruꞌ ca nac didzaꞌ ruiꞌruꞌ tu turuꞌ?
9Rëꞌu ni nacruꞌ bönniꞌ zian yödz, bönniꞌ narujquëꞌ luyú Partia, len luyú Media, len luyú Elam, len luyú Mesopotamia, len luyú Judea, len luyú Capadocia, len luyú Ponto, len luyú Asia,
10len luyú Frigia, len luyú Panfilia, len luyú Egipto, len luyú África, le nacr ziꞌtuꞌ ga zoa luyú Cirene. Lëzcaꞌ nacuꞌë ni bönniꞌ yödz Roma. Laꞌquëꞌ nacquëꞌ bönniꞌ judío len yelaꞌquëꞌ nazíꞌ lu naꞌquëꞌ le taꞌyejlëꞌë Dios bönniꞌ judío.
11Lëzcaꞌ nacuꞌë ni bönniꞌ narujquëꞌ Creta, len luyú Arabia. Ryö́niruꞌ tuꞌë didzaꞌ ruiꞌruꞌ qui queëruꞌ, taꞌguíxjöꞌë yuguꞌ le zxön benëꞌ Dios, le run ga rubániruꞌ.
12Cni guc, gulubannëꞌ yúguꞌtëꞌ, len szxöni gulaböꞌë baguíꞌi. Glë lzaꞌquëꞌ tuëꞌ yetúëꞌ, taꞌnë́ꞌ: ―¿Bizxa caz lë ni?
13Gulutitjëꞌ laꞌquëꞌ, taꞌnë́ꞌ: ―Taꞌzúdxinëꞌ.
14Niꞌr Pedro gzuílenëꞌ yechineajëꞌ gbaz naꞌ nasölëꞌë Cristo, atiꞌ gzu lahuëꞌ ruꞌë zidzj didzaꞌ, rëꞌ lequëꞌ: ―Lbiꞌiliꞌ, bönniꞌ Judea, len yúguꞌtëliꞌ zoaliꞌ Jerusalén. Lë ni ral‑laꞌ gnö́ziliꞌ. Gul‑zë́ nagliꞌ le gyëpaꞌ lbiꞌiliꞌ.
15Netuꞌ ni cutu rzúdxituꞌ ca naꞌ ráquiliꞌ lbiꞌiliꞌ, le ni zoaruꞌ ziꞌa gal‑laꞌ xsil, atiꞌ nutu nu rzudxi hora cni.
16Lë ni nac le gnëꞌ Joel, bönniꞌ bëꞌë didzaꞌ uláz queëꞌ Dios, gnëꞌ:
17Cni rnëꞌ Dios: Lë ni le gac dza tsajséytëgac. Gsölaꞌa Böꞌ Laꞌy quiaꞌ Tsajsóalenëꞌ yúguꞌtë bunách. Luiꞌbiꞌ didzaꞌ uláz quiaꞌ zxiꞌnliꞌ, bönniꞌ len ngul. Laꞌléꞌibiꞌ biꞌi raꞌbán le uluꞌa lahui, Atiꞌ laꞌneynëꞌ yël bönniꞌ gul.
18Catiꞌ gdxin dza niꞌ quisiaꞌ Böꞌ Laꞌy quiaꞌ Tsajsóalenëꞌ huen dxin quiaꞌ, bönniꞌ len ngul, Atiꞌ luꞌë didzaꞌ uláz quiaꞌ.

19Uluꞌa luzxbá xtsaꞌ le lun ga lubani bunách, Atiꞌ yödzlyú uluꞌa le lac bëꞌ, Rön len guiꞌ, len dzön ca böaj.
20Gchul gbidz Atiꞌ gac xna beoꞌ ca nac rön. Cni gac catiꞌ ziꞌa gdxin dza niꞌ chbuluꞌë Dios. Gac dza niꞌ ca gatga rléꞌiruꞌ.
21Lulá yúguꞌtë nup niꞌ lulídz Lëꞌ Xanruꞌ, Lu yöl‑laꞌ rejlëꞌ quequëꞌ Lëꞌ.
22’Gul‑zë́ nagliꞌ lë ni gyëpaꞌ lbiꞌiliꞌ, bönniꞌ Israel. Dioscz benëꞌ ba laꞌn ga zoaliꞌ Jesús, bönniꞌ Nazaret. Dios bëꞌë Lëꞌ latj benëꞌ le tun ga rubániruꞌ, yuguꞌ yöl‑laꞌ huac, len le tac bëꞌ. Yúguꞌtë lë naꞌ benëꞌ Dios lu nëꞌë Jesús, ca naꞌ chnö́ziczliꞌ.
23Lëzcaꞌ cni, Dios bëꞌë latj nu budö́d Jesús lu naꞌliꞌ. Cni guc, ca naꞌ chgna ladxëꞌë Dios gunëꞌ, len ca nac le chbucözëꞌ dza niꞌtë. Lbiꞌiczliꞌ gzxönliꞌ‑nëꞌ Jesús, len budödliꞌ‑nëꞌ lu naꞌquëꞌ bönniꞌ xöhuiꞌ tuaꞌdöꞌ, bönniꞌ guludöddëꞌ Lëꞌ catiꞌ niꞌ guludaꞌquëꞌ Lëꞌ lëꞌi yag cruz.
24Niꞌr Dioscz buspanëꞌ Jesús naꞌ, buslë́ꞌ Lëꞌ lu yöl‑laꞌ gut, le cutu guc ugaꞌnëꞌ tsaz lu yöl‑laꞌ gut naꞌ.
25Ca nac lë ni, bëꞌë didzaꞌ uláz queëꞌ Dios David ca nac queëꞌ Jesús, gnëꞌ: Bléꞌiteczdaꞌ‑nëꞌ Xanruꞌ, zoëꞌ lahuaꞌ. Lëꞌ zoëꞌ cuit lëꞌa yubél, rzönëꞌ nedaꞌ, Cui gac nu bi gun quiaꞌ.
26Qui lë ni naꞌ budziji ladxaꞌa, Atiꞌ lu yöl‑laꞌ rudziji quiaꞌ bil‑laꞌ. Qui lë ni naꞌ gunaꞌ löz Lëꞌ Catiꞌ gdxin dza gatiaꞌ.
27Xantuꞌ Dios, nözdaꞌ cutu ucaꞌnuꞌ nedaꞌ latj chul quegac nup natgac. Cutu guꞌu latj nit gdu ca nayáꞌ nabanaꞌ, Nacaꞌ bönniꞌ nadxiꞌicznuꞌ Liꞌ.
28Buzéjniꞌnuꞌ nedaꞌ ca ral‑laꞌ gunaꞌ Quië gdél‑liꞌdaꞌ yöl‑laꞌ naꞌbán gdu. Gunuꞌ ga udzijdaꞌ le zóalenczuꞌ nedaꞌ.
29’Naꞌa, böchaꞌa. Nac bëꞌ gutiëꞌ xuz xtauꞌruꞌ David, len bgachëꞌë yeru ba, atiꞌ dë ga zoaruꞌ ba queëꞌ naꞌ ga rdxintë naꞌa dza.
30Bëꞌë didzaꞌ uláz queëꞌ Dios David naꞌ, len gnöznëꞌ David, benëꞌ tsutsu didzaꞌ Dios le gzxiꞌ lu nëꞌë queëꞌ, gunëꞌ ga galjëꞌ Cristo ladj zxiꞌn xsoëꞌ, atiꞌ Cristo naꞌ gna bëꞌë, tsaziëꞌ xlatjëꞌ David naꞌ.
31Le bléꞌinëꞌ lë ni ziꞌal David, bëꞌë didzaꞌ ca guc, bubanëꞌ Cristo, len ca guc, cutu bugaꞌnëꞌ latj chul quegac nup natgac, atiꞌ cutu gnit le gyaꞌ gbanëꞌ.
32Dios buspanëꞌ Jesús lu yöl‑laꞌ gut, len ca guc lë ni yúguꞌtëtuꞌ runtuꞌ lnaꞌ lau qui.
33Cni guc, len yöl‑laꞌ huac queëꞌ, Dios buchisëꞌ Lëꞌ xtsaꞌ ga niꞌ náctërëꞌ zxön. Naꞌa, Cristo chbsölëꞌë ni Dios Böꞌ Laꞌy, rac ca naꞌ gzxiꞌ lu nëꞌë Dios gunëꞌ lu nëꞌë Cristo, atiꞌ Dios Böꞌ Laꞌy naꞌ runëꞌ yuguꞌ lë ni rléꞌiliꞌ len ryö́niliꞌ.
34Cutu buëpëꞌ yehuaꞌ yubá David naꞌ, san lëczëꞌ David naꞌ gnëꞌ: Xanruꞌ Dios gudxëꞌ Xanaꞌ: “Gröꞌ cuit lëꞌa yubél ga nac blau
35Catiꞌ gunraꞌ ga luzechu zxibgac lauꞌ nup taꞌdáꞌbagaꞌ Liꞌ.”
36’Naꞌa, bunách Israel, le nacz ral‑laꞌ gnö́ziliꞌ. Dios benëꞌ ga naquëꞌ Xanruꞌ len Bönniꞌ Ruslá, Lëczëꞌ Jesús ni, bönniꞌ naꞌ budaꞌliꞌ‑nëꞌ lëꞌi yag cruz.

37Catiꞌ gulayönnëꞌ lë ni bönniꞌ niꞌ, gulaböꞌë baguíꞌi, atiꞌ glëꞌ Pedro len yezícaꞌrëꞌ bönniꞌ gbaz queëꞌ Cristo, taꞌnë́ꞌ: ―Bö́chiꞌtuꞌ, ¿nacx gúntsatuꞌ?
38Niꞌr Pedro gudxëꞌ lequëꞌ: ―Gul‑bíꞌi ládxiꞌliꞌ, len gdil‑liꞌ nis tu tuliꞌ lu lëꞌ Jesucristo quië unít lahuëꞌ Dios dul‑laꞌ nabágaꞌliꞌ, atiꞌ dusóalenëꞌ lbiꞌiliꞌ Dios Böꞌ Laꞌy, Nu gsölëꞌë queëliꞌ Dios.
39Queëliꞌ naqui le gzxiꞌ lu nëꞌë Dios, len quegac zxiꞌnliꞌ, lencaꞌ quegac yúguꞌtë bunách gzaꞌa, yúguꞌtë bönniꞌ niꞌ ulidzëꞌ lequëꞌ Xanruꞌ Dios.
40Yuguꞌ didzaꞌ ni len yelaꞌgac zian didzaꞌ benëꞌ lnaꞌ lau Pedro, bchiziëꞌ icj nagquëꞌ, gnëꞌ: ―Gul‑gún ga ulaliꞌ, gcuitliꞌ ga nacuáꞌ bunách tuaꞌdöꞌ nacuáꞌ dza ni zoaruꞌ naꞌa.
41Cni guc, guladíl nis nup niꞌ gulazíꞌ lu naꞌgac didzaꞌ naꞌ bëꞌë Pedro. Dza naꞌ glun tuz lequëꞌ ca chi uruáꞌ gayuáꞌ bunách.
42Glunëꞌ yúguꞌtëꞌ gdutë le gulusëdnëꞌ lequëꞌ gbaz nasölëꞌë Cristo. Glaquëꞌ tuz tuëꞌ len yetúëꞌ, len tsazxö́n glahuëꞌ le rusáꞌ ládxiꞌruꞌ ca gutiëꞌ Jesús, atiꞌ glunëꞌ tsazxö́n, gululidzëꞌ Dios.
43Zian le run ga rubániruꞌ len zian le tac bëꞌ glunëꞌ gbaz queëꞌ Cristo, san gladxi guladzöbi yezicaꞌr bunách.
44Tuz glac yúguꞌtë nup naꞌ taꞌyejlëꞌ Cristo, atiꞌ guluúnëꞌ tuz yúguꞌtë le dë quequëꞌ.
45Catiꞌ gulaléꞌinëꞌ taꞌyadzji nup nútsaꞌgac ladjquëꞌ, niꞌr bönniꞌ bi dë quequëꞌ glútiꞌë lei, atiꞌ gulaguisiëꞌ dumí naꞌ qui queëgac nup niꞌ bi taꞌyadzji.
46Yuguꞌ dza guludubëꞌ tsazxö́n nchil gdauꞌ, atiꞌ gap nac lu yuꞌu glahuëꞌ le rusáꞌ ládxiꞌruꞌ ca gutiëꞌ Xanruꞌ. Tsazxö́n glahuëꞌ, atiꞌ guludzijnëꞌ len glac gdu ládxiꞌquëꞌ.
47Gulaguꞌë Dios yöl‑laꞌ ba, atiꞌ glun lequëꞌ ba laꞌn yúguꞌtë bunách. Tu tu dza buzanëꞌ Xanruꞌ nup tuꞌdúb queëꞌ, nup naꞌ tuꞌlá.