HAHEMAORO TAUDIA 1:4-14

⁴Bena Iuda na eha tuari. Bena Iehova ese Kanaan taudia bona Perisi taudia na idia imadia ai e atodia: gerebu ta e hadareredia Besek ai.

⁵Una Besek ai idia ese Adoni-besek e davaria, bena e tuari henia, Kanaan taudia bona Perisi taudia e hadareredia.

⁶A Adoni-besek e heau; bena idia ese e ḡavaia ela bona e abia mauri; bena imana sinabadadia bona aena sinabadadia e utudia oho.

⁷Bena Adoni-besek eto, Pavapava hitu-ahui imadia sinabadadia bona aedia sinabadadia na utudia oho, bena egu pata henunai aniani momorudia e ani; lau ese na kara henidia heḡereḡerena, Iehova ese unu vada e kara henigu toma. Bena idia ese Ierusalem e laohaia: unuseni ai e mase.

⁸Bena Iuda taudia ese Ierusalem e tuari henia, e abia, hanua taudia na dare amo e aladia ore, bena hanua e doua.

⁹Una murinai Iuda taudia e hekei ela, Kanaan taudia e tuari henidia, ororo kahadia ai bona diho kahana ai bona taora kahadia ai.

¹⁰Iuda taudia danu ela, Kanaan taudia Heberon ai (una hanua ladana gunana be Kiriat-araba) e tuari henidia. Bena idia ese Sesai bona Ahiman bona Talmai e hadareredia.

¹¹Unu amo ma ela, Debiri taudia e tuari henidia. (Debiri ladana gunana na Kiriata-sefere).

¹²Kaleb eto, Kiriata-sefere baine tuari henia bona baine abia tauna na natugu kekenina Aksa baina henia, baine adavaia.

¹³Bena Otoniele, Kaleb tadina Kena natuna, ese e abia; bena Kaleb ese natuna kekenina Aksa na e heni; l, bena ia ese e adavaia.

¹⁴Bena hahine na adavana dekena ela, lalona e ania, tamana enai tano ta baine noia eto. Ma ela, bena ena doniki amo e diho negana ai, Kaleb ese e nanadaia, eto, Emu ura be dahaka?